ភ្នំពេញ ៖ នគរបាលចរាចរណ៍ផ្លូវគោករាជធានីភ្នំពេញ នៅថ្ងៃទី២៣ ខែកុម្ភៈ ឆ្នាំ២០១៩ បានបញ្ជូនខ្លួនអ្នកបើករថយន្តក្រឡុកស៊ីម៉ងត៍ ដែលដាច់ហ្វ្រាំង បុករះនៅចំណុចមុខសាលាវិទ្យាល័យបឹងត្របែក បណ្ដាលឲ្យស្លាប់គ្រូបង្រៀនម្នាក់ និងរបួសមនុស្ស៤នាក់ផ្សេងទៀត ទៅឃុំខ្លួនតាមដីកាបង្គាប់ឲ្យឃុំខ្លួនរបស់ចៅក្រមស៊ើបសួរសាលាដំបូងរាជធានីភ្នំពេញ។
សមត្ថកិច្ចនគរបាលចរាចរណ៍បានបញ្ជាក់ថា ព្រះរាជអាជ្ញាអមតុលាការបានសម្រេចចោទប្រកាន់ ឈ្មោះ ព្រំ ប៊ុណ្ណាត ជាអ្នកបើកបររថយន្តក្រឡុកស៊ីម៉ងត៍ ពីបទបើកបរធ្វេសប្រហែស បណ្ដាលឲ្យស្លាប់ និងរបួសអ្នកដទៃ ហើយក្រោយការសាកសួរចប់ ចៅក្រមសម្រេចឃុំខ្លួនជនត្រូវចោទដាក់ពន្ធនាគារជាបណ្ដោះអាសន្នសិន ដើម្បីបើកការស៊ើបសួរនៅពេលក្រោយ។
ករណីរថយន្តក្រឡុកស៊ីម៉ងត៍ដាច់ហ្វ្រាំងបុករះបណ្តាលឲ្យគ្រូបង្រៀនសាលាបឹងត្របែកម្នាក់ស្លាប់ក្រោយពេលបញ្ជូនដល់ពេទ្យ និងរបួស៤នាក់ បានកើតឡើងកាលពីវេលាម៉ោង៨និង០០នាទីព្រឹក ថ្ងៃទី២០ ខែកុម្ភៈ ឆ្នាំ២០១៩ នៅចំណុចមុខវិទ្យាល័យបឹងត្របែក ផ្លូវព្រះមុនីវង្ស សង្កាត់ទន្លេបាសាក់ ខណ្ឌចំការមន រាជធានីភ្នំពេញ។
ជនរងគ្រោះជាគ្រូបង្រៀនសាលាបឹងត្របែកដែល(ស្លាប់)មាន ឈ្មោះ សុខ តែល អាយុ៤០ឆ្នាំ មុខរបរ គ្រូបង្រៀនមុខវិជ្ជាភាសាខ្មែរ។ ចំណែកអ្នករងរបួស៤នាក់ទៀត មិនបានស្គាល់ឈ្មោះនៅឡើយ ត្រូវបានបញ្ជូនទៅសង្គ្រោះនៅមន្ទីរពេទ្យផ្សេងៗគ្នា។
ចំណែកតៃកុងរថយន្តបង្កហេតុ ឈ្មោះ ព្រុំ ប៊ុនណាត អាយុ៤៨ឆ្នាំ មុខរបរបើកបររថយន្ត មានទីលំនៅក្នុងក្រុមហ៊ុន CPAC ភូមិម័ល សង្កាត់ដង្កោ ខណ្ឌដង្កោ ស្រុកកំណើតភូមិអំពិលលើ ឃុំអំពិលលើ ស្រុកកំពង់សៀម ខេត្តកំពង់ចាម។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឃើញរថយន្តក្រឡុកស៊ីម៉ងត៍មួយគ្រឿង បើកបរតាមបណ្ដោយផ្លូវព្រះមុនីវង្ស ទិសដៅពីត្បូងទៅជើង លុះដល់ចំណុចមុខសាលាវិទ្យាល័យបឹងត្របែក ខណៈដែលម៉ូតូជនរងគ្រោះកំពុងឈប់ស្ដុប ក៏ត្រូវរថយន្ដបុករះពីក្រោយពេញមួយទំហឹង បណ្ដាលឲ្យម៉ូតូចំនួន៦គ្រឿង និង រ៉ឺម៉កកង់បី២គ្រឿងរងការខូចខាត មនុស្ស៤នាក់រងរបួស និងគ្រូបង្រៀនម្នាក់ស្លាប់ពេលបញ្ជូនដល់មន្ទីរពេទ្យ។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុឃាត់ខ្លួនតៃកុងរថយន្តយកមកកាន់អធិការដ្ឋាននគរបាលខណ្ឌចំការមន រួចទាក់ទងទៅរថយន្តសាម៉ុយឲ្យមកទទួលយកអ្នករងរបួសទៅសង្គ្រោះភ្លាមៗ និងទាក់ទងទៅសមត្ថកិច្ចជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញចុះមកធ្វើការវាស់វែងអូសរថយន្ដ និងម៉ូតូទៅរក្សាទុក ដើម្បីដោះស្រាយតាមច្បាប់។ ចំណែកអ្នកបើកបររថយន្តបង្កហេតុ ត្រូវបានបញ្ជូនឡើងតុលាការឃុំខ្លួនជាបណ្ដោះអាសន្នសិន៕
Source: Kampuchea Thmey Daily
0 Comments