តាកែវ ៖ ជនរងគ្រោះ ជាកម្មករសំណង់ម្នាក់ បានស្លាប់បាត់បង់ជីវិតនៅកន្លែងកើតហេតុ គួរឲ្យសង្វេគ ក្រោយជួបគ្រោះចរាចរណ៍ ដោយត្រូវរថយន្តសាំយ៉ុង បុកជាមួយនឹងម៉ូតូរបស់ខ្លួន។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីព្រលប់ថ្ងៃទី១២ ខែមីនា ឆ្នាំ២០១៩ វេលាម៉ោង១៩និង១០នាទី នៅមុខមន្ទីរសុខាភិបាលខេត្តតាកែវ តាមបណ្ដោយផ្លូវជាតិលេខ២ ចន្លោះគីឡូម៉ែត្រលេខ ៧៤-៧៥ ស្ថិតក្នុងភូមិចក សង្កាត់រកាក្នុង ក្រុងដូនកែវ ខេត្តតាកែវ។
លោក ឥន្ធ មណ្ឌល អធិការនគរបាលក្រុងដូនកែវបានប្រាប់ឲ្យដឹងថា រថយន្តបង្កម៉ាកសាំយ៉ុង ពណ៌បៃតងចាស់ ពាក់ស្លាកលេខភ្នំពេញ 2R 3748 អ្នកបើកបរមិនស្គាល់អត្តសញ្ញាណ ក្រោយពេលកើតហេតុ បានទុករថយន្តចោល រួចរត់គេចខ្លួនបាត់។ ចំណែកម៉ូតូជនរងគ្រោះ ម៉ាក wave ពណ៌ខ្មៅ បើកបរដោយជនរងគ្រោះ ឈ្មោះ សន សុផាត ភេទប្រុស អាយុ៤៣ឆ្នាំ រស់នៅភូមិអង្គត្នោតខាងកើត ឃុំអង្គតាសោម ស្រុកត្រាំកក់ ខេត្តតាកែវ មុខរបរកម្មករសំណង់ បានស្លាប់ភ្លាមៗនៅកន្លែងកើតហេតុ។
ក្រោយកើតហេតុ សមត្ថកិច្ចក្រុងដូនកែវ បានចុះដល់ធ្វើកំណត់ហេតុ និងវាស់វែងតាមជំនាញ រួចបានប្រគល់សពជូនក្រុមគ្រួសារយកទៅធ្វើបុណ្យតាមប្រពៃណី ចំណែករថយន្ត និងម៉ូតូ ត្រូវបានសមត្ថកិច្ចយកមករក្សាទុកនៅអធិការនគរបាលក្រុងដូនកែវ ដើម្បីធ្វើការដោះស្រាយតាមនីតិវិធីនៅពេលក្រោយ៕
Source: Kampuchea Thmey Daily
0 Comments