អ្នកប្រដាល់របស់កម្ពុជា ខេម ចាន់ ក្លិបកងពលតូចទ័ពឆ័ត្រយោង៩១១ នឹងត្រូវជួបប្រកួតជាមួយអ្នកប្រដាល់ថៃក្នុងកម្មវិធីប្រដាល់មិត្តភាពអន្តរជាតិ នៅលើសង្វៀនTV5 ព្រែកកំពឹស នាយប់ថ្ងៃសៅរិ៍ទី១៦កុម្ភៈ ២០១៩នេះ ។
ខេម ចាន់ ដែលជាលើក៦ ក្នុងការជួបប្រកួតជាមួយថៃនេះ ត្រូវគេផ្គូផ្គងអោយជួបប្រកួតជាមួយអ្នកប្រដាល់ថៃឈ្មោះ EATT TA ។ ពីរនាក់នេះ ប្រកួតគ្នាក្នុងប្រភេទទម្ងន់៥៧គីឡូក្រាម។ ខេម ចាន់ ជាអ្នកប្រដាល់ស្រករក្រោយប៉ុណ្ណោះ។
EATT TA នេះ គេមិនធ្លាប់មកប្រកួតនៅស្រុកខ្មែរទេកន្លងមក។ តាមអ្នកដឹកនាំកីឡាករថៃមកប្រកួតឲ្យដឹងនោះថា អ្នកប្រដាល់ថៃរូបនេះ គេមានស្នៀតប្រដាល់ល្អ ការវាយចេញចូលរហ័សលឿន។
អ្នកប្រដាល់ថៃរូបនេះ គេមានប្រវត្តិប្រកួតដល់ទៅ៥៣លើក ក្នុងនោះវាយឈ្នះ៤២លើក ចាញ់១១លើក និងមិនដែលស្មើ។ ចំណែក ខេម ចាន់ គេមានកំនត់ត្រាប្រកួត៦៦លើក គឺឈ្នះ៥១លើក ចាញ់១២លើក និងស្មើ០៣លើក តែគេធ្លាប់វាយដៃគូប្រកួត ឲ្យសន្លប់បាន០៩លើក។
EATT TA មិនដឹងថា អាចយកឈ្នះខេម ចាន់ បានឬអត់នោះទេ ព្រោះថាអ្នកប្រដាល់ស្រករក្រោយរបស់កម្ពុជាខេម ចាន់ នេះ គេមានផ្លែជង្គង់ល្អណាស់ ព្រមទាំងវាយស៊ូថែមទៀត ដូច្នេះហើយមិនមាននរណាហ៊ានវាយតម្លៃ ឬសន្និដ្ឋានមុនថា ខេម ចាន់ ចាញ់ EATT TA នេះឡើយ។ ខេម ចាន់ ប្រកួតចុងក្រោយនេះ គេបានវាយឈ្នះអ្នកប្រដាល់រួមជាតិ លីន វិរៈ ក្លិបបូរីរាជសីហ៍មានរិទ្ធដោយពិន្ទុ។
ទោះជាយ៉ាងណា ខេម ចាន់ មិនអាចមើលស្រាល EATT TA បានទេ។ តែយ៉ាងណា EATT TA ក៏មិនជាស្រួលខ្លួនប៉ុន្មានដែរ ព្រោះខេម ចាន់ ថ្វីត្បិតតែគេឡើងប្រកួតជាលក្ខណៈអន្តរជាតិទើបបាន៦លើកក្តី ក៏វាយខ្លាំង និងមានបច្ចេកទេសក្នុងការប្រកួតល្អដែរ។ ហើយមួយទៀត គេវាយរហ័ស ដករហ័ស ចេញចូលលឿនថែមទៀត។ ចាំមើល រវាងខេម ចាន់ និង EATT TA តើអ្នកណាជាអ្នកឈ្នះ សម្រាប់ការជួបគ្នាលើកដំបូងនេះ?។
ចំពោះអ្នកប្រដាល់វ័យក្មេងកម្ពុជា ថូ សុធៀប ក្លិបខេត្តបន្ទាយមានជ័យ នឹងត្រូវជួបប្រកួតលក្ខណៈ
មិត្តភាពដកស្រង់បច្ចេកទេស ជាមួយអ្នកប្រដាល់វ័យក្មេងថៃ Keang Kai ក្នុងទម្ងន់៤៨គីឡូក្រាម។
ឯការប្រកួតរវាងអ្នកប្រដាល់រួមជាតិវិញ វង្ស វិឆ័យ អ្នកប្រដាល់ក្លិបកងពលតូចទ័ពពិសេសឆ័ត្រយោង៩១១ ត្រូវគេផ្គូឲ្យជួបប្រកួតជាមួយ យ៉ាម ខេមរា អ្នកប្រដាល់ក្លិបរស្មី កុមារកំព្រា។ ពីរនាក់នេះ នឹងជួបប្រកួតគ្នាក្នុងប្រភេទទម្ងន់៦៩គីឡូក្រាម។
វង្ស វិឆ័យ បានវាយឈ្នះ ខាំ ផានី ក្លិបរ៉ាហាប់ស្វាយប៉ាក ដោយពិន្ទុ កាលពី ថ្ងៃទី០៩កុម្ភៈកន្លងមកនេះ។ វង្ស វិឆ័យ ជាអ្នកប្រដាល់ស្រករក្រោយ ដែលសព្វថ្ងៃកេរ្តិ៍ឈ្មោះរបស់គេកំពុងត្រូវបានគេចាប់អារម្មណ៍គួរសមដែរ។ វិឆ័យ មានកាយសម្បទារឹងមាំ វាយខ្លាំង ហើយវាយមិនចេះខ្លាចគូប្រកួតនោះទេ។ ពោលគឺ វិឆ័យវាយសម្រុកចូលដោយមិនញញើត ជាមួយនឹងកណ្ដាប់ដៃខ្លាំង សន្ទុះទាត់ក៏ខ្លាំង ជង្គង់កែងក៏ល្អថែមទៀត។ ដូច្នេះហើយ ទើបគេ ផ្គូឲ្យជួបជាមួយ យ៉ាម ខេមរា ដែលជាជើងខ្លាំងម្នាក់ដែរនោះ។
យ៉ាម ខេមរា គេក៏ជាអ្នកប្រដាល់ជើងខ្លាំងស្រករក្រោយដែរ ហើយអ្នកប្រដាល់រូបនេះ ក៏វាយខ្លាំងមិនចាញ់វង្ស វិឆ័យ ប៉ុន្មានដែរ។ អ្នកប្រដាល់រូបនេះ ក៏វាយសម្រុកមិនចេះខ្លាចគូប្រកួតដែរ។
យ៉ាងណា សម្រាប់ការប្រកួតនេះ គេមិនអាចទាយមុនថា វង្ស វិឆ័យ ឈ្នះ ឬ យ៉ាម ខេមរាឈ្នះនោះឡើយ។ ការប្រកួតចុងក្រោយរបស់យ៉ាម ខេមរា គឺចាញ់អ្នកប្រដាល់អ៊ីរ៉ង់ ក្នុងទឹកទី៤ ឯការប្រកួតចុងក្រោយរបស់វង្ស វិឆ័យ គឺវាយឈ្នះ ខាំ ផានី ក្លិបរ៉ាហាប់ស្វាយប៉ាកដោយពិន្ទុ។
សេក គឹមសាន្ត អ្នកប្រដាល់ក្លិបអង្គរមានជ័យខេត្តសៀមរាប នឹងជួបប្រកួតជាមួយខាំ សុរិយា អ្នកប្រដាល់ក្លិបរ៉ាហាប់ស្វាយប៉ាក ដោយជួបគ្នាក្នុងទម្ងន់៥៧គីឡូក្រាម។
ពីរនាក់មិនធ្លាប់ជួបគ្នាទេពីមុនមក។ ចាំមើល ការជួបគ្នាជាលើកដំបូងនេះ តើសេក គឹមសាន្ត ឬមួយក៏ខាំ សុរិយា ឈ្នះនោះ?៕
Source: Kampuchea Thmey Daily
0 Comments