ការិយាល័យប្រឆាំងបទល្មើសសេដ្ឋកិច្ច ចុះបង្ក្រាបទីតាំងកែច្នៃឈើខុសច្បាប់ ប្រមាណជាង៦ម៉ែត្រគូប

Cambodia News March 26, 2019

ស្ទឹងត្រែង ៖ កម្លាំងការិយាល័យប្រឆាំងបទល្មើសសេដ្ឋកិច្ចខេត្ត ស្ថិតក្រោមការស្រាវជ្រាវ របស់លោកវរសេនីយ៍ឯក វ៉ា សុផាន់ បានដឹកនាំកម្លាំងរបស់លោក ចុះមកកាន់ទីតាំងកែច្នៃឈើខុសច្បាប់មួយកន្លែង និងបានរាយការណ៍ជូន ឯកឧត្ដម ម៉ុម សារឿន អភិបាលខេត្តបានបញ្ជាកម្លាំងរដ្ឋបាលព្រៃឈើខេត្ត ចុះមកដល់ទីតាំង ដើម្បីចាត់ការតាមផ្លូវច្បាប់។

ប្រតិបត្តិការបង្ក្រាបទីតាំងកែច្នៃឈើខុសច្បាប់នេះ បានធ្វើឡើងកាលពីវេលាម៉ោង 10 និង 30 នាទីព្រឹកថ្ងៃទី25 ខែមីនា ឆ្នាំ 2019 ត្រង់ចំណុចភូមិខ្សាច់ថ្មី ឃុំតាឡាត ស្រុកសេសាន ខេត្តស្ទឹងត្រែង។

លោកវរសេនីយ៍ឯក វ៉ា សុផាន់ នាយការិយាល័យប្រឆាំងបទល្មើសសេដ្ឋកិច្ចខេត្តបានបញ្ជាក់ថាទីតាំងកែច្នៃឈឺខុសច្បាប់នេះ ត្រូវបានកម្លាំងរបស់លោកចុះស្រាវជ្រាវរកឃើញថា បានកែច្នៃឈើខុសច្បាប់អស់រយៈពេល 1 ខែកន្លងមកហើយ ក្រោយពីបានដឹងនៅថ្ងៃខាងលើ កម្លាំងរបស់ លោកបានចុះមកឈរជើងនៅទីតាំងកែច្នៃឈើ និងបានរាយការណ៍ជូនទៅឯកឧត្ដមអភិបាលខេត្ត បញ្ជាឲ្យកម្លាំងរដ្ឋបាលព្រៃឈើខេត្ត ចុះមកដល់ទីតាំង ដើម្បីដកហូតវត្ថុតាង ដែលមាននៅទីតាំងនោះចាត់ការតាមនីតិវិធី។

លោកវរសេនីយ៍ឯកបន្តថា មុនពេលកម្លាំងរបស់លោកចុះដល់ទីតាំងកែច្នៃឈើខុសច្បាប់ម្ចាស់សិប្បកម្មហាក់បីដូចដឹងខ្លួនមុន បានធ្វើការរត់គេចខ្លួនបាត់ស្រមោលបន្សល់ទុក តែវត្ថុតាងដូចជាម៉ាស៊ីនជ្រាកម៉ាស៊ីនឈូស និងសម្ភារៈផ្សេងៗទៀតសម្រាប់កែច្នៃឈើតែប៉ុណ្ណោះ រួមទាំងឈើដែលនៅសេសសល់មានចំនួនប្រមាណជាង៦ម៉ែត្រគូប។

បច្ចុប្បន្ន នៅរសៀលថ្ងៃទី 25 មីនានេះ ទីតាំងកែច្នៃឈើខុសច្បាប់កម្លាំងជំនាញរួមមាន កម្លាំងនគរបាលការិយាល័យប្រឆាំងបទល្មើសសេដ្ឋកិច្ច និងរដ្ឋបាលព្រៃឈើកំពង់ឈរជើងនៅទីតាំងនោះដើម្បីធ្វើកំណត់ហេតុដកហូតឈើខុសច្បាប់ដឹកជញ្ជូនទៅកាន់រដ្ឋបាលព្រៃឈើចាត់ការទៅតាមនីតិវិធី៕