ក្រុមឃ្លាំមើលអាវុធគីមីពិភពលោក បាននិយាយកាលពីថ្ងៃសុក្រថា សារធាតុក្លរីន ត្រូវបានគេប្រើនៅទីក្រុង Douma ដែលកាន់កាប់ដោយក្រុមឧទ្ទាមក្នុងប្រទេសស៊ីរីកាលពីឆ្នាំ២០១៨។ ក្រុមឃ្លាំមើលបាននិយាយបែបនេះនៅក្នុងរបាយការណ៍ចុងក្រោយដែលគេរង់ចាំជាយូរមកហើយអំពីការវាយប្រហារដ៏សាហាវ។
របាយការណ៍របស់អង្គការហាមឃាត់អាវុធគីមី (OPCW) គឺផ្អែកលើដំណើរទស្សនកិច្ចមួយរបស់ក្រុមអធិការកិច្ចទៅកាន់កន្លែងនៃការវាយប្រហារដែលសាក្សីបាននិយាយថា បានសម្លាប់មនុស្សចំនួន៤៣នាក់។
មហាអំណាចលោកខាងលិចដែលដឹកនាំដោយសហរដ្ឋអាមេរិកបានស្តីបន្ទោសលើរបបរបស់ប្រធានាធិបតីស៊ីរីលោក Bashar al-Assad សម្រាប់ឧបទ្ទវហេតុនេះនិងបានបើកការវាយប្រហារពីអាកាសលើមូលដ្ឋានយោធាដើម្បីជាការឆ្លើយតប។
ក្រុមឃ្លាំមើលដែលមានមូលដ្ឋាននៅទីក្រុងឡាអេបាននិយាយថា ស៊ីឡាំងចំនួន២ដែលទំនងជាផ្ទុកសារធាតុក្លរីនបានបុកចូលក្នុងប្លុកលំនៅដ្ឋានមួយនៅក្នុងទីក្រុងនេះ។ របាយការណ៍របស់ OPCW បាននិយាយថា មានហេតុផលសមរម្យដែលថា ការប្រើប្រាស់សារធាតុគីមីពុលជាអាវុធបានកើតឡើងនៅថ្ងៃទី៧ខែមេសាឆ្នាំ២០១៨។ សារធាតុពុលនោះមានផ្ទុកជាតិក្លរីន។
ទោះបីជាយ៉ាងណាក៏ដោយ អង្គការនេះបាននិយាយថា ខ្លួនមិនបានរកឃើញភស្តុតាងនៃការប្រើប្រាស់សារធាតុបំផ្លាញប្រព័ន្ធសរសៃប្រសាទនៅទីក្រុង Douma ដូចការចោទប្រកាន់ដោយភាគីមួយចំនួននៅក្នុងជម្លោះនោះទេ។
ការរកឃើញនេះបានបញ្ជាក់ពីរបាយការណ៍បណ្ដោះអាសន្នរបស់អង្គការ OPCW ដែលបានចេញផ្សាយកាលពីខែកក្កដាដែលបាននិយាយថា ដាននៃសារធាតុក្លរីនត្រូវបានរកឃើញ។
របាយការណ៍នោះមិនបានស្តីបន្ទោសនរណាទេព្រោះវាមិនស្ថិតនៅក្នុងការគ្រប់គ្រងរបស់ OPCW នៅពេលនោះថ្វីបើក្រុមឃ្លាំមើលនេះបានទទួលសិទ្ធិអំណាចដើម្បីស៊ើបអង្កេតរកអ្នកទទួលខុសត្រូវចំពោះការវាយប្រហារគីមីទាំងអស់នៅក្នុងប្រទេសស៊ីរីកាលពីឆ្នាំ២០១៤ក៏ដោយ។
ប្រទេសរុស្ស៊ីដែលគាំទ្រលោក Assad បានច្រានចោលរបាយការណ៍នេះហើយបាននិយាយថា ការវាយប្រហារនេះត្រូវបានរៀបចំឡើងដោយក្រុមអ្នកស្ម័គ្រចិត្តជួយសង្គ្រោះស៊ីរីដែលត្រូវបានគេស្គាល់ថា “មួកស”៕ AFP
Source: Kampuchea Thmey Daily
0 Comments