ភ្នំពេញ ៖ បុរសជនជាតិម៉ាឡេស៊ីម្នាក់ ត្រូវបានថៅកែក្រុមហ៊ុនរបស់គាត់ចាប់ខ្លួន រួចវាយបែកភ្នែកទើបប្រគល់ឲ្យសមត្ថកិច្ចនគរបាលកម្ពុជា ចាត់ការតាមច្បាប់ កាលពីព្រលប់ថ្ងៃទី៤ ខែមីនា ឆ្នាំ២០១៩ ដោយចោទប្រកាន់ពីបទរំលោភទំនុកចិត្ត (លួចលុយក្រុមហ៊ុនចំនួនជាង២៦ម៉ឺនដុល្លារ) នៅក្នុងខណ្ឌសែនសុខ។
ប៉ូលិសបានឲ្យដឹងថា ជនដែលត្រូវបានចោទប្រកាន់ និងឃាត់ខ្លួននោះមាន ឈ្មោះ TAN CHEEKEONG CRISTOPHER ភេទប្រុស អាយុ៤៩ឆ្នាំ ជនជាតិម៉ាឡេស៊ី កាន់លិខិតឆ្លងដែនលេខAZ 4926868 មុខរបរប្រធានផ្នែកលក់ទំនិញរបស់ក្រុមហ៊ុនណតផាក ស្នាក់នៅបន្ទប់ផ្ទះជួលមួយកន្លែងនៅសង្កាត់ផ្សារដើមថ្កូវ ខណ្ឌចំការមន។
សមត្ថកិច្ចបានបញ្ជាក់ថា ជនសង្ស័យខាងលើ ត្រូវបានចាប់ខ្លួន ដោយតំណាងរបស់ថៅកែក្រុមហ៊ុន ណតផាក និង ប្តឹងចោទប្រកាន់ដោយ ឈ្មោះ ធី ទេវី ភេទស្រី អាយុ៣៩ឆ្នាំ មានទីលំនៅផ្ទះលេខ៣១ បុរីពិភពថ្មី ឈូកមាស មានទីតាំងនៅម្តុំសង្កាត់ក្រាំងធ្នង់ ខណ្ឌសែនសុខ ជាតំណាងក្រុមហ៊ុន។
បើតាមខ្លឹមសារបណ្តឹងចោទរបស់ ឈ្មោះ ធី ទេវី បានបញ្ជាក់ថា នៅមុនពេលកើតហេតុ ឈ្មោះ តាន់ឈីកឹង គ្រីស្តូភើ (TAN CHEEKEONG CRISTOPHER) បានចូលមករស់នៅក្នុងប្រទេសកម្ពុជា តាមរយៈក្រុមហ៊ុន មានមុខតំណែងជាប្រធានផ្នែកទីផ្សារលក់ ប៉ុន្តែក្រោយមកគេបានធ្វើសកម្មភាពលួចលុយក្រុមហ៊ុនអស់ចំនួន២៦១.២០០ដុល្លារអាមេរិក ដែលខាងគណនេយ្យរបស់ក្រុមទើបតែស្រាវជ្រាវរកឃើញនៅវេលាម៉ោង១៦និង៣០នាទីល្ងាច ថ្ងៃទី០៤ ខែមីនា ឆ្នាំ២០១៩ ទើបលោកថៅកែក្រុមហ៊ុនហៅមកសួរនាំ និងបញ្ជាចាប់ខ្លួនភ្លាម យកទៅប្រគល់ឲ្យសមត្ថកិច្ចនគរបាលសង្កាត់អូរបែកក្អម ខណ្ឌសែនសុខ ចាត់ការតាមផ្លូវច្បាប់។
តាមការអះអាងរបស់តំណាងក្រុមហ៊ុន បានបញ្ជាក់ថា ជនសង្ស័យរូបនេះ បានធ្វើសកម្មភាពលួចដកយកលុយក្រុមហ៊ុនចំនួន៥ដង មិនចាំខែថ្ងៃ គឺលើកទី១ អស់ចំនួន៤២.០០០ដុល្លារ លើកទី២ ចំនួន២១.៧០០ដុល្លារ លើកទី៣ ចំនួន១៧.៥០០ដុល្លារ លើកទី៤ ចំនួន៨០.០០០ដុល្លារ និងលើកទី៥ អស់ចំនួន១០០.០០០ដុល្លារ សរុបអស់ចំនួន២៦១.២០០ដុល្លារ។
ជនជាប់សង្ស័យ ត្រូវបានខាងក្រុមហ៊ុនវាយប៉ោងភ្នែកខាងស្តាំ ដោយសារកំហឹងមុនពេលយកមកប្រគល់ឲ្យសមត្ថកិច្ចមូលដ្ឋានឃាត់ខ្លួនសួរនាំ និងបញ្ជូនទៅតុលាការផ្ដន្ទាទោស៕
Source: Kampuchea Thmey Daily
0 Comments