ព្រះអង្គ៤អង្គ សមណសិស្ស១៨៤អង្គ/នាក់ បានប្រឡងចូលរៀនពុទ្ធិកអនុវិទ្យាល័យ សម្ដេច ជា ស៊ីម ខេត្តបន្ទាយមានជ័យ

បន្ទាយមានជ័យ ៖ នៅព្រឹកថ្ងៃទី៦ ខែកុម្ភៈ ឆ្នាំ២០១៩នេះ សមណសិស្សចំនួន១៨៤អង្គ/នាក់ បានប្រឡងចូលរៀនពុទ្ធិកអនុវិទ្យាល័យ សម្ដេច ជា ស៊ីម ខេត្តបន្ទាយមានជ័យ ស្ថិតក្នុងបរិវេណវត្តស្វាយចាស់ ស្ថិតក្នុងភូមិ១ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។

ពិធីនេះមានការចូលរួម លោក យឹម យឿន ប្រធានមន្ទីរធម្មការសាសនាខេត្តបន្ទាយមានជ័យ ព្រះឧត្តមសីលញាណ ធុលសុធា ព្រះមេគណខេត្តបន្ទាយមានជ័យ និងសមណសិស្សចំនួន១៨៤អង្គ/នាក់។

ក្នុងពិធីនេះ លោក យឹម យឿន បានមានប្រសាសន៍ថា ថ្ងៃនេះ លោកមានសេចក្តីរំភើបណាស់ ដែលបានចូលរួមធ្វើគណៈមេប្រយោគប្រឡងសមណសិស្សចំនួន១៨៤អង្គ/នាក់ ប្រឡងចូលរៀនពុទ្ធិកអនុវិទ្យាល័យ សម្ដេច ជា ស៊ីម ខេត្តបន្ទាយមានជ័យ ដែលមាន៨បន្ទប់ ក្នុងនោះរួមមាន វិញ្ញាសា ព្រឹកប្រឡងវិញ្ញាសា ភាសាបាលី និង សរសេរតាមអាន លុះនៅពេលល្ងាចប្រឡងវិញ្ញាសាព្រះវិន័យ និងគណិតវិទ្យា ហើយក្នុងការប្រឡងនោះ មានរយៈពេលពេញ១ថ្ងៃពេញ។

លោកបានបញ្ជាក់ទៀតថា ព្រះសង្ឃ ដែលបានប្រឡងចូលរៀនពុទ្ធិកអនុវិទ្យាល័យ សម្ដេច ជា ស៊ីម ខេត្តបន្ទាយមានជ័យនេះ កន្លងមក ព្រះ១អង្គៗ ខិតខំរៀនសូត្រយ៉ាងយកចិត្តទុកដាក់គ្រប់វត្តនៅក្នុងខេត្តបន្ទាយមានជ័យនេះ ខិតខំរៀនសូត្រយ៉ាងខ្លាំងនោះ ធ្វើឲ្យពុទ្ធចក្រមានការរីកចម្រើនឥតឈប់ឈរក្នុងរយៈពេលជាច្រើនឆ្នាំកន្លងមកនេះ។

ក្នុងនោះ លោក បានធ្វើការកោតសរសើរដល់ព្រះសង្ឃដែលបានខិតខំរៀនសូត្ររហូតដល់បានប្រឡងចូលរៀនពុទ្ធិកអនុវិទ្យាល័យ សម្ដេច ជា ស៊ីម ខេត្តបន្ទាយមានជ័យក្នុងថ្ងៃនេះ ស.បញ្ជាក់ឲ្យឃើញថា វិស័យព្រះពុទ្ធសាសនា នៅក្នុងខេត្តបន្ទាយមានជ័យ មានការរីកចម្រើនយ៉ាងខ្លាំងទាំងផ្នែកពុទ្ធចក្រ រួមជាមួយអាណាចក្រ មិនអាចខ្វះបានឡើយ។

លោក យឹម យឿន បានបញ្ជាក់ទៀតថា ទន្ទឹមនឹងការរីកចម្រើន ក៏នៅមានបញ្ហាមួយចំនួនតូចមិនអាចគេចបានឡើយ ដូចជា ព្រះសង្ឃ មិនគោរពពិន័យសង្ឃជាដើម។ ដោយឈរលើទស្សនៈថាព្រះពុទ្ធសាសនា ជាកម្លាំងដឹកនាំចរិយាធម៌សង្គម តាមវត្តអារាមដែលជាការរួមចំណែកការកសាងធនធានមនុស្សល្អដល់សង្គមជាតិ។ សាសនា ជាវិស័យអប់រំមួយប្រកបដោយធម៌ និងមានប្រសិទ្ធភាពខ្ពស់ ត្រូវប្រកាន់យកព្រះពុទ្ធសាសនាឱវាទ ដែលមានព្រះត្រៃបីដកជាគោលធ្វើជាប្រទីបសម្រាប់បំភ្លឺផ្លូវសម្រាប់អប់រំ ចរិយាធម៌ ជម្រះចោលនូវគំនុំការច្រណែននិន្ទា ឈ្នានីស ប្រកបដោយអហិង្សាជាដើម។

លោក យឹម យឿន បានបញ្ជាក់ទៀតថា ជំនឿសាសនា ពិតជាសំខាន់ណាស់មិនអាចខ្វះបានឡើយដើម្បីឲ្យព្រះពុទ្ធសាសនាស្ថិតស្ថេររឹងមាំបានយូរអង្វែង ត្រូវមានអ្នកបួស ឬព្រះសង្ឃ មានមុខងារសំខាន់ណាស់សម្រាប់ដឹកនាំពុទ្ធសាសនា និងការរៀនសូត្រធម៌វិន័យ ហើយបដិបត្តិអប់រំផ្លូវចិត្តឲ្យល្អនិងបានយកចំណេះដឹងនោះទៅអប់រំទូន្មានដល់ពុទ្ធបរិស័ទ ឲ្យប្រព្រឹត្តសុចរិត ឲ្យស្រឡាញ់រាប់អានគ្នា សាមគ្គី ចេះស្រឡាញ់គ្នា និងរក្សាសម្បត្តិវប្បធម៌ជាតិ ប្រពៃណី ទំនៀមទម្លាប់ ដែលមានពីអតីតកាលឲ្យគង់វង្សផងដែរ៕