អ្នកប្រដាល់ជើងខ្លាំងរបស់កម្ពុជា២រូប គឺផល សោភ័ណ្ឌ និង រិទ្ធ ភូលូ នឹងត្រូវជួបប្រកួតជាអ្នកប្រដាល់ថៃ នាយប់ថ្ងៃសុក្រទី០៨ ខែមីនា ឆ្នាំ២០១៩នេះ នៅលើសង្វៀនគូបូតាបាយ័នស្ទឹងមានជ័យ។
អ្នកប្រដាល់ជើងខ្លាំងកម្ពុជានោះ គឺ ផល សោភ័ណ្ឌ ក្លិបតាឡីដំរីមានរិទ្ធ ត្រូវគេផ្គូឲ្យ ឲ្យជួបប្រកួតជាមួយអ្នកប្រដាល់ថៃ ឈ្មោះ កូលាប ដាំ ប្រាន២៦(Kolabdam Phran26 ) ដោ យប្រកួតក្នុងទម្ងន់ ៦៣,៥០០ គីឡូក្រាម។ អ្នកប្រដាល់ថៃនេះ ធ្លាប់មកប្រកួតនៅស្រុកខ្មែរច្រើនលើកហើយកន្លងមក។
កូលាប ដាំ ប្រាន២៦ គេធ្លាប់មកស្រុកខ្មែរច្រើនលើកហើយកន្លងមក តែមិនដែលប៉ះប្រកួតជាមួយផល សោភ័ណ្ឌ ទេ។ អ្នកប្រដាល់ថៃនេះ កាលពីបីឆ្នាំមុន គេធ្លាប់ផ្តួលអ្នកប្រដាល់ជើងខ្លាំងរបស់កម្ពុជាបីរូប ដែលមកលើកទី១ គេបានវាយឈ្នះផាន់ គ្រាន់ ដោយពិន្ទុ(២៤មេសា២០១៦) លើកទី២ បានវាយឈ្នះសេក គឹមរួន អ្នកប្រដាល់ក្លិបអង្គរមានជ័យដោយពិន្ទុ(២៤កក្កដា២០១៦ ) លើកទី៣ថ្ងៃទី០៩តុលា២០១៦ គេបានវាយឈ្នះសូត្រ ប៊ុនធី ជើងខ្លាំងក្លិបបក្សីស្លាបដែកដោយពិន្ទុ និងលើកទី៤ថ្មីៗកន្លងទៅនេះ គេបានវាយឈ្នះសេង ស្រឿន ក្លិបមហិទ្ធរិទ្ធមាសរថ្ងកខេត្តស្វាយរៀងក្នុងទឹកទី៤ទៀត ។
អ្នកប្រដាល់ថៃរូបនេះ មានកំនត់ត្រាប្រកួតចំនួន៩៣លើក ឈ្នះ៧៧លើក ចាញ់១៤លើក និង ស្មើ០២លើក។ ទោះជាយ៉ាងណា អ្នកប្រដាល់ថៃរូបនេះ មិនប្រាកដថា អាចឈ្នះ ផល សោភ័ណ្ឌ នោះឡើយ ព្រោះថាផល សោភ័ណ្ឌនេះ គេរឹងមាំទាំងកាយសម្បទា ខ្លាំងទាំងស្នៀតប្រដាល់ ហើយវាយមិនប្រណីដៃថែមទៀត។ ចាំមើល ផល សោភ័ណ្ឌ អាចយកឈ្នះអ្នកប្រដាល់ថៃកូលាប ដាំ ប្រាន២៦ បានឬអត់ ?។
ផល សោភ័ណ្ឌ គេក៏មានផ្លែល្អដែរ ពិសេសគឺផ្លែកែង និងកណ្តាប់ដៃ ហើយ សោភ័ណ្ឌ នៅមានស្នៀតទាត់ល្អខ្លាំង និងធ្ងន់ថែមទៀត។ ឯបញ្ហាកម្លាំងស៊ុហ្វវិញ សោភ័ណ្ឌក៏រឹងមាំមិនងាយស្រុតខ្សោយនោះទេ។ ផល សោភ័ណ្ឌ មានប្រវត្តិប្រកួតមិនតិចជាង១០០លើកនោះទេ។ សោភ័ណ្ឌ មានកំណត់ត្រាប្រកួតចំនួន១៣៨លើក ក្នុងនោះ ផល សោភ័ណ្ឌ វាយឈ្នះ១២២លើកហើយ ដោយចាញ់តែ១៤លើក និងស្មើ០២លើក ហើយធ្លាប់ផ្ដួលគូប្រកួតឲ្យសន្លប់លើរេញចំនួន៤៤លើក។ ប្រកួតជាមួយថៃលើកចុងក្រោយនេះ សោភ័ណ្ឌ វាយឈ្នះRithiara កាលពីថ្ងៃទី២៤កុម្ភៈកន្លងមកនេះ។
ទោះជាយ៉ាងណា ផល សោភ័ណ្ឌ ដែលជួបប្រកួតជាមួយថៃកូលាប ដាំ នេះ គេមិនហ៊ានអះអាងមុនថា សោភ័ណ្ឌ ឈ្នះក្នុងការប្រកួតនេះទេ។ ចាំមើល តើផល សោភ័ណ្ឌ ឈ្នះឬមួយក៏ Kolabdam Phran26 ឈ្នះសម្រាប់ការជួបគ្នានេះ?។
ចំពោះ អ្នកប្រដាល់ជើងខ្លាំងស្រករក្រោយ រិទ្ធ ភូលូ ក្លិបអាណាចក្រគុនខ្មែរ នឹងត្រូវជួបសាកកណ្ដាប់ដៃជាមួយអ្នកប្រដាល់ថៃជើងខ្លាំងឈ្មោះ ហ្វានីមិត្ត(Fa Nimith Phran26)។ ពួកគេទាំងពីរប្រកួតគ្នាក្នុងទម្ងន់៦៣,៥០០គីឡូក្រាម។
ជាលើកទី១៥ សម្រាប់រិទ្ធ ភូលូ ហើយ ដែលបានជួបប្រកួតជាមួយអ្នកប្រដាល់ថៃនេះ។ ក្នុង១៤លើកកន្លងមក ភូលូ វាយឈ្នះថៃ១៣លើក និងចាញ់២លើក។ ការជួបថៃលើកចុងក្រោយនេះ (១៧កុម្ភៈ២០១៩) ភូលូ វាយឈ្នះឃុម ផេត ក្នុងទឹកទី៣។
រិទ្ធ ភូលូ ទោះជាគេទើបបានផ្គូផ្គងឲ្យជួបបរទេសក៏ដោយ តែដោយសារមានចិត្តប្រដាល់ធំ គេឡើងប្រកួតដោយគ្មានខ្លាចញញើតទេ។ គេទើបឡើងប្រកួតបានចំនួន៦១លើកប៉ុណ្ណោះ ក្នុងនោះ វាយឈ្នះ៤៤លើក ចាញ់១៣លើក និងស្មើ០៤លើក ហើយធ្លាប់ផ្តួលដៃគូឲ្យសន្លប់បានចំនួន១៧លើក។
ហ្វា នីមិត្ត ប្រាន២៦ គេជាអ្នកប្រដាល់ថៃជើងចាស់ ធ្លាប់មកប្រកួតនៅកម្ពុជាយើងច្រើនដងហើយកន្លងមក ។ យ៉ាងណា អ្នកប្រដាល់ថៃរូបនេះ គេខ្លាំងគួរសមដែរ ។ ព្រោះបើតាមប្រវត្តិហ្វានីមិត្ត ល្អនិងខ្លាំង ដែលមិនអាចមើលស្រាលបានឡើយ។ អ្នកប្រដាល់ថៃនេះ ជាជើងខ្លាំងទម្ងន់៦៣,៥០០គីឡូក្រាមប្រចាំនៅស្រុកថៃ។ គេមានប្រវត្តិប្រកួតតែចំនួន៧៣លើក ក្នុងនោះវាយឈ្នះ៥៨លើក ចាញ់១២លើក និងស្មើ០៣លើក។
អ្នកប្រដាល់ថៃរូបនេះ មានផ្លែមុតស្រួចល្អ ទាំងកណ្ដាប់ដៃ ទាត់ និង ជង្គង់ ហើយថែមទាំងមិនចេញខ្លាចទៀតផង។ បើប្រៀបជាមួយរិទ្ធ ភូលូ គឺមិនដឹងថា យ៉ាងណានោះទេ ព្រោះថា រិទ្ធ ភូលូ គេក៏វាយមិនចេះខ្លាចដែរនោះ។
យ៉ាងណា ប៉ះជាមួយរិទ្ធ ភូលូ អ្នកប្រដាល់ហ្វានីមិត្ត ក៏មិនជាស្រួលប៉ុន្មានដែរ ព្រោះថា ភូលូ គេវាយបុកខ្លាំង កណ្ដាប់ដៃខ្លាំង ទម្ងន់ជើងក៏ធ្ងន់ដែរ។ តែយ៉ាងណា រិទ្ធ ភូលូ ក៏ត្រូវប្រយ័ត្នដែរ សម្រាប់ការប្រកួតលើកនេះ។ ដូច្នេះ ចាំមើល តើ រិទ្ធ ភូលូ អាចយកឈ្នះហ្វា នីមិត្តប្រាន ២៦ បានឬអត់ ក្នុងការជួបគ្នាលើកដំបូងនេះ?៕
Source: Kampuchea Thmey Daily
0 Comments