ភ្នំពេញ ៖ លោកស្រី ទួត បញ្ញា អនុរដ្ឋលេខាធិការក្រសួងការបរទេស និងសហប្រតិបត្តិការអន្តរជាតិបានថ្លែងថា គ្រាន់តែខេត្តយូណានមួយរបស់ចិន មានគម្រោងវិនិយោគចំនួន២៥ ដែលមានទឹកប្រាក់ជិត២ពាន់លានដុល្លារនៅកម្ពុជា ពីព្រោះខេត្តយូណាន ជាខេត្តដែលមានការរីកចម្រើនយ៉ាងខ្លាំងលំដាប់ទី៣របស់ចិន ដែល GDP មានរហូតដល់៨.៩ ភាគរយ ហើយខេត្តយូណានកំពុងតែប្រឹងប្រែងឲ្យរីកចម្រើនបន្ថែមទៀត ស្របតាមផែនការរដ្ឋ ដែលដាក់ចេញដោយលោកប្រធានាធិបតី ស៊ីជីនពីង ដែលបានកំណត់ឲ្យឆ្នាំ២០២០ នឹងកាត់បន្ថយភាពក្រីក្រឲ្យនៅសូន្យភាគរយ។
មន្ត្រីជាន់ខ្ពស់ក្រសួងការបរទេសបានអះអាងបែបនេះ បន្ទាប់ពីជំនួបពិភាក្សា រវាងលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា ជាមួយលោក ឈិន ហាវ លេខាបក្សកុម្មុយនីស្តខេត្តយូណាន នៃសាធារណរដ្ឋប្រជាមានិតចិន កាលពីព្រឹកថ្ងៃទី២៧ ខែមីនា ឆ្នាំ២០១៩។
នៅក្នុងជំនួបពិភាក្សានោះ លោកឧបនាយករដ្ឋមន្ត្រី ប្រាក់ សុខុន បានសម្ដែងការស្វាគមន៍ចំពោះដំណើរទស្សនកិច្ចរបស់ប្រតិភូលេខាបក្សកុម្មុយនីស្តខេត្តយូណាន នៃសាធារណរដ្ឋប្រជាមានិតចិន ហើយលោកបានវាយតម្លៃខ្ពស់ចំពោះដំណើរទស្សនកិច្ចរបស់គណៈប្រតិភូ ទៅកាន់ខេត្តសៀមរាប និងបានចាត់ទុកថាដំណើរទស្សនកិច្ចនោះ ទទួលបានជោគជ័យយ៉ាងល្អប្រសើរ។ ជាមួយនោះលោកឧបនាយករដ្ឋមន្ត្រី ក៏បានសំដែងការអបអរសាទរចំពោះការរីកចម្រើនផ្នែកសេដ្ឋកិច្ច នៅខេត្តយូណាននៃសាធារណរដ្ឋប្រជាមានិតចិន ដែលមានជិត៩ភាគរយ និងមានផ្ទៃដីធំជាងប្រទេសកម្ពុជាពី២ដង ហើយមានប្រជាពលរដ្ឋរស់នៅរហូតជាងបីដងនៃប្រជាជនកម្ពុជា។
ជាមួយគ្នានោះ លោកឧបនាយករដ្ឋមន្ត្រី ក៏សម្ដែងក្តីរីករាយនៅពេល ដែលឃើញទំនាក់ទំនងរវាងខេត្តយូណាន ក៏ដូចជាសាធារណរដ្ឋប្រជាមានិតចិន ជាមួយប្រទេសកម្ពុជា មានការរីកចម្រើនកាន់តែខ្លាំងក្លាថែមទៀត ហើយរហូតមកដល់ពេលនេះ ឈរនៅលំដាប់នៃទំនាក់ទំនងយូរអង្វែង ក៏ដូចជាស្ថិតក្នុងភាពជាមិត្តជិតស្និទ្ធ និងជាអ្នកជិតខាងល្អ នឹងក្លាយជាដៃគូយុទ្ធសាស្ត្រគ្រប់ជ្រុងជ្រោយ ហើយដំណើរទស្សនកិច្ចរបស់ប្រតិភូលេខាបក្សកុម្មុយនីស្តខេត្តយូណាននាពេលនេះ បានរួមចំណែកកាន់តែប្រសើរថែមទៀតនៅក្នុងការពង្រឹងទំនាក់ទំនងរវាងប្រទេសទាំងពីរ។
លោកស្រី ទួត បញ្ញា បានបញ្ជាក់ប្រាប់អ្នកសារព័ត៌មានក្រោយពីជំនួបនោះដែរថា ដំណើរទស្សនកិច្ចរបស់គណៈប្រតិភូនាពេលនេះ ក៏ដើម្បីចុះហត្ថលេខាលើអនុស្សរណៈស្តីពីការបង្កើតក្រុមការងារសហប្រតិបត្តិការរវាងក្រសួងការបរទេសកម្ពុជា ជាមួយមន្ទីរការបរទេសខេត្តយូណានផងដែរ។
តាមលោកស្រី ទួត បញ្ញា នៅក្នុងជំនួបនោះ លោក ឈិន ហាវ លេខាបក្សកុម្មុយនីស្តខេត្តយូណាន បានជម្រាបឯកឧត្តមឧបនាយករដ្ឋមន្ត្រីអំពីសមិទ្ធផល និងការរីកចម្រើននានា របស់ខេត្តយូណាន គឺព្រោះខេត្តយូណាននេះ ថ្វីត្បិតជាខេត្តមួយពិតមែន ប៉ុន្តែមានទំហំធំជាងប្រទេសកម្ពុជាពីរដង ហើយប្រជាជនមានរហូតដល់៤៨លាននាក់ ហើយក៏ជាខេត្តមួយដ៏មានសក្ដានុពលរបស់ចិនផងដែរ ហើយដំណើរទស្សនកិច្ចនេះ ក្នុងបំណងជំរុញកិច្ចសហប្រតិបត្តិការ និងទំនាក់ទំនងរវាងប្រទេសទាំងពីរឲ្យកាន់តែរីកចម្រើន និងស៊ីជម្រៅថែមទៀត ស្របតាមកិច្ចសហប្រតិបត្តិការដៃគូយុទ្ធសាស្ត្រគ្រប់ជ្រុងជ្រោយ ដែលសាធារណរដ្ឋប្រជាមានិតចិន និងកម្ពុជា បានចុះហត្ថលេខាកាលពីឆ្នាំ២០១០កន្លងមក។
ជាមួយគ្នានោះ លោក ឈិន ហាវ ហើយក៏បានលើកឡើងពីស្ថានភាពបច្ចុប្បន្ននៃខេត្តយូណាន ដោយអះអាងថា បច្ចុប្បន្ននេះខេត្តយូណានមានការរីកចម្រើនយ៉ាងខ្លាំងដែល GDP រហូតដល់៨.៩ ភាគរយ ហើយខេត្តយូណានជាតិជាខេត្ត ដែលមានការរីកចម្រើនលំដាប់ទី៣ ក្នុងចំណោមខេត្តទាំងអស់របស់ចិន ហើយ GDP សម្រាប់មនុស្សម្នាក់ៗ បច្ចុប្បន្ននេះ នៅខេត្តយូណាន មានរហូតដល់៦ពាន់ដុល្លារសហរដ្ឋអាមេរិក ហើយមកដល់ពេលនេះខេត្តយូណានកំពុងតែប្រឹងប្រែងឲ្យរីកចម្រើនបន្ថែមទៀតឈានទៅដល់៨ពាន់ដុល្លារក្នុងម្នាក់ ស្របតាមផែនការរដ្ឋដែលដាក់ចេញដោយលោកប្រធានាធិបតី ស៊ីជីនពីង ដែលបានកំណត់ថា ឆ្នាំ២០២០ ចិននឹងកាត់បន្ថយភាពក្រីក្រឲ្យ ០ (សូន្យ) ភាគរយ គឺមានន័យថា អស់ភាពក្រីក្រតែម្ដង។
ជាការឆ្លើយតប លោកឧបនាយករដ្ឋមន្ត្រី ប្រាក់ សុខុន បានសម្ដែងការស្វាគមន៍ចំពោះដំណើរទស្សនកិច្ចរបស់គណៈប្រតិភូលេខាបក្សកុម្មុយនីស្តខេត្តយូណាន ហើយក៏បានអបអរសាទរចំពោះសមិទ្ធផល ដែលខេត្តយូណានទទួលបាន ហើយដោយសារការខិតខំប្រឹងប្រែងរបស់ប្រជាជន ក៏ដូចជាអាជ្ញាធរខេត្តយូណាន នឹងទទួលបានជោគជ័យជាក់ជាមិនខាន ក្នុងការធ្វើឲ្យផែនការបំបាត់ភាពក្រីក្រនៅពេលខាងមុខ។ តាមឯកឧត្តមឧបនាយករដ្ឋមន្ត្រី ប្រាក់ សុខុន ការរីកចម្រើននៅក្នុងក្នុងខេត្តយូណាន នៃសាធារណរដ្ឋប្រជាមានិតចិននេះ ដឹងធ្វើឲ្យមានឥទ្ធិពលដល់ការរីកចម្រើននៅក្នុងតំបន់ ជាពិសេសដល់ប្រទេសកម្ពុជាផងដែរ។
ដោយឡែកទាក់ទងទៅនឹងការចុះហត្ថលេខា លោកស្រី ទួត បញ្ញា បានអះអាងថា គោលបំណងនៃការចុះហត្ថលេខានេះ គឺដើម្បីពង្រឹង និងធ្វើឲ្យស៊ីជម្រៅនូវកិច្ចសហប្រតិបត្តិការរវាងប្រទេសទាំងពីរ កម្ពុជា-ចិន ជាពិសេសក្រោមក្របខណ្ឌគំនិតផ្ដួចផ្ដើមខ្សែក្រវាត់ និងផ្លូវ ព្រមទាំងយន្តការកិច្ចសហប្រតិបត្តិការមេគង្គឡានឆាងផងដែរ ហើយ MOU នេះ ក៏ដើម្បីជំរុញការតភ្ជាប់គ្នាជាអន្តរវិនិយោគ ពាណិជ្ជកម្ម សេដ្ឋកិច្ច ទេសចរណ៍ វប្បធម៌ កសិកម្ម អប់រំ ដឹងថាមពលជាដើម ប៉ុន្តែកិច្ចសហប្រតិបត្តិការមិនបានកំណត់តែលើវិស័យ ដែលបានរៀបរាប់ខាងលើនោះទេ ពីព្រោះកិច្ចសហប្រតិបត្តិការជាមួយសាធារណរដ្ឋប្រជាមានិតចិន គឺមានភាពទូលំទូលាយខ្លាំងណាស់ ពីព្រោះកម្ពុជា និងចិន មានយុទ្ធសាស្ត្រដៃគូគ្រប់ជ្រុងជ្រោយ។
លោកស្រី ទួត បញ្ញា បានបញ្ជាក់ដែរថា បច្ចុប្បន្ន ខេត្តយូណានមានគម្រោងវិនិយោគនៅកម្ពុជា រហូតដល់២៥ គម្រោង ដែលមានទំហំទឹកប្រាក់វិនិយោគជិត២ពាន់លានដុល្លារ រួមទាំងព្រលានយន្តហោះនៅសៀមរាបផងដែរ ពីព្រោះក្រុមហ៊ុនដែលវិនិយោគព្រលានយន្តហោះនោះ គឺជាក្រុមហ៊ុនមកពីខេត្តយូណានគ្រុប។ ជាមួយគ្នានោះ ខេត្តយូណាន ក៏មានគម្រោងពង្រីកការវិនិយោគបន្ថែមទៀតនៅកម្ពុជាផងដែរ ដូច្នេះខេត្តយូណានមានសក្តានុពលយ៉ាងខ្លាំង។
លោកស្រីបន្តថា នៅក្នុងដំណើរទស្សនកិច្ចនៅខេត្តសៀមរាបនៅពេលនេះ ក៏បានពិភាក្សាគ្នាអំពីការបង្កើតក្រសួងវប្បធម៌នៅខេត្តសៀមរាប ពីព្រោះខេត្តសៀមរាប និងខេត្តយូណានជាខេត្តសម្ព័ន្ធមេត្រីជាមួយគ្នា។
នៅក្នុងវិស័យអប់រំ ខាងខេត្តយូនណានបានប្រកាសស្វាគមន៍ការសិក្សានៅប្រទេសចិន និងសន្យាផ្តល់អាហារូបករណ៍បន្ថែមទៀតដល់និស្សិតកម្ពុជា។ ដោយឡែកខាងសុខាភិបាល ខេត្តយូណាន ក៏បានបញ្ជូនក្រុមវេជ្ជបណ្ឌិតមកព្យាបាលជូនប្រជាពលរដ្ឋនៅខេត្តសៀមរាប ដោយមិនគិតថ្លៃ ព្រមទាំងខេត្ត ដែលនៅជាប់ផងដែរ ដូច្នេះកិច្ចសហប្រតិបត្តិការរវាងកម្ពុជា និងចិនមានភាពទូលំទូលាយ ហើយទាំងភាគីកម្ពុជា និងភាគីចិនមានបំណងរួមគ្នា ដើម្បីពង្រីកកិច្ចសហប្រតិបត្តិការឲ្យស៊ីជម្រៅបន្ថែមទៀត ជាពិសេសលើវិស័យពាណិជ្ជកម្ម ការដឹកជញ្ជូន វិនិយោគ និងការតភ្ជាប់នានាលើវិស័យជាច្រើនទៀត ហើយភាគីខេត្តយូនណានបានអះអាងថា ខេត្តយូណាន គឺជាខេត្តមួយដែលសំបូរផ្កាស្រស់ ដែលផ្កាស្រស់នេះ មិនមែនសម្រាប់ផ្គត់ផ្គង់តែនៅខេត្តណាមួយទេ គឺសម្រាប់ផ្គត់ផ្គង់សម្រាប់ប្រទេសចិនទាំងមូល ថែមទាំងទៅកាន់ប្រទេសផ្សេងៗទៀតនៅលើពិភពលោកផងដែរ។ ចំណែកផលិតផលកាហ្វេ ៩៨ភាគរយ នៃកាហ្វេទាំងអស់នៅប្រទេសចិន គឺនាំមកពីខេត្តយូណាន៕
Source: Kampuchea Thmey Daily
0 Comments