កណ្ដាល ៖ ស្នងការរងខេត្តកណ្តាលលោក ស្រេង សុខា ដែលបច្ចុប្បន្នកំពុង ត្រូវបានអង្គភាពប្រឆាំងអំពើពុករលួយប្រកាសបើកការស៊ើបអង្កេតលើករណីទ្រព្យសម្បត្តិនោះ ពេលនេះក៏ស្រាប់តែធ្លាយដំណឹងប្រពលរដ្ឋរស់នៅអមសងខាងផ្លូវលំ ភូមិព្រែកសំរោង២ ឃុំតាខ្មៅ ស្រុកតាខ្មៅ ខេត្តកណ្តាល ផ្តិតមេដៃដាក់ពាក្យបណ្តឹង។
បើយោងតាមប្រភពបានបញ្ជាក់ថា ពាក្យបណ្តឹងនេះ បានធ្វើឡើងតាមរយៈលោកមេភូមិសំរោង២ ឃុំតាខ្មៅកាលពីថ្ងៃទី៣០ ខែវិច្ឆិកា ឆ្នាំ២០១៨ ហើយពាក្យបណ្តឹងនេះក៏បានបញ្ជូនទៅប្រធានមន្ទីររៀបចំដែនដីនគររូបនីយកម្មសំណង់និងសុរិយោដីខេត្តកាលពីថ្ងៃទី២១ ខែមករា ឆ្នាំ ២០១៩ ផងដែរ។
ក្នុងលិខិតដែលចុះកាលពីថ្ងៃទី២៥ ខែធ្នូ ឆ្នាំ២០១៨ នោះ ក៏បានភ្ជាប់ជាមួយឈ្មោះដើមបណ្តឹង មានដូចជា៖ សាង ហេង, ម៉ៅ សុភាព, ស៊ុន វឌ្ឍា, អេង ហៀង, រៀម សេងឡាង, សួរ ចំរើន, គឹម សុខជា, លី វ៉ានសុវណ្ណា, ច្រាំ សុភាព, កេត ហេង, ហ៊ឹម ជា, កៅ រិន លន់ សៀង អេង, គួច ខេវិន និងស៊ាង សៀមលី ដែលជាប្រជាជនរស់នៅអមសងខាងផ្លូវ បានប្តឹងលោកស្រេង សុខា ស្នងការរងនៃស្នងការដ្ឋាន នគរបាលខេត្តកណ្តាល។
ប៉ុន្តែតាមប្រភពថា ពាក្យបណ្តឹងនេះ ត្រូវបានអាជ្ញាធរចុះទៅត្រួតពិនិត្យ និងឲ្យឈ្មោះស្រេង សុខា ផ្អាកការសាងសង់សំណង់រឹងនោះហើយ តែលោកស្នងការរងដែលសាងសង់ផ្ទះជួលមិនបានសុំច្បាប់ពីអាជ្ញាធរមូលដ្ឋានត្រឹមត្រូវនោះ មិនព្រមអនុវត្តន៍តាមមន្ត្រីជំនាញឡើយ។ លោក វណ្ណា មេភូមិព្រែកសំរោង២ ឃុំតាខ្មៅ ស្រុកតាខ្មៅ បានឲ្យដឹងថា លោកស្រេង សុខា ពិតជាបានសាងសង់សំណង់ (ផ្ទះ) ប៉ះចិញ្ចើមផ្លូវសាធារណៈមែន ហើយគាត់មិនបាន សុំច្បាប់ពីអាជ្ញាធរឡើយ ប៉ុន្តែលោកគ្រាន់តែជាមេភូមិតូចតាច មិនហ៊ានណែនាំលោក ស្រេង សុខា ដែលជាមន្ត្រីមានអំណាចឡើយ។
ប្រភពពីលោក វណ្ណា បានបញ្ជាក់ទៀតថា “គាត់ (ស្រេង សុខា) សង់ផ្ទះហ្នឹងនៅលើចិញ្ចើមផ្លូវមែន អ៊ីចឹងហើយបានជាប្រជាពលរដ្ឋរស់នៅតាមផ្លូវហ្នឹង មិនសុខចិត្ត បានដាក់ពាក្យបណ្តឹងទៅអាជ្ញាធរ ហើយឮថា អាជ្ញាធរឲ្យគាត់ផ្អាកសាងសង់ទៀត តែគាត់មិនស្តាប់ទេ។ ចំពោះខ្ញុំវិញក៏មិនដែលបានជួបលោក ស្រេង សុខា ផ្ទាល់ដែរ ព្រោះយើងតូចតាច មិនហ៊ានទៅណែនាំជាមួយគេអ្នកធំ អ្នកមានអំណាចខ្លាំងអ៊ីចឹងទេ”។
ជាមួយគ្នានេះអ្នកយកព័ត៌មានក៏បានព្យាយាមទាក់ទងមន្ត្រីរៀបចំដែនដីនគរូបនីយកម្ម សំណង់ និងសុរិយោដីខេត្តកណ្តាល ហើយត្រូវបានប្រភពនោះអះអាងថា មន្ត្រីជំនាញបានចេញលិខិតបញ្ឈប់ការសាងសង់ហើយ តែម្ចាស់សំណង់ (ស្រេង សុខា) មិនបញ្ឈប់ឡើយ ហើយមន្ត្រីនោះ បានរុញឲ្យទៅសួរនៅក្រុងវិញ។
ដោយឡែក លោក ស្រេង សុខា ស្នងការរងនៃស្នងការដ្ឋាននរគបាលខេត្តកណ្តាលបានប្រាប់អ្នកយកព័ត៌មានតាមទូរស័ព្ទកាលពីពេលថ្មីៗនេះ លោកពិតជាបានសាងសង់ឃ្លាំងនៅភូមិព្រែកសំរោង២ សង្កាត់តាខ្មៅ ក្រុងតាខ្មៅ ខេត្តកណ្តាល ប្រាកដមែន តែលោកមិនបានដឹងថា មានប្រជាជនប្រតិកម្មប្តឹងលោកបែបនេះឡើយ ព្រោះមិនដែលឃើញពាក្យបណ្តឹង។
លោក ស្រេង សុខា បញ្ជាក់ថា “ខ្ញុំសង់ហ្នឹង គឺធ្វើឃ្លាំងដាក់អីវ៉ាន់ មិនមែនធ្វើផ្ទះទេ។ ខ្ញុំមិនដែលឮថា មានប្រជាជននៅហ្នឹងប្តឹងខ្ញុំទេ ព្រោះខ្ញុំអត់ដែលឃើញពាក្យបណ្តឹងហ្នឹងសោះ។ ការសង់ឃ្លាំងហ្នឹងខ្ញុំមានបានរំលោភបំពានលើផ្លូវសាធារណៈឯណាអត់មានរឿងអ៊ីចឹងទេ។ ចំពោះរឿងថា ខាងមន្ត្រីជំនាញឱ្យខ្ញុំបញ្ឈប់ការសាងសង់ហ្នឹង ក៏ខ្ញុំមិនដែលដឹងដែរ ខ្ញុំអត់ដឹងរឿងហ្នឹងទេ។ បើមានពាក្យបណ្តឹងពីប្រជាជននៅហ្នឹង សូមយកមកបង្ហាញខ្ញុំឲ្យបានឃើញផង”។
ថ្វីត្បិតតែលោក ស្រេង សុខា ព្យាយាមប្រកែកថា មិនដឹងរឿងប្រជាជនប្តឹងលោករឿងសាងសង់ឃ្លាំងរំលោភលើផ្លូវសាធារណៈបែបនេះក្តី តែប្រជាជនដែលរស់នៅអមផ្លូវនោះ បានឲ្យដឹងថា ខាងមន្ត្រីជំនាញសុរិយោដីខេត្តកណ្តាល ពិតជាបានចុះទៅបង្គាប់ឲ្យម្ចាស់សំណង់ (លោកស្រេង សុខា) បញ្ឈប់ការសាងសង់តទៅទៀតមែន តែលោក សុខា មិនស្តាប់ឡើយ និងនៅតែបន្តសាងសង់។
មហាជនបានលើកឡើងថា ក្រោមឥទ្ធិពលកណ្តាប់ដៃដែក ដោយបានអនុវត្តយ៉ាងច្បាស់លាស់នៃអភិក្រមទាំង៥ “ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់)របស់សម្តេចតេជោ ហ៊ុន សែន បានបកស័ក្ដិបណ្តេញចេញពីតំណែងនូវមន្ត្រីរាជអាវុធហត្ថខេត្តរតនគិរី គឹម រស្មី ដែលធ្លាប់ប្រព្រឹត្តអំពើរំលោភបំពានអំណាច និងសម្ញែងទ្រព្យចែកកូនៗថ្ងៃខួបកំណើតកន្លះលានដុល្លារអាមេរិក ដែលធ្វើឲ្យប្រជាជនទូទាំងប្រទេសគាំទ្រចំពោះចំណាត់ការរបស់សម្តេច ជាខ្លាំង។ ប៉ុន្តែក៏នៅមានមន្ត្រីមួយចំនួនទៀត ហាក់ផ្គើននឹងការអនុវត្តអភិក្រមទាំង៥ របស់សម្តេច ដដែល។
ជាក់ស្តែងដូចជាលោក ស្រេង សុខា ស្នងការរងនៃស្នងការដ្ឋាន នគរបាលខេត្តកណ្តាល ថ្មីៗនេះបានភ្ជាប់ពាក្យជាមួយកូនក្រមុំអ្នកស្រុកព្រៃវែង ដោយសម្ញែងបណ្ណាការ១០ម៉ឺនដុល្លារអាមេរិក ចិញ្ចៀនពេជ្រ ២វង់ តម្លៃរាប់ម៉ឺនដុល្លារ និងរថយន្ត Lexus LX570 មួយគ្រឿង តម្លៃជាង២០ម៉ឺនដុល្លារ សរុបទៅគ្រាន់តែថ្លៃទឹកដោះ ជាង៣០ម៉ឺនដុល្លារ។ ពេលស្នងការរងខេត្តកណ្តាល អាងអំណាចបានសាងសង់ផ្ទះនៅភូមិព្រែកសំរោង២ ខេត្តកណ្តាល ឃុំតាខ្មៅ ស្រុកតាខ្មៅ ខេត្តកណ្តាល ត្រូវប្រជាជនចោទថា បានរំលោភបំពានមកលើបង្គោលភ្លើង មកលើចិញ្ចើមផ្លូវសាធារណៈ ដោយគ្មានការអនុញ្ញាតសាងសង់។
មិនតែប៉ុណ្ណោះបើទោះបីជាត្រូវបានប្រជាជនប្តឹងជំទាស់ហើយអាជ្ញាធរបានចេញបញ្ជាឲ្យផ្អាកការសាងសង់យ៉ាងណា ក៏លោកស្នងការរង នៅតែអះអាងថា មិនបានដឹងឮ ដោយអាងអំណាចមិនគោរពរដ្ឋអំណាចមូលដ្ឋាន និងបំពានលើស្ថាប័នពាក់ព័ន្ធនានា ដែលចុះទៅហាមឃាត់ការសាងសង់ ជាពិសេស មិនញញើតនឹងប្រសាសន៍របស់សម្តេចតេជោនាយករដ្ឋមន្ត្រី ហ៊ុន សែន ដែលថា “ពេលនេះ ខ្លាក៏វ៉ៃ ពស់ក៏វ៉ៃ កណ្តុរក៏វ៉ៃ កណ្តូប ក៏វ៉ៃ រុយក៏វ៉ៃ ឲ្យតែរំខានដល់ផលប្រយោជន៍ ប្រជាពលរដ្ឋ… ៕
Source: Kampuchea Thmey Daily
0 Comments