រតនគិរី ៖ ជនសង្ស័យ២នាក់ ត្រូវកម្លាំងអធិការនគរបាលក្រុងបានលុង ឃាត់ខ្លួនពាក់ព័ន្ធករណីបង្កហិង្សាដោយចេតនា មានស្ថានទម្ងន់ទោស(វាយនឹងដំបងដែក) បណ្តាលឲ្យជនរងគ្រោះ២នាក់ រងរបួសធ្ងន់ និងស្រាល។
ករណីអំពើហិង្សានេះ បានកើតឡើងនៅវេលាម៉ោង៥និង៣០នាទី ថ្ងៃអង្គារ ៧កើត ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនិងថ្ងៃទី១២ ខែមីនា ឆ្នាំ២០១៩ នៅត្រង់ចំណុច ក្បែរផ្ទះលក់កូនឈើ ស្ថិតក្នុងភូមិអូរកន្តិល សង្កាត់បឹងកន្សែង ក្រុងបានលុង។
សមត្ថកិច្ចបានឲ្យដឹងថា ជនសង្ស័យ ១-ឈ្មោះ រម្យ ភារុណ ភេទប្រុស អាយុ១៦ឆ្នាំ ជនជាតិខ្មែរ បច្ចុប្បន្នរស់នៅភូមិជ័យជំនះ សង្កាត់ឡាបានសៀក ក្រុងបានលុង មុខរបរ មិនពិតប្រាកដ មានសារធាតុញៀនវិជ្ជមាន(+)នៅក្នុងខ្លួន។ ជនសង្ស័យ ២-ឈ្មោះ ចន ឌីណេ ភេទប្រុស អាយុ១៤ឆ្នាំ ជនជាតិខ្មែរ បច្ចុប្បន្នរស់នៅភូមិ៧មករា សង្កាត់ឡាបានសៀក ក្រុងបានលុង មុខរបរសិស្ស។
រីឯជនរងគ្រោះ ឈ្មោះ មិង នុ ភេទប្រុស អាយុ១៩ឆ្នាំ ជនជាតិទំពួន បច្ចុប្បន្នរស់នៅភូមិបាជាន់ ឃុំឯកភាព ស្រុកអូរជុំ មុខរបរសិស្ស រងរបួសធ្ងន់ ត្រូវខ្នង និងជើង។ ជនរងគ្រោះ ២-ឈ្មោះ ឌូត នៀ ភេទប្រុស អាយុ១៧ឆ្នាំ ជនជាតិគ្រឹង បច្ចុប្បន្នរស់នៅភូមិល្អក់ ឃុំល្អក់ ស្រុកអូរជុំ មុខរបរសិស្ស រងរបួសស្រាល។
បច្ចុប្បន្នជនសង្ស័យទាំង២នាក់ កំពុងឃាត់ខ្លួនបណ្ដោះអាសន្ននៅអធិការដ្ឋាននគរបាលក្រុងបានលុង និងកសាងសំណុំរឿងបញ្ជូនទៅអយ្យការអមសាលាដំបូងខេត្ត ដើម្បីផ្ដន្ទាទោសទៅតាមផ្លូវច្បាប់៕
Source: Kampuchea Thmey Daily
0 Comments