ប្រព័ន្ធផ្សព្វផ្សាយរដ្ឋបានផ្សាយថា មេដឹកនាំកូរ៉េខាងជើងលោកគីមជុងអ៊ុនបានវិលមកដល់ប្រទេសវិញហើយនៅថ្ងៃអង្គារ ដោយបានបញ្ចប់ដំណើរដ៏វែងឆ្ងាយរបស់លោកឆ្លងកាត់ប្រទេសចិន បន្ទាប់ពីកិច្ចប្រជុំកំពូលនៅទីក្រុងហាណូយរបស់លោកជាមួយប្រធានាធិបតីអាមេរិកលោកដូណាល់ត្រាំបានបញ្ចប់ទៅដោយគ្មានកិច្ចព្រមព្រៀងនុយក្លេអ៊ែរមួយឡើយ.
ការវិលត្រលប់របស់លោកគីមមកកាន់ទីក្រុងព្យុងយ៉ាងគឺសម្គាល់ជាការបញ្ចប់ការធ្វើដំណើរចម្ងាយ៤,០០០គីឡូម៉ែត្រចេញពីប្រទេសវៀតណាម។
ក្រោយមកមានដំណើរទស្សនកិច្ចជាផ្លូវការមួយទៅកាន់ប្រទេសនេះដែលជាកន្លែងលោកគីមបានសម្តែងការគោរពចំពោះមេដឹកនាំបដិវត្តន៍វៀតណាមលោកហូជីមិញ។
ទីភ្នាក់ងារព័ត៌មាន KCNA ផ្លូវការបានផ្សាយថា “លោកគីមជុងអ៊ុនបានមកដល់ប្រទេសវិញនៅថ្ងៃអង្គារបន្ទាប់ពីបានបញ្ចប់ដោយជោគជ័យនូវដំណើរទស្សនកិច្ចសុច្ឆន្ទៈផ្លូវការរបស់លោកទៅកាន់សាធារណរដ្ឋសង្គមនិយមវៀតណាម”។ ទីភ្នាក់ងារនេះបានបន្ថែមថា “នៅម៉ោង៣ព្រឹកព្រលឹម រថភ្លើងរបស់លោកបានចូលក្នុងស្ថានីយរថភ្លើងក្នុងទីក្រុងព្យុងយ៉ាង”។
កិច្ចចរចារវាងលោកគីមនិងលោកត្រាំនៅទីក្រុងហាណូយបានបញ្ចប់ភ្លាមៗខណៈពិធីចុះហត្ថលេខាត្រូវលុបចោលបន្ទាប់ពីអ្នកទាំងពីរបានបរាជ័យក្នុងការឈានដល់កិច្ចព្រមព្រៀងមួយស្តីពីការរំសាយកម្មវិធីនុយក្លេអ៊ែររបស់កូរ៉េខាងជើងជាថ្នូរនឹងការដកទណ្ឌកម្ម។
ទាំងទីក្រុងវ៉ាស៊ីនតោននិងក្រុងព្យុងយ៉ាងបានបន្ទោសគ្នាទៅវិញទៅមកសម្រាប់ការដួលរលំនៃកិច្ចចរចានេះ។
កាសែត Rodong Sinmun ដ៏ធំរបស់ប្រទេសកូរ៉េខាងជើងបានរាយការណ៍ពីមុនថា លោកគីមនិងលោកត្រាំបានយល់ព្រមបន្តការពិភាក្សាដើម្បីដោះស្រាយបញ្ហាដែលបានលើកឡើងនៅក្នុងកិច្ចប្រជុំកំពូលនៅទីក្រុងហាណូយ៕ AFP
Source: Kampuchea Thmey Daily
0 Comments