ភ្នំពេញ ៖ បុរសវ័យចំណាស់ម្នាក់ បានចាប់រំលោភសេពសន្ថវៈមកលើកូនស្រីចិញ្ចឹមរបស់ខ្លួនជាញឹកញយដោយគំរាមសម្លាប់ ចុងក្រោយនាងបានប្រាប់ម្តាយ ហើយម្តាយរបស់នាងក៏បានទៅប្តឹងសមត្ថកិច្ចប៉ូលិសមូលដ្ឋានមកចាប់ខ្លួនចាត់ការតាមច្បាប់។
ហេតុការណ៍ស្មោកគ្រោកនេះ បានកើតឡើងចុងក្រោយ កាលពីយប់ថ្ងៃទី២៦ ខែមីនាឆ្នាំ២០១៩ នៅភូមិសំរោង សង្កាត់ឃ្មួញ ខណ្ឌសែនសុខ រាជធានីភ្នំពេញ។
ឪពុកដែលរងការចោទប្រកាន់ក្នុងការរំលោភលើកូនខ្លួនឯងខាងលើ ឈ្មោះ ភា សាម៉ុន ហៅម៉ុន អាយុ៤៨ឆ្នាំ មានទីលំនៅភូមិសំរោង សង្កាត់ឃ្មួញ ខណ្ឌសែនសុខ រស់នៅជាមួយប្រពន្ធកូន។
ប៉ូលិសនិយាយថា តាមចម្លើយសាកសួរ មុនកើតហេតុកាលពីអំឡុងឆ្នាំ២០០២ ជនសង្ស័យឈ្មោះ ភា សាម៉ុន និងប្រពន្ធឈ្មោះ ឡាយ សារ៉ុម បានទៅសុំកូនក្មេងស្រី(ទារិកា)ពីគេយកមកចិញ្ចឹមដោយទៅសុំអាជ្ញាធរចុះបញ្ជីកំណើតធ្វើជាកូនបង្កើតរបស់ពួកខ្លួន ដោយដាក់ឈ្មោះ ភា យ៉ាយ៉ា។
នៅពេលកូនស្រីនោះពេញវ័យមានអាយុ១៦ឆ្នាំ នៅថ្ងៃមួយក្នុងអំឡុងឆ្នាំ២០១៨ ឈ្មោះ ភា សាម៉ុន ជាឪពុកនាំនាងទៅនេសាទត្រីនៅទំនប់កប់ស្រូវ ឆ្លៀតឱកាសស្ងាត់ល្អ បុរសជាឪពុកបានចាប់នាងរំលោភបានសម្រេច ដោយគំរាមសម្លាប់នាងបើសិនជាហ៊ាននិយាយរឿងរំលោភនេះទៅប្រាប់អ្នកណាម្នាក់នោះ។
តាមការផ្តល់ចម្លើយរបស់នាងបានបញ្ជាក់ថា ក្រោយមកឪពុកចិញ្ចឹមរបស់នាងបានចាប់នាងរំលោភជាច្រើនដង ជូននៅពេលយប់ជូននៅពេលម្តាយនាងមិននៅផ្ទះ។
នៅថ្ងៃចុងក្រោយគឺថ្ងៃទី២៦ ខែមីនា ឆ្នាំ២០១៩ វេលាម៉ោង៧កន្លះព្រឹកឪពុករបស់នាងបានមកចាប់នាងរំលោភនៅលើផ្ទះ ខណៈដែលនាងកំពុងដេកមើលទូរទស្សន៍ ហើយម្តាយនាងមិននៅផ្ទះទៅផ្សារ។ នៅក្នុងពេលចាប់រំលោភនោះបុរសជាឪពុកបានគំរាមសម្លាប់នាងបើហ៊ានតែស្រែកឲ្យគេដឹង នៅគ្រានោះនាងក៏បានខាំដៃរបស់ឪពុកយ៉ាងខ្លាំង ទើបរើបម្រាស់រួចរត់ចេញទៅក្រៅផ្ទះគេចខ្លួនពីការចាប់រំលោភនេះបានសម្រេចម្តង។ នៅវេលាយប់ថ្ងៃដដែលនោះ ខណៈដែលបុរសជាឪពុកនាងមិននៅផ្ទះ នាងក៏បាននិយាយដំណើររឿងនេះប្រាប់ម្តាយតាំងពីដើមរហូតដល់ចប់ធ្វើឲ្យម្តាយឈឺចាប់ជំនួសនាងពន់ពេក។
នៅព្រឹកស្អែកឡើង ថ្ងៃទី២៧ ស្ត្រីឈ្មោះ ឡាយ សារ៉ុម ជាម្តាយចិញ្ចឹម ក៏បានដឹកដៃកូនស្រីទៅប៉ុស្តិ៍ប៉ូលិសដាក់ពាក្យប្តឹងភ្លាមៗនោះ ប៉ូលិសក៏បានតាមចាប់ខ្លួនបុរសជាឪពុកយកមកសួរនាំនិងកសាងសំណុំរឿងបញ្ជូនទៅតុលាការផ្តន្ទាទោសតាមច្បាប់៕
Source: Kampuchea Thmey Daily
0 Comments