ភ្នំពេញ ៖ រដ្ឋសភា នឹងបើកសម័យប្រជុំពេញអង្គលើកទី២ នីតិកាលទី៦ នៅថ្ងៃទី១ ខែមេសាខាងមុខ ក្រោមអធិបតីភាពដ៏ខ្ពង់ខ្ពស់សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា។
នេះបើតាមប្រសាសន៍លើកឡើងរបស់លោក ឡេង ប៉េងឡុង អគ្គលេខាធិការរដ្ឋសភា បានប្រាប់ក្រុមអ្នកសារព័ត៌មាន បន្ទាប់ពីបញ្ចប់កិច្ចប្រជុំគណៈកម្មាធិការអចិន្ត្រៃយ៍រដ្ឋសភា នៅព្រឹកថ្ងៃទី ២៦ ខែមីនានេះ នាវិមានរដ្ឋសភា។ សម័យប្រជុំរដ្ឋសភាលើកទី២ នីតិកាលទី៦នេះ មានរបៀបវារៈចំនួន២ គឺ១-ព្រះរាជសារព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជូនសម័យប្រជុំរដ្ឋសភាលើកទី២ នីតិកាលទី៦។ ២-របាយការណ៍ស្តីពីសកម្មភាពរបស់រដ្ឋសភាចន្លោះសម័យប្រជុំរដ្ឋសភាលើកទី១ និងលើកទី២ នីតិកាលទី៦ ចាប់ពីខែទី១ រហូតដល់ខែទី៣នេះ។ លោកអគ្គលេខាធិការរដ្ឋសភា បានបន្តទៀតថា សម័យប្រជុំនេះដែរក៏នឹងមានការបោះឆ្នោតជ្រើសតាំងលោកស្រី លី វួចឡេង ជាសមាជិកក្រុមប្រឹក្សាធម្មនុញ្ញ សម្រាប់អាណត្តិឆ្នាំ(២០១៩-២០២៨) ព្រមទាំងមានការបោះឆ្នោតជ្រើសតាំងលោក ប្រាជ្ញ ច័ន្ទ ជាសមាជិកគណៈកម្មការសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា ព្រឹទ្ធសភា និងបោះឆ្នោតជ្រើសតាំងលោក ច័ន្ទ សុផល ជាសមាជិកគណៈកម្មការមហាផ្ទៃ ការពារជាតិ និងមុខងារសាធារណៈ៕
Source: Kampuchea Thmey Daily
0 Comments