ជាងជី លក់គ្រឿងបន្លាស់រថយន្ត បានស្លាប់ភ្លាមៗនៅនឹងកន្លែង និងប្រពន្ធរងបួសធ្ងន់

Cambodia News March 06, 2019

ព្រះសីហនុ ៖ រថយន្តតាក់ស៊ី មួយគ្រឿង ខណៈពេលចូល ទៅដូរអំពូល បានជាន់ហ្គែរច្រឡំថាហ្វ្រាំង បណ្ដាល ឲ្យរថយន្ត ស្ទុះទៅបុកថៅកែលក់គ្រឿងបន្លាស់រថយន្ត និងជួសជុលរថយន្ត(យីហោជាងជី)យ៉ាងពេញទំហឹង ផ្ទប់ទៅនឹងជញ្ជាំងផ្ទះ បណ្ដាលឲ្យស្លាប់ភ្លាមៗ នៅនឹង កន្លែងកើតហេតុ តែម្តង និង ស្ត្រីជាប្រពន្ធ រងរបួសធ្ងន់។

ហេតុការណ៍ដ៏គួរឲ្យរន្ធត់នេះ បានកើតឡើង នៅវេលាម៉ោងប្រមាណ១៩:០០នាទី ព្រលប់ ថ្ងៃទី០៥ ខែមីនា ឆ្នាំ២០១៩ ស្ថិតលើផ្លូវសេរីភាព ស្ថិតនៅក្នុងភូមិ២ សង្កាត់លេខ៤ ក្រុង/ខេត្តព្រះសីហនុ។

សមត្ថកិច្ច ប៉ូលិស រដ្ឋបាលសង្កាត់លេខ ០៤ បានឲ្យដឹងថា ជនរងគ្រោះ មានឈ្មោះ វ៉ន វាសនា ភេទ ប្រុស អាយុ ៣៣ឆ្នាំ ហៅជាងជី មុខរបរ លក់គ្រឿងបន្លាស់និងជួសជុល រថយន្ត(ស្លាប់) និងប្រពន្ធឈ្មោះ ទៀង ហុង ភេទ ស្រី អាយុ ៣៥ឆ្នាំ មានទីលំនៅភូមិ២ សង្កាត់លេខ៤ ក្រុង/ខេត្តព្រះសីហនុ។ ចំណែករថយន្ត បង្កម៉ាក HIGHLANDED ពណ៌ ពាក់ស្លាកលេខភ្នំពេញ2AJ-1584 បើកបរដោយឈ្មោះ ធាំ រ៉េត ភេទប្រុស អាយុ ៤៧ឆ្នាំ មុខរបរ អ្នករត់តាក់ស៊ី មានទីលំនៅភូមិ៤ សង្កាត់លេខ៤ ក្រុង/ខេត្តព្រះសីហនុ។

ទាក់ទិនទៅនឹងហេតុការណ៍នេះ បើតាម សាក្សី រស់នៅក្បែរកន្លែងកើតហេតុ បាន ឲ្យដឹងថា នៅមុន ពេល កើតហេតុ គេឃើញ រថយន្តម៉ាក HIGHLANDED ពណ៌ ពាក់ស្លាកលេខភ្នំពេញ2AJ-1584 បាន បើកចូលទៅ ផ្ទះលក់គ្រឿងបន្លាស់រថយន្ត ខាងលើ ក្នុងគោលបំណងផ្លាស់ប្ដូរអំពូលភ្លើងរថយន្តរបស់ខ្លួន។ លុះក្រោយមក ខណៈពេលជនរងគ្រោះ ដែលជាម្ចាស់ហាង កំពុងធ្វើការ ដោះដូរ អំពូលរថយន្ត ក៏ស្រាប់ រថយន្តនោះ រអិលថយក្រោយ ឃើញបែបនេះ ម្ចាស់រថយន្តបង្កហេតុ ក៏បាន ស្ទុះទៅឡើងទៅរថយន្ត របស់ខ្លួន ក្នុងគោល បំណងជាន់ ហ្វ្រាំង ប៉ុន្តែចៃដន្យ បានជាន់ច្រឡំហ្គែរ ខណៈពេល រថយន្ត ជាប់(លេខ D) ក៏បានស្ទុះ ទៅបុក ជនរងគ្រោះ និងប្រពន្ធផ្ទប់ទៅនឹងជញ្ជាំងផ្ទះ ក្នុងពេលនោះតែម្តង បណ្ដាលប្តី ស្លាប់ នៅនឹងកន្លែង និងប្រពន្ធ រងរបួស ធ្ងន់ និងបង្កខូចខាត របស់របរ សម្ភារៈក្នុង ផ្ទះ មួយចំនួនផងដែរ។

បច្ចុប្បន្ន តៃកុងរថយន្ត បង្កហេតុ ត្រូវបាន សមត្ថកិច្ច ប៉ូលិស ឃាត់ខ្លួន នាំយកទៅធ្វើការសាកសួរ ដើម្បីបន្តនីតិវិធី ចាត់ការតាមផ្លូវច្បាប់ ចំណែករថយន្ត បង្កត្រូវបាន នាំយកទៅរក្សាទុក នៅការិយាល័យ នគរបាលចរាចរណ៍ផ្លូវគោក៕