លោកហ៊ុន ម៉ានី ថា ការចូលរួមសម្តែងឈីងហ្គេ នៅសិង្ហបុរី នឹងធ្វើឲ្យអន្តរជាតិ ក៏ដូចជាពិភពលោក កាន់តែស្គាល់ខ្មែរយើងថា មានភាពម៉ត់ចត់ និងរួសរាយរាក់ទាក់

ភ្នំពេញ ៖ ការលើកឡើងរបស់លោក ហ៊ុន ម៉ានី សហភាពសហព័ន្ធយុវជនកម្ពុជា (ស.ស.យ.ក) បែបនេះ បានធ្វើឡើងកាលពីព្រឹកថ្ងៃទី០៨ ខែកុម្ភៈ ឆ្នាំ២០១៩ ខណៈលោកចូលរួមក្នុងសកម្មភាពហាត់សមរបស់ក្រុមសិល្បករ ដើម្បីចូលរួមសម្តែងក្នុងព្រឹត្តិការណ៍ក្បួនដង្ហែ ឈីងហ្គេ ឆ្នាំ២០១៩ ដែលនឹងប្រព្រឹត្តទៅចាប់ពីថ្ងៃទី១៥ ដល់១៦ ខែកុម្ភៈ ឆ្នាំ២០១៩ នៅសាធារណរដ្ឋសិង្ហបុរី។

លោក ហ៊ុន ម៉ានី បានមានប្រសាសន៍ប្រាប់អ្នកសារព័ត៌មាននាព្រឹកនោះថា អ្វីៗកើតចេញពី ការខិតខំប្រឹងប្រែងរបស់យើង ហើយនេះ ជាលើកទីពីរហើយ ដែលសហភាពសហព័ន្ធយុវជនកម្ពុជា បានដឹកនាំក្រុមសិល្បៈទៅសម្តែងនៅក្នុងព្រឹត្តិការណ៍ឈីងហ្គេនេះ ហើយសកម្មភាពនេះ បើគ្មានការគាំទ្រពីរាជរដ្ឋាភិបាល ជាពិសេសក្រសួងវប្បធម៌ និងវិចិត្រសិល្បៈ និងលោកគ្រូ អ្នកគ្រូទេ គឺមិនអាចទៅរួចទេ។ លោកបញ្ជាក់ថា ប្រធានបទឆ្នាំនេះ គឺខាងសិង្ហបុរី ជាអ្នករៀបចំ ដែលពាក់ព័ន្ធទៅនឹងក្តីស្រមៃមួយ ហើយដោយផ្អែកលើប្រធានបទនេះ ទើបកម្ពុជាយើងតាក់តែងជាប្រធានបទមួយ តាមទម្រង់វប្បធម៌ និងប្រពៃណីរបស់ខ្មែរយើង ដូចជាអង្គរ ព្រះថោងនាងនាគ គោសមុទ្រទឹកដោះ ល្បុក្កតោ ដែលប្រើប្រាស់ក្រមាជាអាវុធ ហើយក្នុងនោះ ក៏មានផ្ការំដួល ដែលជាអត្តសញ្ញាណជាតិខ្មែរផងដែរ។

តាមលោក ហ៊ុន ម៉ានី អះអាងថា សកម្មភាពនេះ បើប្រៀបធៀបនឹងពេលមុន នឹងទទួលបានការស្វាគមន៍ លេចធ្លោលើសពីបណ្តាប្រទេសដទៃ ពីព្រោះជាធម្មតាប្រទេសនីមួយៗ គេតែងពីវប្បធម៌របស់ខ្លួន ប៉ុន្តែកម្ពុជា នឹងមិនចាញ់ប្រទេសគេនោះទេ។ លោកបញ្ជាក់ថា ឈីងហ្គេ គ្រាន់តែជាវេទិកាមួយប៉ុណ្ណោះ ហើយមានវេទិកាជាច្រើនទៀត ដែលយើងបានទៅបង្ហាញវប្បធម៌ សង្គមរបស់យើង ហើយលើសពីនេះទៀត យើងចង់បង្ហាញពីកម្ពុជា នាពេលបច្ចុប្បន្ន ហេតុនេះហើយ ទើបយើងមានបញ្ចូលល្បុក្កតោ ដែលមានប្រើប្រាស់ក្រមាជាអាវុធ ក្នុងការការពារខ្លួន ដែលជាអត្តសញ្ញាណជាតិ ដូច្នេះយើងបង្ហាញពីកម្ពុជា នាពេលបច្ចុប្បន្ន ដែលមានសុខុមរម្យនា។

លោក ហ៊ុន ម៉ានី លើកឡើងទៀតថា អ្វីដែលគួរចាប់អារម្មណ៍លើសពីបទបៀតនោះ គឺនៅពេលយើងទៅដល់ ការស្នាក់នៅទីនោះ នឹងមានទំនាក់ទំនងជាមួយគណៈកម្មការ ជាមួយគណៈប្រតិភូពីបណ្តាប្រទេសផ្សេងៗ ហើយភាពញញឹមរាក់ទាក់របស់ខ្មែរយើង នឹងធ្វើឲ្យគេចាប់អារម្មណ៍ ហើយការចូលរួមនេះ នឹងធ្វើឲ្យអន្តរជាតិ ក៏ដូចជាពិភពលោកបានស្គាល់ថា ប្រជាជនខ្មែរយើងមានភាពម៉ត់ចត់ក្នុងការធ្វើការងារ ហើយក៏មានភាពរាក់ទាក់ផងដែរ។

ចំណែកលោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈបានមានប្រសាសន៍ដែរថា នៅក្នុងការសម្តែងសាកល្បងនាឆ្នាំនេះ ឃើញថាល្អជាងឆ្នាំមុន ដោយសារតែមានបទពិសោធន៍នាឆ្នាំកន្លងមក ហើយឆ្នាំនេះ យើងបានត្រៀមទាំងភ្លេង ទាំងសិល្បករបានល្អ ស៊ីគ្នា ហើយនេះជាសារមួយ ដើម្បីបង្ហាញទៅអន្តរជាតិថា យើងជាខ្មែរ ហើយលោកស្រីសង្ឃឹមថា នឹងសម្តែងបានល្អនៅក្នុងព្រឹត្តិការណ៍នោះ។ លោកស្រីបញ្ជាក់ថា ការទៅសម្តែងនេះ យើងមានរយៈពេល៣នាទីប៉ុណ្ណោះ ប៉ុន្តែការបើមើលទៅលើការសម្តែងនេះ គឺឃើញទាំងអស់ តាំងពីការកកើតទឹកដី ព្រះថោងនាងនាគ សុខដុមរម្យនាទឹកដី របាំម្ករ…ក្រមា ផ្ការំដួល ក្បាច់គុនល្បុក្កតោ ហើយអ្វីដែលសំខាន់ទៀតនោះ គឺសម្ផស្សនៃទេពកោសល្យ ដែលក្រុមសិល្បករយើងបានរៀបចំឡើង។

សូមបញ្ជាក់ថា ប្រទេសកម្ពុជា នឹងចូលរួមសម្តែងក្នុងព្រឹត្តិការណ៍ក្បួនដង្ហែ ឈីងហ្គេ ឆ្នាំ២០១៩ ជាថ្មី ដែលនឹងប្រព្រឹត្តទៅចាប់ពីថ្ងៃទី១៥ ដល់១៦ ខែកុម្ភៈ នៅទីតាំង F1 Pit Building នៅសាធារណរដ្ឋសិង្ហបុរី ដែលដឹកនាំដោយសហភាពសហព័ន្ធយុវជនកម្ពុជា ហើយការចូលរួមនេះ ធ្វើឡើងតាមការអញ្ជើញរបស់សមាគមប្រជាជន នៃសាធារណរដ្ឋសិង្ហបុរី។

នៅក្នុងសន្និសីទមួយនាថ្មីៗនេះ លោក សុខ សប្បាយណា សមាជិកគណៈកម្មាធិការអចិន្ត្រៃយ៍សហភាពសហព័ន្ធយុវជនកម្ពុជា (ស.ស.យ.ក.) ធ្លាប់បានថ្លែងថា ក្បួនដង្ហែ ឈីងហ្គេ គឺជាក្បួនព្យុហយាត្រា សិល្បៈសម្តែងដ៏ធំមួយនៅអាស៊ី ដែលរៀបចំឡើងជារៀងរាល់ឆ្នាំ ដោយសមាគមប្រជាជន នៃសាធារណរដ្ឋសិង្ហបុរី ហើយកម្មវិធីនេះត្រូវបានផ្តួចផ្តើមដោយអតីត នាយករដ្ឋមន្ត្រី លី ក្វាន់យូ ក្នុងគោលបំណងបង្ហាញពីភាពអស្ចារ្យ ភាពស្រស់បំព្រង និងភាពសម្បូរបែបនៃវប្បធម៌ចម្រុះ។ ក្នុងក្បួនព្យុហយាត្រានេះ គឺមានការចូលរួមសម្តែងដោយក្រុមសិល្បៈជាតិប្រមាណ១៥០ ស្ថាប័ន និងរួមបញ្ចូលជាមួយ បណ្តាសិល្បករ សិល្បការិនី មកពីជុំវិញពិភពលោក សរុបទាំងអស់ប្រមាណជិត១០០០០នាក់ រួមគ្នាបង្ហាញពីសិល្បៈវប្បធម៌នៃជាតិសាសន៍រៀងៗខ្លួន។

លោក សុខ សប្បាយណា ពន្យល់ថា មូលហេតុដែលកម្ពុជាចូលរួមក្នុងព្រឹត្តិការណ៍ក្បួនដង្ហែ ឈីងហ្គេនោះ ដោយសាតែក្បួនដង្ហែ ឈីងហ្គេ គឺមានការចូលរួមពីបណ្តាប្រទេសជាច្រើននៅលើពិភពលោក ដែលអាចទាក់ទាញវិសាលភាពផ្សព្វផ្សាយបានទូលំទូលាយទៅកាន់មហាជន រាប់រយលាននាក់ តាមរយៈការផ្សព្វផ្សាយរបស់ស្ថាប័នសារព័ត៌មានជាតិ និងអន្តរជាតិល្បីៗជាច្រើន។ ដូច្នេះការចូលរួមរបស់កម្ពុជា គឺជាការចាប់យកឱកាសបង្ហាញពី វប្បធម៌ដ៏ប្រពៃ និងវិសេសរបស់ខ្មែរទៅកាន់ពិភពលោកតាមរយៈការសម្តែងរបស់សិល្បករ សិល្បការិនី កម្ពុជាក្នុងក្បួនដង្ហែឈីងហ្គេ។ ជាមួយគ្នានោះដែរ យើងនឹងបង្ហាញពីកម្លាំងសាមគ្គីភាព និងសក្តានុពលរបស់កម្ពុជានាពេលអនាគត តាមរយៈការរួបរួមគ្នារបស់យុវជនខ្មែរផងដែរ។

តាមលោក សុខ សប្បាយណា ក្នុងបេសកកម្មនេះ សហភាពសហព័ន្ធយុវជនកម្ពុជា ដឹកនាំប្រតិភូ សិល្បករ សិល្បការិនី ទៅចូលរួមសម្តែង និងការនាំយកវប្បធម៌សិល្បៈដ៏ប្រពៃ និងវិសេស ដែលជាមោទនភាពជាតិ ទៅបង្ហាញលើឆាកអន្តរជាតិ។ លោកអះអាងថា កម្ពុជាក៏ធ្លាប់បានចូលរួមកម្មវិធីនេះផងដែរ កាលពីថ្ងៃទី១០-១១ ខែកុម្ភៈ ឆ្នាំ២០១៧ ដឹកនាំដោយលោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា ហើយគណៈប្រតិភូកម្ពុជា រួមទាំងក្រុមសិល្បករ និងសិល្បការិនី សរុបចំនួន៧៤រូប បានចូលរួម និងសម្តែងនៅសាធារណរដ្ឋសិង្ហបុរី នាពេលនោះ ហើយកម្ពុជាបាននាំនូវយកទស្សនីយភាពសិល្បៈខ្មែរក្រោមប្រធានបទ “សុខដុមក្នុងភាពចម្រុះនៃវប្បធម៌ (Unity in Cultural Diversity)” ដែលរួមបញ្ចូលនូវសិល្បៈ៤ ទម្រង់រួមមាន របាំអប្សរា ក្បាច់គុនល្បុក្កតោ ល្ខោនស្រមោលស្បែកធំ និងកញ្ឆែ ទៅសម្តែងក្នុងក្បួនព្យុហយាត្រាសិល្បៈដ៏សម្បើមនោះ។

សម្រាប់ព្រឹត្តិការណ៍ក្បួនដង្ហែ ឈីងហ្គេ ឆ្នាំ២០១៩ នេះ កម្ពុជាមានកិត្តិយសនឹងនាំយកនូវទស្សនីយភាព សិល្បៈប្រពៃណី និងរបាំសហសម័យ ចំនួន៥ទម្រង់ រួមបញ្ចូលគ្នាក្រោមប្រធានបទ ភាពសុខដុម (HARMONY) ដែលនឹងបង្ហាញនូវភាពសុខដុមរបស់ជាតិសាសន៍ ប្រជាជាតិខ្មែរ តាមរយៈការរួបរួមគ្នា ការពារស្នាដៃដូនតា និងកសាងសមិទ្ធផលនានាបន្ថែម ពីមួយដំណាក់កាលទៅមួយដំណាក់កាល ហើយសិល្បៈ ៥ទម្រង់ ដែលនឹងត្រូវយកទៅសម្តែងរួមមាន ទី១, របាំម្ករ៖ គឺជារបាំដ៏ពិសិដ្ឋអស្ចារ្យ ដែលបង្កើតឡើងដើម្បីជានិមិត្តរូបនៃភាពត្រជាក់ត្រជំ និងជ័យជំនះរបស់កងទ័ពជើងទឹកខ្មែរអំឡុងសម័យអង្គរ។ ម្ករជាប្រភេទសត្វត្រីម្យ៉ាង មានដងខ្លួនដូចជានាគ ដែលនៅក្នុងជំនឿខ្មែរចាត់ទុកអំបូរនាគជាកំណើតដូនតាខ្មែរ។

ទី២, ឈុតព្រះថោងនាងនាគ៖ គឺជានិមិត្តរូបនៃការកសាងវង្សត្រកូល និងប្រទេសជាតិខ្មែរ ដោយការផ្សារភ្ជាប់គ្នារវាង មនុស្សជាតិ ជាតិសាសន៍ ការអនុវត្តនយោបាយដឹកនាំប្រទេស និងជំនឿសាសនាដែលនាំឱ្យមានការរស់នៅជុំគ្នា ប្រកបដោយភាពសុខដុម ក្សេមក្សាន្ដ សុខសន្ដិភាព និងភាពសម្បូរសប្បាយ។ ទី៣, ឈុតកូរសមុទ្រទឹកដោះ៖ គឺបង្ហាញពីការរួមគ្នា សហការគ្នា ចូលរួមយ៉ាងសស្រាក់សស្រាំ និងស្មើភាពគ្នារវាង ទេវតា និងអសុរា ដើម្បីទទួលបាននូវសមិទ្ធផលដែលបម្រើដល់ផលប្រយោជន៍រួម។ ទី៤, របាំក្រមា និងក្បាច់ក្រមានៃគុណល្បុក្កតោ ៖ បង្ហាញពីការអត់ធ្មត់ ខិតខំប្រឹងប្រែង និងរួបរួមគ្នាជាធ្លុងមួយ ស្របជាមួយនឹងភាពរឹងមាំ និងម៉ឺងម៉ាត់នៃគុណល្បុក្កតោ។ទី៥, ក្បាច់ផ្ការំដួល៖ ផ្ការំដួល គឺជាផ្កាអត្តសញ្ញាណជាតិខ្មែរ។ ចាប់តាំងពីសម័យបុរាណកាលមកស្ត្រីខ្មែរត្រូវបានគេប្រៀបប្រដូចទៅនឹងផ្ការំដួល ព្រោះផ្ការំដួលមានក្លិនក្រអូបឈ្ងុយឈ្ងប់ ហើយសាយក្លិនក្រអូបសាយបាន ឆ្ងាយតាមកម្លាំងខ្យល់បក់។ ដូចនេះ របាំផ្ការំដួល នឹងបង្ហាញពីភាពស្រស់ត្រកាល និងការរីកលូតលាស់ដ៏វិសេសវិសាលនៃជាតិសាសន៍ខ្មែរ ដែលល្បីរន្ទឺដល់ពិភពលោក តាមរយៈយុវជនខ្មែរ និងប្រជាជនខ្មែរគ្រប់ៗរូប។

ការចូលរួមក្នុងព្រឹត្តិការណ៍ក្បួនដង្ហែ ឈីងហ្គេ២០១៩នេះ កម្ពុជារំពឹងថា ទី១, ក្រៅពីការសម្តែងសិល្បៈវប្បធម៌ខ្មែរ លើឆាកអន្តរជាតិក្នុងព្រឹត្តិការណ៍ឈីងហ្គេ កម្ពុជាចង់បង្ហាញពីការចូលរួមយ៉ាងសកម្មរបស់យុវជនខ្មែរ ក្នុងការរួបរួមគ្នាថែរក្សាវប្បធម៌ អរិយធម៌ខ្មែរ ដែលដូនតាបន្សល់ទុក ក៏ដូចជាការចូលរួមជំរុញផ្សព្វផ្សាយតាមលទ្ធភាពផ្សេងៗដែលអាចធ្វើបាន។ ទី២, យើងក៏សង្ឃឹមថា គណៈប្រតិភូ សិល្បករ សិល្បការិនី ទាំងអស់ នឹងបង្ហាញពីសក្តានុពលរបស់ខ្លួនក្នុងនាមជាតំណាងយុវជនកម្ពុជា ដែលពោរពេញដោយសមត្ថភាព និងជាអ្នកបន្តវេនដឹកនាំនាវាកម្ពុជាទៅថ្ងៃអនាគត និងទី៣, ការចូលរួមក្នុងព្រឹត្តិការណ៍ ឈីងហ្គេ ក៏ជាឱកាសដែលគណៈប្រតិភូកម្ពុជាទាំងអស់ អាចកសាងទំនាក់ទំនងល្អ ជាមួយមិត្តអន្តរជាតិ ហើយរួមគ្នានាំមកនូវភាពសុខដុមនៃវប្បធម៌ មនុស្សជាតិ និងប្រទេសជាតិ៕