ប្រដាល់ ៖ អ្នកប្រដាល់ជើងខ្លាំង ផល សោភ័ណ្ឌ ក្លិបតាឡីដំរីមានរិទ្ធ បានយកឈ្នះអ្នកប្រដាល់ជើងខ្លាំងថៃ រិទ្ធ ធីយ៉ារ៉ា(Rithiara)ត្រឹមពិន្ទុ ខណៈដែល ខាំ ផាន្នី អ្នកប្រដាល់ក្លិបរស្មីភូមិគាប ខេត្តបន្ទាយមានជ័យ ផ្ដួលអ្នកប្រដាល់ថៃផេតស្រ៊ីគៀវ(Petchsrikiw) ក្នុងទឹកទី៣ ក្នុងការជួបប្រកួតគ្នាយប់ ថ្ងៃទី២៤ ខែកុម្ភៈ ឆ្នាំ២០១៩ នៅលើសង្វៀនគូបូតាបាយ័នស្ទឹងមានជ័យ។
រិទ្ធ ធីយ៉ារ៉ា ដែលមុននេះ គេមានឈ្មោះថា WiFi ធ្លាប់វាយចាញ់ ផល សោភ័ណ្ឌ ម្តងរួចមកហើយកាលពីជាង១ឆ្នាំមុន ហើយពេលនេះ គេនៅតែមិនយកឈ្នះ ឬសងសឹក ផល សោភ័ណ្ឌ បាន។
អ្នកប្រដាល់ថៃ ដែលមានប្រវត្តិប្រកួត១០៣លើកនោះ គេដើរចូលទៅវាយ សោភ៏ណ្ឌ ជានិច្ច ប៉ុន្តែពុំអាចយកឈ្នះ សោភ័ណ្ឌ បាន។ ផល សោភ័ណ្ឌ បានវាយត្រូវ រិទ្ធ ធីយ៉ារ៉ា ច្រើនដៃណាស់ តែមិនអាចផ្ដួលអ្នកប្រដាល់ ថៃរូវ នេះឲ្យដួលមុនទឹក៥បាន។ ពួកគេទាំងពីរ ប្រកួតគ្នាក្នុងទម្ងន់៦៥ គីឡូក្រាម។
អ្នកប្រដាល់ជើងចាស់ រិទ្ធ ធីយ៉ារ៉ា នេះ ក៏ធ្លាប់វាយចាញ់ ចាន់ រតនា ក្លិបខ្លាហោះម្តងដែរ កាលពីជាងមួយឆ្នាំមុន នៅសង្វៀនបាយ័ននេះ។ រិទ្ធ ធីយ៉ារ៉ា នេះ គេមានកំណត់ត្រាប្រកួតចំនួន១០៣លើក ក្នុងឈ្នះ៨៨លើក ចាញ់២២លើក និងស្មើ០៣លើក ហើយគេធ្លាប់ផ្ដួលដៃគូប្រកួតឲ្យសន្លប់បានចំនួន១៥លើក។
ចំពោះ ខាំ ផាន្នី អ្នកប្រដាល់ក្លិបរស្មីភូមិគាបខេត្តបន្ទាយមានជ័យវិញ បានផ្ដួលអ្នកប្រដាល់ថៃ ផេត ស្រ៊ីគៀវ ឲ្យសន្លប់ក្នុងទឹកទី៣ ដោយវាយកែងចំថ្គាមប្រមាណ២កែងផ្ទួនៗ បណ្តាលឲ្យអ្នកប្រដាល់ថៃរូបនេះ ដួលសន្លប់លែងក្រោកតែម្តង។
ដោយឡែក ក្នុងការប្រកួតរវាងអ្នកប្រដាល់រួមជាតិវិញ មាឃ សុវណ្ណារ៉ា អ្នកប្រដាល់ក្លិបរាជសីហ៍ខេត្តរតនគិរី បានប្រកួតស្មើពិន្ទុជាមួយ កំពែង ខ្មៅ អ្នកប្រដាល់សមាគមកីឡាប្រដាល់ក្រសួងកសិកម្ម។
•ម៉ន ព្រហ្មម៉ាញ ឈ្នះរង្វាន់ប្រាក់លានបាយ័ន ក្នុងទម្ងន់៦៥គ.ក្រ
ម៉ន ព្រហ្មម៉ាញ អ្នកប្រដាល់ក្លិបការិយាល័យទី៥ កងទ័ពជើងគោក បានក្លាយជាម្ចាស់ពានរង្វាន់ប្រាក់លានបាយ័នទម្ងន់៦៥គ.ក្រ ក្រោយពីគេបានវាយឈ្នះដៃគូប្រកួតក្នុងវគ្គផ្ដាច់ព្រ័ត្រនោះ។ អ្នកប្រដាល់ចំនួន៤រូប បានជួបគ្នាដើម្បីប្រកួតដណ្តើមយកពានរង្វាន់ប្រាក់លានរបស់ស្ថានីយទូរទស្សន៍បាយ័ន កាលពីល្ងាចថ្ងៃទី២៣ ខែកុម្ភៈ ឆ្នាំ២០១៩។
អ្នកខ្លាំងទាំង៤រូបនោះ គឺ ម៉ន ព្រហ្មម៉ាញ អ្នកប្រដាល់ក្លិបការិយាល័យទី៥ កងទ័ពជើងគោក , យ៉ុន ដារ័ត្ន អ្នកប្រដាល់ក្លិបតាឡីដំរីមានរិទ្ធ ,សឿន ឆ្នើម អ្នកប្រដាល់ក្លិបកងពលតូចទ័ពឆ័ត្រយោង៩១១ និង ធា នុរាជ អ្នកប្រដាល់ក្លិបមកុដរាជសីហ៍។
ក្នុងការប្រកួតជម្រុះដែលធ្វើឡើងម្តងពីរគូនោះ ម៉ន ព្រហ្មម៉ាញ គេវាយឈ្នះ យ៉ុន ដារ័ត្ន អ្នកប្រដាល់ក្លិបតាឡីដំរីមានរិទ្ធ ដោយពិន្ទុ ឯ សឿន ឆ្នើម អ្នកប្រដាល់ក្លិបកងពលតូចទ័ពឆ័ត្រយោង៩១១ គេបានផ្ដួល ធា នុរាជ អ្នកប្រដាល់ក្លិបមកុដរាជសីហ៍ក្នុងទឹកទី៣។
ម៉ន ព្រហ្មម៉ាញ និង សឿន ឆ្នើម ពួកគេទាំងពីរបានមកជួបគ្នាក្នុងវគ្គផ្ដាច់ព្រ័ត្រ ដែលក្នុងការប្រកួត ម៉ន ព្រហ្មម៉ាញ គេឈ្នះ សឿន ឆ្នើម ដោយពិន្ទុ ហើយទទួលបានរង្វាន់ ប្រាក់លាន។
ដោយឡែក សម្រាប់ការប្រកួតគូឯកវិញនោះ គឺនួន រ៉ាថេប អ្នកប្រដាល់ក្លិបតាឯកដំបងដែកមានរិទ្ធខេត្តព្រៃវែង បានប្រកួតឈ្នះ សំខាន់ ប៉ាវចិន អ្នកប្រដាល់ក្លិបរ៉ាហាប់ស្វាយប៉ាកដោយពិន្ទុ។ ពួកគេទាំងពីរនេះ ប្រកួតគ្នាក្នុងទម្ងន់៦៣,៥០០គីឡូក្រាម។
បាង កានិត អ្នកប្រដាល់ក្លិបអាណាចក្រគុនខ្មែរ វាយស្មើពិន្ទុ ជាមួយ ភ័ណ្ឌ ពុទ្ធា អ្នកប្រដាល់ក្លិបកុលបុត្រគុនខ្មែរក្នុងទម្ងន់៥៧គីឡូក្រាម ហើយ ចាន់ នាង អ្នកប្រដាល់ក្លិបនិរោធមានជ័យ បានផ្ដួល ធន អៀងឡេង អ្នកប្រដាល់ក្លិបមជ្ឈមណ្ឌលកីឡាខ.ភ.ម ក្នុងទឹកទី៣ ក្នុងទម្ងន់៥៤គីឡូក្រាម៕
Source: Kampuchea Thmey Daily
0 Comments