ភ្នំពេញ ៖ សពយុវជនម្នាក់ ត្រូវបានក្រុមគ្រួសាររកឃើញ ហើយស្រង់យកមកលើគោក បន្ទាប់ពីយុវជនរូបនេះចិត្តខ្លាំង បានសម្រេចចិត្តមកលោតទឹកសម្លាប់ខ្លួន ដោយសារបងប្អូនស្ដីបន្ទោសបន្តិចបន្តួចរឿងដើរលេងច្រើនរកលុយមិនសល់។
ហេតុការណ៍ស្រង់សពនេះ កាលពីវេលាម៉ោង១២និង៤៥នាទីរសៀល ថ្ងៃទី២ ខែមីនា ឆ្នាំ ២០១៩ នៅក្រោមស្ពានជ្រោយចង្វាប៉ែកខាងកើត ភូមិដើមគ សង្កាត់ជ្រោយចង្វា ខណ្ឌជ្រោយចង្វា។
ជនរងគ្រោះត្រូវបានគេស្គាល់ ឈ្មោះ ពៅ ដាវីន ហៅនីត ភេទប្រុស អាយុ២២ឆ្នាំ រស់នៅភូមិចុងខ្សាច់សង្កាត់ទួលសង្កែ1 ខណ្ឌឫស្សីកែវ មុខរបររត់ម៉ូតូកង់បី។
បើតាមក្រុមគ្រួសារ ជនរងគ្រោះបានឲ្យដឹងថា មុនពេលកើតហេតុជនរងគ្រោះបានផឹកស៊ីជាមួយបងប្អូននៅភូមិចុងខ្សាច់សង្កាត់ទួលសង្កែ1 ខណ្ឌឫស្សីកែវ ហើយត្រូវបានបងប្អូនស្ដីបន្ទោសរឿងដើរលេងដាច់យប់ច្រើន រកលុយមិនសល់។
ក្រោយមក ដោយសារស្រវឹងផង ហើយយុវជនរូបនេះ បានគិតច្រើនផង ក៏បានជិះម៉ូតូទាំងយប់តែម្តង ដោយមិនដឹងទៅណានោះទេ។
ប្រភពបន្តថា នៅវេលាយប់នោះ ជនរងគ្រោះ បានទូរស័ព្ទប្រាប់បងប្អូនម្នាក់ទៀតថា យើងលាសិនហើយ ព្រោះអស់កម្មពៀរនឹងគ្នាហើយៗ ក៏ផ្តាំឲ្យបងប្អូនមកយកម៉ូតូផងនៅលើស្ពានជ្រោយចង្វា។
ដោយសារបងប្អូនមិនចាប់អារម្មណ៍ ស្មាននិយាយលេង រហូតដល់ម៉ោង៥ល្ងាច ថ្ងៃទី១មីនា បាត់មិនឃើញតេក៏មិនចូលទើបដឹងផ្អើលមករក ចាំមើលសពអណ្តែតទឹក។
ប្រភពឲ្យដឹងទៀតថា នៅព្រឹកថ្ងៃទី២មីនា ក្រុមគ្រួសារក៏ជួលគេមុជរាវរហូតដល់ម៉ោងជាង១២ ក៏ប្រទះឃើញ ហើយស្រង់មកលើគោក ដឹកយកទៅធ្វើបុណ្យនៅវត្តទួលសង្កែតាមប្រពៃណី៕
Source: Kampuchea Thmey Daily
0 Comments