ភ្នំពេញ ៖ សភាពាណិជ្ជកម្មនិងឧស្សាហកម្មបារាំង-កម្ពុជា ដោយរួមសហការជាមួយស្ថានទូតបារាំង និងវិទ្យាស្ថានបារាំងនៅកម្ពុជា នឹងរៀបចំការតាំងពិព័រណ៍ផលិតផលបារាំងអមដោយកម្មវិធីកម្សាន្តជាច្រើន។
ការរៀបចំព្រឹត្តិការណ៍នេះគឺ ដើម្បីបិទបញ្ចប់«កម្មវិធីបារាំងពីរសប្តាហ៍នៅភ្នំពេញ» ហើយពិធីបើកផ្សារបារាំងនេះនឹងប្រព្រឹត្តទៅនៅថ្ងៃសៅរ៍ទី៣០ ខែមីនាឆ្នាំ២០១៩ វេលាម៉ោង១០ព្រឹក ក្រោមអធិបតីភាពរបស់លោកជំទាវ អេវ៉ា ង្វៀន ប៊ិញ ឯកអគ្គរដ្ឋទូតបារាំងប្រចាំកម្ពុជា។
យោងតាមសេចក្តីប្រកាសព័ត៌មានរបស់ស្ថានទួតបារាំងប្រចាំនៅកម្ពុជា កាលពីថ្ងៃទី២៧ខែមីនា ឆ្នាំ២០១៩ បានឲ្យដឹងថា ជាការតាំងពិព័រណ៍ផលិតផលបារាំងនេះ គឺព្រឹត្តិការណ៍មិនធ្លាប់មានមួយព្រោះថា ផ្សារមួយនឹងលេចរូបរាងនៅក្នុងបរិវេណស្ថានទូតបារាំងប្រចាំកម្ពុជានៅថ្ងៃសៅរ៍ទី៣០មីនាខាងមុខនេះ។
ក្នុងរយៈពេលមួយថ្ងៃ ចាប់ពីម៉ោង១០ព្រឹកដល់ម៉ោង៦ល្ងាច សាធារណជនអាចចូលរួមកម្សាន្តនៅក្នុង«ផ្សារបារាំង»នេះដោយសេរី ដើម្បីទស្សនាស្តង់ពិព័រណ៍ចំនួនជាង៥០ ដែលនឹងដាក់តាំងបង្ហាញផលិតផលនិងជំនាញបារាំងក្នុងវិស័យជាច្រើនដូចជា សុខភាព សម្អាងកាយ វប្បធម៌ កីឡា ម៉ូដ ម្ហូបអាហារ លំនៅឋាន និងអប់រំ។
ជាងនេះទៅទៀត កម្មវិធីកម្សាន្តផ្សេងៗជាច្រើននឹងត្រូវរៀបចំឡើងនៅក្នុងឱកាសដ៏រីករាយនេះដើម្បីតម្រូវតាមចំណង់ចំណូលចិត្តរបស់មនុស្សគ្រប់វ័យដូចជាតន្ត្រីសិល្បៈ សួនកុមារសកម្មភាពកីឡា ការបង្រៀនធ្វើម្ហូបដោយមេចុងភៅល្បីៗការភ្លក់ម្ហូបបារាំងបទបង្ហាញតូចៗនិងកម្មវិធីកម្សាន្តមួយចំនួនទៀតនៅតាមស្តង់ពិព័រណ៍។សាធារណជនទាំងអស់អាចចូលរួមរីករាយជាលក្ខណៈឯកជន ជាលក្ខណៈ គ្រួសារ ឬជាមួយមិត្តភក្តិក៏បាន។
ចំណែកអ្នកសារព័ត៌មានដែលមានបំណងចូលរួមយកព័ត៌មានក្នុងព្រឹត្តិការណ៍នេះ សូមចុះឈ្មោះជាមុនជាមួយលោកទឹង សុខលីមតាមរយៈអ៊ីមែល soklim.tung@diplomatie.gouv.fr ឬទូរស័ព្ទ ០១២ ៦៦៦ ៣០២។ សម្រាប់ព័ត៌មានបន្ថែមអំពីផ្សារបារាំង ៖ www.facebook.com/events/388981838592575/៕
Source: Kampuchea Thmey Daily
0 Comments