មេធាវីយូរអង្វែងរបស់លោក Donald Trump គឺលោក Michael Cohen បានចង្អុលដាក់អតីតមេរបស់លោកនៅក្នុងការបង្ហាញខ្លួនក្នុងសភាកាលពីថ្ងៃពុធដោយហៅប្រធានាធិបតីអាមេរិកថាជាជនឆបោកនិងជាមនុស្សកុហកបោកប្រាស់ដែលបានធ្វើសកម្មភាពខុសឆ្គងខណៈពេលកំពុងកាន់តំណែង។
លោក Cohen បានប្រាប់គណកម្មាធិការត្រួតពិនិត្យសភាថា កាលពីឆ្នាំមុន លោក Trump បានបញ្ជាគាត់ឲ្យនិយាយកុហកអំពីការបង់ប្រាក់បំបិទមាត់ដែលផ្តល់ទៅឲ្យតារាសិចម្នាក់ដើម្បីបិទបាំងការអះអាងរបស់នាងអំពីទំនាក់ទំនងជាមួយលោក Trump។
លោកបាននិយាយថា លោក Trump បានដឹងជាមុននៅពាក់កណ្តាលឆ្នាំ២០១៦ថា គេហទំព័រ WikiLeaks នឹងចេញផ្សាយសារអេឡិចត្រូនិកដែលលួចបានពីយុទ្ធនាការរបស់លោកស្រី Hillary Clinton ដោយរុស្ស៊ី។
ហើយលោក Cohen បានអះអាងថា មេធាវីផ្ទាល់ខ្លួនរបស់លោក Trump និងគ្រួសាររបស់គាត់បានពិនិត្យមើលឡើងវិញហើយកែតម្រូវនូវសក្ខីកម្មជាលាយលក្ខណ៍អងក្សររបស់គាត់ទៅសភានៅឆ្នាំ២០១៧ដែលក្នុងនោះគាត់បាននិយាយកុហកអំពីកិច្ចព្រមព្រៀងអចលនទ្រព្យជាមួយទីក្រុងមូស្គូដែលត្រូវបានចរចារតាមរយៈការបោះឆ្នោតប្រធានាធិបតីឆ្នាំ២០១៦។
ប៉ុន្តែការផ្តល់សក្ខីកម្មរយៈពេលប្រាំម៉ោងរបស់លោក Cohen មិនបានបង្កើតភស្តុតាងថ្មីដែលថា លោក Trump ឬយុទ្ធនាការរបស់គាត់បានឃុបឃិតជាមួយរុស្ស៊ីក្នុងអំឡុងការបោះឆ្នោតឬភស្តុតាងនៃបទឧក្រិដ្ឋហិរញ្ញវត្ថុដោយលោកប្រធានាធិបតីនិងអង្គការ Trump របស់គាត់ទេ។
លោក Cohen បានប្រាប់សវនាការផ្សាយតាមទូរទស្សន៍ទូទាំងប្រទេសថា “ថ្ងៃនេះខ្ញុំមកទីនេះដើម្បីប្រាប់ការពិតអំពីលោក Trump ”។ លោក Cohen បាននិយាយថា “គាត់គឺជាអ្នករើសអើងពូជសាសន៍។ គាត់ជាអ្នកឆបោកហើយគាត់គឺជាអ្នកក្លែងបន្លំ”។
គួរបញ្ជាក់ថា លោក Cohen ត្រូវបានកាត់ទោសឲ្យជាប់ពន្ធនាគាររយៈពេល៣ឆ្នាំពីបទបង់ប្រាក់បំបិទមាត់និងការកុហករបស់គាត់ចំពោះសភាក៏ដូចជាការគេចវេសពន្ធផងដែរ។
ទោះបីជាយ៉ាងណាក៏ដោយ លោកបានអះអាងថា ការចោទប្រកាន់ពីបទបង់ប្រាក់បំបិទមាត់និងការកុហកចំពោះសភាគឺដើម្បីការពារលោក Trump៕ AFP
Source: Kampuchea Thmey Daily
0 Comments