ប្រកួតប្រចាំពូល H នៃវគ្គជម្រុះពានរង្វាន់យុវជនក្រោមអាយុ២៣ឆ្នាំជើងឯកទ្វីបអាស៊ី AFC U23 Championship 2020 បានបញ្ចប់រួចរាល់ហើយ ខណៈប្រកួតបិទពូលនេះក្រុមយុវជនក្រោមអាយុ២៣ឆ្នាំរបស់កម្ពុជា បានប្រកួតស្មើគ្នាជាមួយក្រុមតៃវ៉ាន់ (ឆាយនីសតៃប៉ិ) ដោយលទ្ធផល១ទល់១ នៅល្ងាចថ្ងៃអង្គារ ទី២៦ ខែមីនា ឆ្នាំ២០១៩ លើទីលានពហុកីឡដ្ឋានជាតិ។
ការប្រកួតក្រោមការកាត់សេចក្តីពីសំណាក់លោកអាជ្ញាកណ្ដាលជនជាតិអារ៉ាប់ប៊ីសាអូឌីត Mohammed Al-Hoish ដែលមានទស្សនិកជនចូលទស្សនាផ្ទាល់ប្រមាណជា១,៦៦២នាក់ កីឡាករ ស៊ិន កក្កដា របស់កម្ពុជាបានរកគ្រាប់បាល់នាំមុខ១គ្រាប់នៅនាទីទី៤០ មុនចប់តង់ទី១ ខណៈនៅដើមតង់ទី២ពោលគឺនៅនាទី៥៧ កីឡាករ Ponder បានរកគ្រាប់បាល់តាមស្មើវិញ។ លទ្ធផល១ទល់១ នេះបានរក្សារហូតដល់ចប់ការប្រកួត។
លោកCanhun Von គ្រូបង្វឹករបស់ក្រុមតៃវ៉ាន់ បានលើកឡើងក្រោយចប់ការប្រកួតនេះថា «ពិតណាស់ យើងបាននិយាយតាំងពីដើមមក យើងព្យាយាមក្នុងការប្រកួតនេះគឺដើម្បីឈ្នះ ប៉ុន្តែលទ្ធផលមិនដូចអ្វីដែលយើងចង់បាន ប៉ុន្តែខ្ញុំគិតថាយើងបានព្យាយាមបង្ហាញថា យើងនៅតែប្រឹងប្រែងរហូតដល់ទីបញ្ចប់ ដូច្នេះមិនមានការស្ដាយក្រោយឡើយ ហើយខ្ញុំគិតថាសម្រាប់បាល់ទាត់ប្រចាំតំបន់មួយនេះនឹងនាំឲ្យទស្សនិកជនរីករាយក្នុងការទស្សនា»។ លោកពិតជារីករាយជាមួយនឹងទម្រង់លេងរបស់កូនក្រុម បើទោះបីជាលទ្ធផលពុំសូវល្អក៏ដោយ និងពិតជាយុត្តិធម៌សម្រាប់ក្រុមទាំងពីរ។
ចំណែកលោក Felix Dalmas គ្រូបង្វឹករបស់ក្រុមកម្ពុជា វិញបានលើកឡើងថា «វាគឺប្រសើរ ប៉ុន្តែខ្ញុំពិតជាជឿជាក់ថា ប្រភេទនៃបាល់ទាត់ដែលយើងចង់លេង វាមិនងាយស្រួលនោះទេ វាត្រូវការភាពក្លាហាន វាត្រូវការឆន្ទៈ ត្រូវការការគិត ត្រូវការជំនាញ និងវាត្រូវការពេលវេលា ប៉ុន្តែយើងជឿជាក់ថា នេះគឺវាជាដំណើរដែលបោះជំហានទៅមុខ ហើយវាចាប់ផ្ដើមជាមួយអ្នកគាំទ្រ កីឡាករ ភាពជឿជាក់ និងព្យាយាម។»
ដៃស្តាំរបស់ Honda Keisuke «ថ្ងៃនេះយើងមានប្រព័ន្ធចំនួន ២នៅលើទីលាន ខ្ញុំជឿជាក់សម្រាប់ការប្រកួត យើងអាចគ្រប់គ្រងបាន និងធ្វើរឿងល្អៗបាន តែទោះបីជាយ៉ាងណា យើងមិនអាចធ្វើបាននូវការគ្រប់គ្រងមកវិញ ដែលនេះគឺជាជំហានបន្ទាប់របស់យើងដើម្បីរកភាពរីកចម្រើន ទាំងជាក្រុម និងទាំងសមត្ថភាពផ្ទាល់ខ្លួនរបស់កីឡាករ»។
សូមបញ្ជាក់ថា ក្រុមកម្ពុជា ទទួលធ្វើជាម្ចាស់ផ្ទះក្នុងពូល H ជាមួយយុវជន U-23 អូស្ត្រាលី, កូរ៉េខាងត្បូង និង ឆាយនីសតៃប៉ិ (តៃវ៉ាន់) ដោយការប្រកួតនឹងចាប់ផ្តើមពីថ្ងៃទី ២២ ខែ មិនា ឆ្នាំ ២០១៩ ខាងមុខ។ កាលពីឆ្នាំ ២០១៧ កន្លងទៅកម្ពុជា ធ្លាប់បានទទួលធ្វើម្ចាស់ផ្ទះវគ្គជម្រុះពានរង្វាន់ AFC U-23 នេះម្តងហើយ ដោយកាលនោះជួបជាមួយ ចិន, ជប៉ុន និង ហ្វីលីពីន តែមិនមានឱកាសឆ្លងផុតវគ្គនេះឡើយ។
សរុបចំណាត់ថ្នាក់ដែលប្រកួតកន្លងមកឃើញថាថ្ងៃដំបូងក្រុមកូរ៉េខាងត្បូង ឈ្នះតៃវ៉ាន់ ៨ទល់០ ហើយអូស្ត្រាលី ឈ្នះកម្ពុជា ៦ទល់០ ថ្ងៃទី២ តៃវ៉ាន់ ចាញ់អូស្ត្រាលី ៦ទល់០ ហើយកម្ពុជា ចាញ់កូរ៉េខាងត្បូង ៦ទល់១ និងថ្ងៃចុងក្រោយអូស្ត្រាលី ស្មើគ្នាជាមួយកូរ៉េខាងត្បូង ២ទល់២ ខណៈកម្ពុជាស្មើគ្នាជាមួយតៃវ៉ាន់ ១ទល់១។ សរុបចំណាត់ថ្នាក់វិញក្រុមកូរ៉េខាងត្បូង ឈរលេខ១មាន៦ពិន្ទុ តែឈ្នះគ្រាប់បាល់ក្រុមចំណាត់ថ្នាក់ទី២កូរ៉េខាងត្បូង ដែលមាន៦ពិន្ទុដូចគ្នា ហើយកម្ពុជា ឈរលេខ៣មាន១ពិន្ទុ ស្មើនឹងក្រុមបាតតារាងតៃវ៉ាន់តែខុសគ្រាប់បាល់ផលសង។ ជារួមក្រុមកូរ៉េខាងត្បូង និងអូស្ត្រាលី ដឹកដៃគ្នាទៅវគ្គបន្ទាប់ដែលធ្វើឡើងនៅប្រទេសថៃដើមខែឆ្នាំ២០២០ខាងមុខ៕
Source: Kampuchea Thmey Daily
0 Comments