ភ្នំពេញ ៖ ចោរលួចម៉ូតូម្នាក់ ត្រូវបានប្រជាជនចាប់បានយកមកប្រគល់ឲ្យប៉ូលិសមូលដ្ឋាន ចាត់ចែងតាមច្បាប់ កាលពីយប់ថ្ងៃទី៥ ខែមីនា ឈានចូលថ្ងៃទី៦ ខែមីនា ឆ្នាំ២០១៩ នៅក្នុងបរិវេណផ្ទះសំណាក់មួយ ស្ថិតក្នុងសង្កាត់ភ្នំពេញថ្មី ខណ្ឌសែនសុខ។
អត្តសញ្ញាណជនជាប់ចោទខាងលើ ឈ្មោះ ជា រតនៈ ហៅរ័ត្ន ភេទប្រុស អាយុ៣៣ឆ្នាំ គ្មានមុខរបរច្បាស់លាស់ ស្នាក់នៅចល័តក្នុងរាជធានីភ្នំពេញ នៅថ្ងៃកើតហេតុ មកជួលបន្ទប់លេខ២៧ នៃផ្ទះសំណាក់ យីហោ "ស្កាយ"ស្នាក់នៅ មានទីតាំងនៅភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ។
ប៉ូលិសមូលដ្ឋានសង្កាត់ភ្នំពេញថ្មីបានឲ្យដឹងថា ជនសង្ស័យជាចោរលួចម៉ូតូគេខាងលើ ត្រូវបានចាប់ខ្លួនតាមបណ្តឹងរបស់ប្រជាជនរងគ្រោះម្នាក់ ឈ្មោះ ប៊ុន ហួច ភេទប្រុស អាយុ២២ឆ្នាំ មុខរបរបុគ្គលិកក្រុមហ៊ុនឯកជនមួយ ស្នាក់នៅបន្ទប់ផ្ទះជួល នៃលេខ៤៧ "ផ្ទះសំណាក់ ស្កាយ" នោះដែរ។
បើតាមការបញ្ជាក់ប្រាប់ពីជនរងគ្រោះជាដើមបណ្តឹង បានឲ្យដឹងថា នៅមុនពេលកើតហេតុ ជនរងគ្រោះបានទុកម៉ូតូរបស់គាត់ម៉ាក Zoomer X ស៊េរី ឆ្នាំ២០១៨ ពាក់ស្លាកលេខ ខេត្តពោធិ៍សាត់ 1H.6997 នៅក្នុងបន្ទប់ដេករបស់គាត់ និងបានដេកលង់លក់ទៅ លុះពេលភ្ញាក់ឡើងមិនឃើញម៉ូតូ ក៏ផ្អើលឆោឡោឡើង និងបានទៅដាក់ពាក្យបណ្តឹងឲ្យនគរបាលមូលដ្ឋានជួយអន្តរាគមន៍សុំឆែកកាមេរ៉ាសុវត្ថិភាពនៅក្នុងផ្ទះសំណាក់នោះមើល។
នៅពេលឆែកឆេរទិន្នន័យក្នុងកាមេរ៉ាសុវត្ថិភាព ឃើញរូបភាពជនសង្ស័យជាចោរ បានជួលបន្ទប់លេខ២៧ នៃផ្ទះសំណាក់នេះ ស្នាក់នៅ ស្គាល់ ឈ្មោះ ជា រតនះ។ បើតាមរបាយការណ៍របស់ម្ចាស់ផ្ទះសំណាក់ ជនសង្ស័យរួបនេះ បានមកជួលបន្ទប់ស្នាក់នៅ កាលពីវេលាម៉ោង៧ព្រឹក ថ្ងៃទី០៥មីនា នេះ ក្នុងគម្រោងសុំជួលស្នាក់នៅរយៈពេល៣ថ្ងៃ ប៉ុន្តែទើបតែថ្ងៃទី១ សោះ មកលួចម៉ូតូទៅបាត់ដូច្នេះ។
ក្រោយពេលស្គាល់មុខអត្តសញ្ញាណជនសង្ស័យច្បាស់ហើយ ក្រុមគ្រួសារជនរងគ្រោះបាននាំគ្នាតាមឃ្លាំមើល និងស្វែងរកជនសង្ស័យ លុះដល់វេលាម៉ោង២៤និង៣០នាទីរំលងអធ្រាត្រ ឈានចូលថ្ងៃទី៦ ខែមីនា ឆ្នាំ២០១៩ បានប្រទះឃើញជនសង្ស័យដើរចូលមកក្នុងបន្ទប់ផ្ទះសំណាក់វិញ ទើប ទូរស័ព្ទហៅប៉ូលិសមូលដ្ឋានឲ្យមកជួយអន្តរាគមន៍ ប៉ុន្តែដោយសារប៉ូលិសយឺតយ៉ាវពេក ជនសង្ស័យប្រុងគេចខ្លួនត្រឡប់ទៅវិញ ទើបជនរងគ្រោះឃាត់ខ្លួនឲ្យឈប់ តែមិនឈប់ ព្រោះចោរអាងមាឌធំមាំ ក៏ស្រែកចោរៗផ្អើលដល់ប្រជាជនក្បែរនោះនាំគ្នាជួយចាប់ខ្លួនវាយទាត់ធាក់មួយដៃមួយជើងម្នាក់ទើបចាប់ខ្លួនបានប្រគល់ឲ្យលោកប៉ូលិសមូលដ្ឋានមកទទួលយកចាត់ការតាមច្បាប់ ប៉ុន្តែម៉ូតូរបស់ជនរងគ្រោះបាត់ឈឹងហើយ មិនដឹងយកទៅលក់ ឬលាក់ទុកទីណាទេ ប៉ូលិសកំពុងសាកសួរ៕
Source: Kampuchea Thmey Daily
0 Comments