ភ្នំពេញ ៖ លោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ កាលពីព្រឹកថ្ងៃទី២៥ ខែកុម្ភៈ ឆ្នាំ២០១៩ បានដឹកនាំកិច្ចប្រជុំ ដើម្បីត្រៀមរៀបចំព្រឹត្តិការណ៍គម្រប់ខួប១០០ឆ្នាំ នៃការបង្កើតអង្គការអន្តរជាតិខាងការងារ (ILO) និងខួប៥០ឆ្នាំ នៃសមាជិកភាពកម្ពុជានៅអង្គការអន្តរជាតិខាងការងារ នៅទីស្ដីការក្រសួង។
ព្រឹត្តិការណ៍នេះពិតជាមានសារៈសំខាន់ណាស់សម្រាប់កម្ពុជាដើម្បីបង្ហាញពីភាពជាដៃគូអំពីវឌ្ឍនភាព នៃកិច្ចសហប្រតិបត្តិការរវាងអង្គការអាយឡូ និងកម្ពុជានាពេលកន្លងមក ដែលតួនាទីនេះបានចូលរួមចំណែកក្នុងការអភិវឌ្ឍសេដ្ឋកិច្ចសង្គម ជាពិសេសសិទ្ធិ ស្ដីពីការងារ។
កម្ពុជា បានក្លាយជាសមាជិក នៃអង្គការអន្តរជាតិខាងការងារ(ILO) តាំងពីឆ្នាំ១៩៦៩ ប៉ុន្តែដោយសារជម្លោះផ្ទៃក្នុង និងសង្គ្រាមស៊ីវិលអស់រយៈពេលជិត៣០ឆ្នាំ កិច្ចសហការទាំងឡាយក៏លែងមាន។
នៅត្រឹមដើមទសវត្សរ៍ឆ្នាំ១៩៩០ប៉ុណ្ណោះ ដែលអង្គការអាយឡូ បានក្លាយជាដៃគូដ៏គួរឲ្យទុកចិត្ត ក្នុងការស្តារសេដ្ឋកិច្ច និងប្រជាធិបតេយ្យនៅកម្ពុជា។
មកទល់បច្ចុប្បន្ននេះ កម្ពុជាបានផ្តល់សច្ចាប័នលើអនុសញ្ញារបស់អង្គការILO ចំនួន១៣ ដែលក្នុងនោះរួមមាន អនុសញ្ញាស្នូល៨ ផងដែរ។ កម្ពុជា បានបន្តបំពេញភារកិច្ចរបស់ខ្លួនក្នុងការអនុវត្តអនុសញ្ញាអន្តរជាតិឲ្យស្របតាមបទដ្ឋានអន្តរជាតិខាងការងារ និងបន្តការចូលរួមកិច្ចប្រជុំក្រុមប្រឹក្សាភិបាល(GB) សន្និសីទអន្តរជាតិខាងការងារ(ILC) និងកិច្ចប្រជុំថ្នាក់តំបន់ Asia-Pacific៕
Source: Kampuchea Thmey Daily
0 Comments