លោក ហៅ សុជាតិ គ្រូបង្គោលក្លិបបាល់ទាត់បឹងកេត សមាជិកពានរង្វាន់លីគកំពូលកម្ពុជា (Metfone Cambodian League)បាន បានសម្លឹងឃើញពីចំណុចខ្វះខាតរបស់កូនក្រុមខ្លួនមុនរដូវកាលថ្មីឆ្នាំ២០១៩ចាប់ផ្តើម ខណៈលោកក៏ត្រូវការពេលកែខៃក្រុមឲ្យបានល្អ ដើម្បីប្រជែងយកពានរង្វាន់ផងដែរ។
គ្រូបង្វឹកក្រុមជើងឯករងឆ្នាំចាស់រូបនេះ បានបញ្ជាក់ថា សមាជិកក្នុងក្រុមយល់ចិត្តគ្នា៧០%ហើយ តែចំណុចមួយដែលត្រូវយកចិត្តទុកដាក់ គឺតំបន់ការពារ ដែលប៉ុន្មានប្រកួតក្នុងជំនួបមិត្តភាពកម្តៅសាច់ដុំចុងក្រោយតែងតែរបូតគ្រាប់បាល់។ «និយាយទៅចំណុចខ្វះខាត គឺការសហការគ្នាលេងជាក្រុម នៅមិនទាន់រលូន១០០ភាគរយ ហើយមួយទៀត គឺតំបន់ការពាររបស់យើងក៏ត្រូវផ្ដោតសំខាន់ដែរ ព្រោះយើងតែងតែរបូតគ្រាប់បាល់នៅប៉ុន្មានប្រកួតចុងក្រោយ»។ គ្រូបង្វឹកឆ្នើមប្រចាំឆ្នាំ២០១៧ ខាងលើបានបញ្ជាក់។
លោក ហៅ សុជាតិ បានបញ្ជាក់ថា ក្លិបបឹងកេតនាពេលបច្ចុប្បន្នក៏កំពុងព្យាយាមរៀបចំឲ្យបានរួចរាល់ដូចគ្នា មុនការប្រកួតដ៏ធំទាំង២ប្រចាំប្រទេសរួមមាន លីគកំពូល និង ពានសម្ដេចតេជោ ហ៊ុន សែន ចូលមកដល់។ បែបណាក្ដី លោកក៏បានបានសម្លឹងឃើញពីក្រុមមួយចំនួនដែលជាគូប្រជែងមានការរៀបចំខ្លួនបានប្រសើរច្រើនមុនយុទ្ធនាការរដូវកាលថ្មីមកដល់។
សូមរំលឹកថា ក្រុមបឹងកេត កាលពីរដូវកាលឆ្នាំ២០១៨ កន្លងទៅ បានបញ្ចប់ក្នុងចំណាត់ថ្នាក់លេខ២ Metfone Cambodian League មាន៤៩ពិន្ទុ ក្រោយឈ្នះបាន១៥ លើក ហើយស្មើគ្នាបាន៤ លើកនិង ចាញ់៣ប្រកួត។ ចំណែកក្នុងពានរង្វាន់សម្តេចតេជោ ហ៊ុន សែន វិញក្រុមបឹងកេត បានធ្លាក់ចេញត្រឹមវគ្គ៨ក្រុមចុងក្រោយក្រោយចាញ់ក្រុមណាហ្គាវើល៕
Source: Kampuchea Thmey Daily
0 Comments