រតនគិរី ៖ បុរសវ័យចំណាស់ម្នាក់ បានរងរបួសធ្ងន់ធ្ងរ បន្ទាប់ពីផ្ទុះគ្រាប់កាំភ្លើងមួយគ្រាប់ត្រូវត្រង់ភ្លៅខាងស្តាំធ្លាយមកម្ខាង។
ហេតុការណ៍រាលកៃកាំភ្លើងនេះ បានកើតឡើងកាលពីវេលាម៉ោង១០និង០០នាទីយប់ ថ្ងៃពុធ ៦រោច ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៦ ខែមីនា ឆ្នាំ២០១៩ នៅចំណុចផ្ទះជនរងគ្រោះ ស្ថិតក្នុងភូមិកែងសាន់ ឃុំសេដា ស្រុកលំផាត់។
មន្ត្រីនគរបាលស្រុកលំផាត់បានបញ្ជាក់ថា ជនរងគ្រោះឈ្មោះ ញ៉ អង្គួត ភេទប្រុស អាយុ៦៥ឆ្នាំ ជនជាតិទំពួន មុខរបរជាមេភូមិ មានទីលំនៅភូមិ/ឃុំកើតហេតុខាងលើ។
ជនសង្ស័យឈ្មោះ អង្គួត និច ភេទប្រុស អាយុ១៥ឆ្នាំ ជនជាតិទំពួន រស់នៅជាមួយគ្នា(ត្រូវជាកូន)។ មន្ត្រីនគរបាលបានបន្តថា មុនពេលកើតហេតុ នៅវេលាម៉ោង១០និង០០នាទីយប់ ថ្ងៃខែដដែលនេះ ខណៈពេលដែលជនរងគ្រោះកំពុងតែដេកលើគ្រែនៅលើផ្ទះ ហើយឈ្មោះ អង្គួត និច ត្រូវជាកូនបង្កើតរបស់ជនរងគ្រោះបានមកពីឆ្លុះសត្វវិញ ហើយរើសបានកាំភ្លើងម៉ាកAK47ស្វាយតមួយដើម គ្មានលេខ។ ពេលមកដល់ផ្ទះក៏បានដោះមើលនៅខាងក្រោមផ្ទះ ក៏រាលកៃត្រូវឪពុកដែលកំពុងដេកនៅលើផ្ទះតែម្ដង។
ក្រោយពីត្រូវរបួសកម្លាំងសមត្ថកិច្ចមូលដ្ឋានបានដឹកបញ្ជូនជនរងគ្រោះទៅសង្គ្រោះនៅប្រទេសវៀតណាមភ្លាមៗផងដែរ។
បច្ចុប្បន្នកម្លាំងអធិការដ្ឋាននគរបាលស្រុកលំផាត់ និងកម្លាំងប៉ុស្តិ៍រដ្ឋបាលឃុំសេដា បានធ្វើការឃាត់ខ្លួនកូនប្រុសជនរងគ្រោះដើម្បីស៊ើបអង្កេតនិងស្រាវជ្រាវទៅតាមនីតិវិធី៕
Source: Kampuchea Thmey Daily
0 Comments