ស្ទឹងត្រែង ៖ យោងតាមព័ត៌មានបឋមបានឲ្យដឹងថា រថយន្តយីឌុបពីរគ្រឿង ដែលចេញពីស្រុកសៀមប៉ាង របស់ក្រុមហ៊ុនចិនមួយ ដែលដឹកឈើក្រៅលំដាប់ថ្នាក់ ត្រូវបានកម្លាំងកងរាជអាវុធហត្ថខេត្តស្ទឹងត្រែងដឹកនាំដោយ លោកវរសេនីយ៍ឯក ដួង វិចិត្រ នាយរងអាវុធហត្ថខេត្តចុះ ឃាត់ដើម្បីរៀបចំគណៈកម្មការចម្រុះត្រួតពិនិត្យទៅលើរថយន្តដឹកឈើ តើត្រឹមត្រូវតាមច្បាប់អនុញ្ញាតរបស់រដ្ឋបាលព្រៃឈើដែរឬទេ?។
រថយន្តយីឌុបពីរគ្រឿងនេះ បានធ្វើចរាចរចេញពីស្រុកសៀមប៉ាង កាលពីយប់ថ្ងៃទី26 រំលងអធ្រាត្រ កាត់តាមផ្លូវជាតិលេខ 7 មកដល់ចំណុចភូមិគីឡូ 8 ដែលត្រូវបានគេរាយការណ៍សង្ស័យថាមានដឹកឈើមិនត្រឹមត្រូវតាមច្បាប់អនុញ្ញាតរបស់រដ្ឋបាលព្រៃឈើ ក៏ត្រូវបានកម្លាំងអាវុធហត្ថខេត្តឃាត់ និងបង្កើតគណៈកម្មការត្រួតពិនិត្យ ដែលគេសង្ស័យថា មានដឹកឈើខុសពីច្បាប់រដ្ឋបាលព្រៃឈើអនុញ្ញាត។
ក្រោយឃាត់រថយន្តទាំងពីរគ្រឿង លោកវរសេនីយ៍ឯក ដួង ចិត្រ នាយរងកងរាជអាវុធហត្ថខេត្តបានប្រាប់ថា រថយន្ត 2 គ្រឿងនេះ បើតាមការត្រួតពិនិត្យបឋមយើងឃើញថា ឈើទាំងនោះ ជាប្រភេទឈើលេខ១ និងឈើលេខ 2 ខុសពីច្បាប់អនុញ្ញាត ហើយក្នុងនោះយើងមិនទាន់បានពិនិត្យមើលនៅខាងក្រោមឈើនៅឡើយទេ តែរថយន្តនេះមានច្បាប់អនុញ្ញាត បានអនុញ្ញាតឲ្យដឹកតែឈឺក្រៅលំដាប់ថ្នាក់តែប៉ុណ្ណោះ។
បច្ចុប្បន្ន នៅវេលាម៉ោង12និង30នាទីនេះ កម្លាំងចម្រុះកំពុងតែចុះ ដើម្បីធ្វើការត្រួតពិនិត្យទៅលើរថយន្តទាំង 2 គ្រឿងនោះ តើត្រឹមត្រូវតាមច្បាប់អនុញ្ញាតដែរឬទេ? ហើយបើសិនជាឈើទាំងនោះខុសនឹងច្បាប់អនុញ្ញាត គេរង់ចាំមើលថា តើសមត្ថកិច្ចជំនាញ នឹងចាត់វិធានការយ៉ាងណាចំពោះក្រុមហ៊ុនចិននេះ?៕
Source: Kampuchea Thmey Daily
0 Comments