ទុស្សេខ្សែភ្លើង ឆេះបន្ទប់ជាន់ទី៩ សណ្ឋាគារសាង៉ាំរីសត រងរបួសកម្មករ៥នាក់

ឧត្តរមានជ័យ ៖ មានករណីគ្រោះថ្នាក់អគ្គិភ័យមួយកើតឡើងនៅសណ្ឋាគារសាង៉ាំរីសត កាលពីវេលាម៉ោង២២និង២៥នាទីយប់ ថ្ងៃទី៣ ខែមីនា ឆ្នាំ២០១៩ ស្ថិតនៅភូមិជាំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ ដោយឆេះបន្ទប់កំពុងសាងសង់ ដែលមានដាក់សាំងក្រអូប បេអិល តូអា សម្រាប់លាបគ្រឿងសង្ហារិម ជាច្រើនធុង នៅជាន់ទី៩ នៃសណ្ឋាគារសាង៉ាំរីសត ដោយារទុស្សេខ្សែភ្លើងរាលឆាបឆេះតែម្តង។

សមត្ថកិច្ចបានឲ្យដឹងថា កម្មករដែលរងរបួសចំនួន៥នាក់ ក្នុងហេតុការណ៍គ្រោះថ្នាក់អគ្គិភ័យឆាបឆេះមានឈ្មោះដូចខាងក្រោម ៖ ១.ឈ្មោះ ប៉ាក ហូ ភេទប្រុស អាយុ១៩ឆ្នាំ កម្មករក្នុងក្រុមហ៊ុន រស់នៅភូមិជើងភ្នំ ឃុំត្រពាំងប្រិយ៍ ស្រុកអន្លង់វែង។ ២.ឈ្មោះ ស្រង់ វន ភេទប្រុស អាយុ២៤ឆ្នាំ មុខរបរកម្មករ រស់នៅភូមិទឹកជុំ ឃុំត្រពាំងប្រិយ៍ ស្រុកអន្លង់វែង។ ៣.ឈ្មោះ ឈួយ វ៉ាន់ ភេទប្រុស អាយុ២០ឆ្នាំ មុខរបរកម្មករ រស់នៅភូមិ ឃុំខាងលើ។ ៤.ឈ្មោះ ជឿន សុភា ភេទប្រុស អាយុ២២ឆ្នាំ មុខរបរកម្មករ រស់នៅភូមិ ឃុំខាងលើ។ ៥.ឈ្មោះ ចាន់ ពិសី ភេទប្រុស អាយុ២៦ឆ្នាំ មុខរបរកម្មករ រស់នៅភូមិលាងដៃ ឃុំលាងដៃ ស្រុកអង្គរធំ ខេត្តសៀមរាប។

ក្នុងករណីខាងលើនេះ អធិការនគរបាលស្រុក បានដឹកនាំកម្លាំងចំនួន២០នាក់ រថយន្តពន្លត់អគ្គិភ័យ ០១គ្រឿង រួមជាមួយកងកម្លាំងចម្រុះ ដឹកនាំដោយ លោកអភិបាលស្រុក ជួយអន្តរាគមន៍ និងបានប្រើប្រាស់ទឹករបស់សណ្ឋាគារបាញ់ពន្លត់ឲ្យរលត់ទាំងស្រុង នៅវេលាម៉ោង២៣និង៣០នាទី។

ក្នុងនោះបណ្តាលឲ្យសន្លប់កម្មករក្រុមហ៊ុនចំនួន៥នាក់ (ប្រុស) ដែលចូលទៅពន្លត់ ហើយឈ្លក់ផ្សែងខ្លាំងពេក និងបានដឹកបញ្ជូនមកកាន់មន្ទីរពេទ្យបង្អែកស្រុក បច្ចុប្បន្នបានធូរស្រាលវិញហើយ និងឆេះខូចខាតបន្ទប់បន្តិចបន្តួច ព្រមទាំងសម្ភារៈមួយចំនួន។

លុះមកដល់ម៉ោង២៤និង៣០នាទី ឯកឧត្តម ប៉ែ កុសល្យ អភិបាលខេត្ត អមដំណើរដោយ លោកឧត្ដមសេនីយ៍ត្រី ហង្ស បូរ ស្នងការរង បានចុះមកពិនិត្យស្ថានភាពជាក់ស្តែង និងសួរសុខទុក្ខជនរងគ្រោះនៅមន្ទីរពេទ្យបង្អែកស្រុកអន្លង់វែង។ ក្នុងឱកាសចុះសាកសួរសុខទុក្ខជនរងគ្រោះ ឯកឧត្តមអភិបាលខេត្តឧត្តរមានជ័យ បានឧបត្ថម្ភ ក្រុមគ្រូពេទ្យដែលប្រចាំការនៅពេលយប់ ទឹកប្រាក់ចំនួន១លានរៀលផងដែរ៕