ទីតាំងអ៊ីនធឺណិត និងទូហ្គេម២កន្លែង ត្រូវសមត្ថកិច្ចចម្រុះចុះបង្ក្រាប ក្នុងក្រុងបានលុង

រតនគិរី ៖ អ៊ីនធឺណិត និងទូហ្គេមខុសច្បាប់ចំនួន២ទីតាំងជាប់គ្នា រងការចាប់បង្ក្រាប និងរឹបអូសពីកម្លាំងចម្រុះ ក្នុងក្រុងបានលុង កាលពីវេលាម៉ោង៩និង៣០នាទីព្រឹក ថ្ងៃចន្ទ ១៣រោច ខែមាឃ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៤ ខែមីនា ឆ្នាំ២០១៩។

ក្នុងកិច្ចប្រតិបត្តិការចុះបង្ក្រាបអ៊ីនធឺណិត និងទូហ្គេមដុះស្លែទាំង២ទីតាំងជាប់គ្នាខាងលើនេះ ជាការធ្វើឡើងរួមគ្នារបស់កម្លាំងសមត្ថកិច្ចចម្រុះ ដែលដឹកនាំដោយ លោក បូរ៉ា បូរ៉ាន់ឌី ព្រះរាជអាជ្ញារង អមសាលាដំបូងខេត្តរតនគិរី ដែលសមាសភាពចូលរួម លោក អ៊ុក ស៊ីដេត អភិបាលរងក្រុងបានលុង លោក កេត ស៊ីថា អធិការរងនគរបាលក្រុងបានលុង លោក កៃ សាវិន ប្រធានអភិវឌ្ឍន៍ក្រុងបានលុង លោកអនុសេនីយ៍ត្រី ជិន វណ្ណលិន នាយរងផ្នែក និង លោក ឃឹម ណារិទ្ធិ មន្ត្រីកងរាជអាវុធហត្ថក្រុងបានលុង។

សមត្ថកិច្ចចម្រុះក្នុងការបង្ក្រាបបានឲ្យដឹងថា ទីតាំងបើកប្រព័ន្ធអ៊ីនធឺណិត ចាក់បាល់ និងទូហ្គេមសម្រាប់ក្មេងៗសិស្សសាលាភ្នាល់គ្នាយ៉ាងអនាធិបតេយ្យខុសច្បាប់ទាំងពីរខាងលើនេះ គឺនៅទល់មុខសាខាពន្ធដារខេត្ត ស្ថិតក្នុងភូមិអូរកន្សែង សង្កាត់បឹងកន្សែង ក្រុងបានលុង ហើយម្ចាស់ទីតាំងប្រព័ន្ធអ៊ីនធឺណិតចាក់បាល់នោះ ក៏ត្រូវបានគេស្គាល់ ឈ្មោះ ជឹម ជីវ័ន្ត ភេទប្រុស អាយុ២៤ឆ្នាំ ជនជាតិខ្មែរ មានទីលំនៅភូមិ/ឃុំខាងលើ និងមុខរបរបើកជាអចិន្ត្រៃយ៍ប្រព័ន្ធអ៊ីនធឺណិត(ចាក់បាល់)។

ប្រភពពីសមត្ថកិច្ចដដែលបានបន្តថា ក្នុងការរឹបអូសយកវត្ថុតាងរួមមាន ៖ កុំព្យូទ័រ ចំនួន៥គ្រឿង
,ម៉ូនីទ័រ ចំនួន៥គ្រឿង, ឃីប៊ត ចំនួន៤គ្រឿង. ម៉ៅ ចំនួន៥គ្រឿង, ម៉ាស៊ីនព្រីនធ័រ ចំនួន១គ្រឿង
, សៀវភៅបញ្ជី ចំនួន៤ក្បាល, ត្រា១ , ប៊ុងបាល់ចំនួន១ដុំធំ , ក្រដាសព្រីន១ដុំធំ និងម៉ូតូជាច្រើនគ្រឿង ព្រមទាំងធ្វើការឃាត់ខ្លួនក្មេងៗសិស្សសាលាចំនួន១០នាក់ទៀតផង។

ដោយឡែក ម្ចាស់ទីតាំង និងក្មេងៗទំនើងទាំងនោះ សមត្ថកិច្ចបានឲ្យធ្វើកំណត់ហេតុកិច្ចសន្យាផ្តិតមេដៃចំពោះមុខច្បាប់ជាធរមាន ហើយដោះលែងឲ្យមានសេរីភាពធម្មតាវិញ។

មជ្ឈដ្ឋានទូទៅ ក៏ដូចជាមាតាបិតាសិស្សានុសិស្សក្នុងក្រុងបានលុងទាំងមូល សាទរចំពោះសមត្ថកិច្ចក្នុងចំណាត់ការចុះបង្ក្រាបទូហ្គេមអនាធិបតេយ្យល្មើសច្បាប់នេះ ហើយពួកគាត់ក៏បានស្នើសុំសមត្ថកិច្ចឲ្យដាក់បន្ទុកដ៏ធ្ងន់ធ្ងរទៅលើម្ចាស់ទីតាំងហ្គេមល្មើសច្បាប់នេះផង។

កន្លងមក គេសង្កេតឃើញក្រុមសិស្សានុសិស្សនាំគ្នាវក់វីនឹងហ្គេម ពុំបានចូលសាលាសិក្សារៀនសូត្រនោះទេ។ ដោយសារទូហ្គេមនេះ បានបំផ្លាញអនាគតដល់សិស្សានុសិស្សជាទំពាំងស្នងឫស្សី និងអសន្តិសុខក្នុងសង្គមជាតិឲ្យធ្លាក់ក្នុងជ្រោះមហន្តរាយ ដោយសារអំពើដ៏ព្រៃផ្សៃរបស់ក្រុមជនអគតិចង់មានចង់បានទ្រព្យធន ល្បែងហ្គេម និងប្រព័ន្ធអ៊ីនធឺណិតនេះប៉ុណ្ណោះ។

ពាក់ព័ន្ធនឹងផ្ទះបើកល្បែងហ្គេមនេះផងដែរ ក៏នៅមានពីរទីតាំងទៀត នៅតាមបណ្ដោយផ្លូវចំណតបេនឡានក្រុងសូរិយា ពុំទាន់ឃើញមានសមត្ថកិច្ចធ្វើការចុះបង្ក្រាបឡើយ ឬមួយក៏មានអាថ៌កំបាំងចម្លែកអ្វីនៅពីក្រោយខ្នង ទើបសមត្ថកិច្ចមានការរារែកក្នុងការបង្ក្រាបនោះ៕