ភ្នំពេញ ៖ អ្នកនាំពាក្យរាជរដ្ឋាភិបាលកម្ពុជាលោក ផៃ ស៊ីផាន បានអះអាងថា រាជរដ្ឋាភិបាល កំពុងតាមដានយ៉ាងយកចិត្តទុកដាក់បំផុត ចំពោះសកម្មភាព និងចលនាវិទ្ធង្សនារបស់បុគ្គល ឬក្រុម ពាក់ព័ន្ធទៅនឹងសកម្មភាពភេរវកម្មនយោបាយ ហើយអាជ្ញាធរមានសមត្ថកិច្ច បាននិងកំពុងត្រៀមជាស្រេច ក្នុងការកំណត់អត្តសញ្ញាណលើបុគ្គលពាក់ព័ន្ធ។
លោក ផៃ ស៊ីផាន លើកឡើងបែបនេះនៅក្នុងសេចក្តីថ្លែងការណ៍របស់ខ្លួន ចុះថ្ងៃទី០៨ ខែកុម្ភៈ ឆ្នាំ២០១៩។ នៅក្នុងសេចក្តីថ្លែងការណ៍អ្នកនាំពាក្យបានប្រាប់សាធារណជន ទាំងក្នុង និងក្រៅប្រទេសថា ការលើកឡើងក្នុងរូបភាពញុះញង់ ដោយក្រុមនៅឯនាយសមុទ្រ បានអំពាវនាវដល់កងកម្លាំងប្រដាប់អាវុធ ក៏ដូចជាប្រជាពលរដ្ឋ ក្នុងបំណងបង្កើតកម្លាំងចលនាមហាជនប្រឆាំងនឹងច្បាប់ ប្រឆាំងនឹងរាជរដ្ឋាភិបាល ដែលកើតចេញពីការបោះឆ្នោតស្របច្បាប់ និងកំពុងដំណើរការប្រកបដោយប្រក្រតីភាព ស្ថិតនៅក្នុងនីត្យានុកូលភាពពេញលេញនេះ គឺជាសកម្មភាពប្រព្រឹត្តបទឧក្រិដ្ឋ ឬជាសកម្មភាពឧក្រិដ្ឋកម្ម ដែលមានចែងនៅក្នុងក្រមព្រហ្មទណ្ឌ នៃព្រះរាជាណាចក្រកម្ពុជា។
ការិយាល័យអ្នកនាំពាក្យបញ្ជាក់ថា ការញុះញង់ខាងលើ គឺជាអំពើភេរវកម្មនយោបាយប្រឆាំងទៅនឹងផលប្រយោជន៍កម្ពុជា ក៏ដូចប្រជាពលរដ្ឋរបស់ខ្លួន ទោះជាសកម្មភាពញុះញង់នោះស្ថិតនៅឯក្រៅប្រទេស ក៏អាចជះឥទ្ធិពល ដល់ប្រទេសកម្ពុជាដែរ ហើយរាជរដ្ឋាភិបាលនឹងចាត់វិធានការម៉ឺងម៉ាត់ តាមផ្លូវច្បាប់គ្រប់យ៉ាង រួមទាំងកិច្ចសហការជាអន្តរជាតិ ក្នុងការទប់ស្កាត់សកម្មភាពភេរវកម្មនយោបាយទាំងនេះ។
ការិយាល័យអ្នកនាំពាក្យបញ្ជាក់ជាថ្មីថា សកម្មភាពភេរវកម្មនយោបាយនេះ បង្កើតជាសង្គ្រាម ចិត្តសាស្ត្រនយោបាយ ប្រឆាំងពិតប្រាកដ នឹងភាពសុខសាន្ត និងប្រក្រតីភាព ដែលជាជម្រើសអាទិភាពរបស់មហាជនខ្មែរ។ សកម្មភាពភេរវកម្មនយោបាយនេះ ប្រឆាំងនឹងដំណើរការច្បាប់កម្ពុជា ប្រឆាំងនឹងរបបប្រជាធិបតេយ្យ ដែលកំពុងអភិវឌ្ឍជាទៀងទាត់ ដើម្បីថែរក្សានិងលើកស្ទួយសន្តិភាព និងស្ថិរភាពនយោបាយ ដែលជាទិសដៅ ដ៏មានសារៈសំខាន់បំផុតរបស់កម្ពុជា។
តាមលោក ផៃ ស៊ីផាន “រាជរដ្ឋាភិបាល កំពុងតាមដានយ៉ាងយកចិត្តទុកដាក់ និងស្និទ្ធបំផុត ចំពោះរាល់សកម្មភាព និងចលនា វិទ្ធង្សនារបស់បុគ្គល ឬក្រុមពាក់ព័ន្ធទៅនឹងសកម្មភាពភេរវកម្មនយោបាយទាំងនេះ។ អាជ្ញាធរមានសមត្ថកិច្ច បាននិងកំពុងត្រៀមជាស្រេច ក្នុងការឆ្លើយតបជាមួយនឹងការប្រមូលភស្ដុតាង ជាក់ស្ដែង និងកំណត់អត្តសញ្ញាណលើបុគ្គលពាក់ព័ន្ធ ដើម្បីអនុវត្តច្បាប់ ដែលសមាមាត្រឆ្លើយតបនឹងសកម្មភាព ភេរវកម្មនយោបាយ នៅពេលចាំបាច់ណាមួយ៕
Source: Kampuchea Thmey Daily
0 Comments