ឧត្ដរមានជ័យ ៖ មន្ត្រីនគរបាលទំនើងបម្រើការងារនៅអង្គភាព វរៈការពារព្រំដែនគោក លេខ៩០៥ ចំនួនពីររូប និងបក្សពួកជាក្មេងស្ទាវ ជិត១០ បានព្រួតគ្នាវាយយុវជនម្នាក់ ស្ទើរស្លាប់ស្ទើររស់ និងរងរបួសហើមឈើងខៀវភ្នែក ឈាមឡើងពេញគ្រប់ភ្នែក។
ហេតុការណ៍នេះ បានកើតឡើងនៅវេលាម៉ោង៨និង៣០នាទីយប់ថ្ងៃទី៣ ខែមីនា ឆ្នាំ២០១៩ ស្ថិតនៅក្នុងរោងកម្មវិធីឡើងគេហដ្ឋាន មួយកន្លែងស្ថិតនៅភូមិអូតាម៉ែង ឃុំអន្លង់វែងស្រុកអន្លង់វែងខេត្តឧត្ដរមានជ័យ។
ជនរងគ្រោះឈ្មោះ ឃឹម ឃាង ភេទប្រុសអាយុ ១៨ឆ្នាំរស់នៅភូមិរំចេកឃុំអន្លង់វែងស្រុកអន្លង់វែង ខេត្តឧត្ដរមានជ័យ។
ប្រជាការពារភូមិអូតាម៉ែង ដែល នៅក្នុងហេតុការណ៍ បានអោយដឹងថា ជនបង្កឈ្មោះ ទី១ ឈ្មោះ ង៉ោល សុភ័ណ្ឌ ហៅចំរើន ទី២ ឈ្មោះ ឌៀ ជាមន្ដ្រីនគរបាលវរៈការពារព្រំដែនគោកលេខ៩០៥ នៃស្នងការនគរបាលខេត្តឧត្ដរមានជ័យ និងជនបង្កជាបក្សពួកម្នាក់ទៀតឈ្មោះ រ៉ាន់ និងបក្សពួកជិត១០នាក់សេងទៀតដែលមិនបានស្គាល់ឈ្មោះ។
ប្រជាការពារភូមិបានបញ្ជាក់បន្ដថា ក្រុមជនដៃដល់ជាមន្ដ្រីប៉ូលិសសាហាវៗខ្លាំងណាស់ ពួកគាត់ជាសន្តិសុខភូមិ៤ទៅ៥នាក់ចូលឃាត់ ក៏មិនឈ្នះដែរ គាត់សូមអំពាវនាវដល់អ្នកច្បាប់ជួយចាត់វិធានការតាមច្បាប់ផង។
ជនរងគ្រោះបានអោយដឹងថា មុនពេលកើតហេតុរូបគាត់បានហូបចុកក្នុងកម្មវិធីឡើងគេហដ្ឋាន នៅភូមិឃុំខាងលើ ពេលកំពុងហូបចុក គាត់បានក្រោកដើរចេញពីតុដែលខ្លួនអង្គុយ ទៅរកជល់កែវមិត្តភក្ដិ ក៏បានកំពប់ទឹកក្រូចអ្នកអង្គុយជិតស្រក់ទៅលើតុមន្ដ្រីប៉ូលិសឈ្មោះ ង៉ោល សុភ័ណ្ឌ ហៅចំរើន អង្គុយ ហើយខ្លួនក៏បានលើកដៃសំពះសុំទោស និងជួយរកតុថ្មីប្ដូរអោយរួចហើយដែរ។
ក្រោយមក ពេលរូបគាត់ចូលរាំលេងបានបន្តិច ស្រាប់តែមន្ដ្រីប៉ូលិសរូបនេះ បានលោតទៅដាល់គាត់ចំភ្នែកតែម្ដងនិងមានបក្សពួកជិត១០នាក់ ព្រួតគ្នាវាយគាត់បន្ថែមទៀត ស្ទើរស្លាប់ស្ទើររស់កុំតែបានប្រជាការពារភូមិជួយឃាត់ខំអីប្រហែលអាចនិងស្លាប់បាត់បង់ជីវិត។
លោកង៉ោ សុភ័ណ្ឌ ហៅ ចំរើន ដែលជាជនដៃដល់បានអោយដឹងថា យុវជនខាងលើឈ្លើយពេកទើបលោកវាយ ព្រោះគ្រោះស្រាក្រឡុកឃ្ទាតលើគេលើឯងក្នុងកម្មវិធី និងរាំមិនសុភាពដូចគេឯង៕
Source: Kampuchea Thmey Daily
0 Comments