ឧត្ដរមានជ័យ ៖ នៅថ្ងៃអាទិត្យ ទី២៤ ខែកុម្ភៈ ឆ្នាំ ២០១៩នេះ ឯកឧត្ដម លឹមគាន ហោ រដ្ឋមន្ត្រីក្រសួងធនធានទឹក និងឧតុនិយម បានឲ្យលោក ញឺន គួន ប្រធានមន្ទីរធនធានទឹក និង ឧតុនិយម ខេត្តឧត្ដរមានជ័យ ចុះទៅពិនិត្យជាក់ស្ដែង ដើម្បីឆ្លើយតប ទាន់សភាពការណ៍ ដល់ប្រជាពលរដ្ឋចំនួនបីភូមិ ដែលសុំអំពាវនាវ ទៅដល់ ឯកឧត្ដម លឹម គាន ហោ ជួយកសាងទំនប់បិទទឹកនៅអូរំចេក ក្នុងភូមិរំចេក ឃុំ/ស្រុកអន្លង់វែង ខេត្តឧត្ដរមានជ័យ ដើម្បីប្រើប្រាស់ទៅតាមតម្រូវការ។
លោក ញឺន គួន ប្រធានមន្ទីរធនធានទឹក និងឧតុនិយមខេត្តឧត្ដរមានជ័យ បានឲ្យដឹងថា ដោយសារតែមានការយកចិត្តទុកដាក់ខ្ពស់ អំពីទុក្ខកង្វល់ និងទុក្ខលំបាករបស់ប្រជាពលរដ្ឋជាខ្លាំង ពីសំណាក់ឯកឧត្ដម លឹមគាន ហោ រដ្ឋមន្ត្រីក្រសួងធនធានទឹក និងឧតុនិយម បានបញ្ជារូបលោកចុះទៅពិនិត្យ និងសិក្សាលទ្ធភាព និងរាយការណ៍ទៅថ្នាក់លើ ដើម្បីឆ្លើយតបតម្រូវប្រជាពលរដ្ឋ ទោះជាថ្ងៃអាទិត្យដែលជាថ្ងៃមន្ត្រីរាជការឈប់សម្រាកក៏ដោយ។
លោក ញ៉ឺន គួន បានបញ្ជាក់ថា ប្រជាពលរដ្ឋដែលបានសូមអំពាវនាវទៅដល់ឯកឧត្ដមរដ្ឋមន្ត្រី សូមឲ្យជួយកសាងទំនប់ទឹកនោះ មានចំនួន បីភូមិ ទី១ ភូមិរំចេក ទី២ភូមិរំចេកខាងកើត ទី៣ភូមិរំចេកខាងលិច ដែលមានចំនួនប្រជាពលរដ្ឋសរុបចំនួន៦៣២គ្រួសារ ស្មើនឹង២៨៥៧នាក់។
ប្រជាពលរដ្ឋទាំងបីភូមិខាងលើនេះមានការសប្បាយរីករាយយ៉ាងខ្លាំង នៅពេលពួកគាត់សុំអំពាវនាវ ទៅ ឯកឧត្ដម លឹមគាន ហោ រដ្ឋមន្ត្រីធនធានទឹក និងឧតុនិយម ឲ្យជួយកសាងទំនប់ទឹកដើម្បីបានទឹកប្រើប្រាស់ទៅតាមតម្រូវការជូនដល់ពួកគាត់ ដោយបានឃើញ លោក ញ៉ឺន គួន ប្រធានមន្ទីរធនធានទឹក និងឧតុនិយម ខេត្តឧត្ដរមានជ័យ ចុះសិក្សាលទ្ធភាព និងរាយការណ៍ជូនទៅថ្នាក់លើវិញ ដើម្បីឆ្លើយតបទៅតាមតម្រូវការចាំបាច់របស់ពួកគាត់ដែលខ្វះមិនបាន។
ប្រជាពលរដ្ឋ មានសង្ឃឹមជឿជាក់យ៉ាងមុតមាំថា ឯកឧត្ដម លឹមគាន ហោ នឹងមិនទុកបណ្ដែតបណ្ដោយឲ្យពួកគាត់រងទុក្ខដោយសារតែខ្វះទឹកប្រើប្រាស់តទៅទៀតនោះទេ ក្រោយពីឯកឧត្ដមទានជ្រាបអំពីទុក្ខកង្វល់ និងផលវិបាក របស់ពួកគាត់ហើយនោះ ប្រាកដជាឯកឧត្ដម ឆ្លើយតបទៅតាមតម្រូវការរបស់ពួកគាត់ជាក់ជាមិនខាន៕
Source: Kampuchea Thmey Daily
0 Comments