រថយន្ត បុក​ម៉ូតូ​ ​ចំណុច​រង្វង់​មូល​រូប​ទូក ​ក្នុង​សង្កាត់​ខ្សា​ម​កំពុង​អភិវឌ្ឍន៍​ថ្មី​ ស្លាប់​យុវជន​២​នាក់

កំពង់ឆ្នាំង ​៖ យុវជន​ម្នា​ក់ បាន​ស្លាប់​នៅនឹងកន្លែង​កើតហេតុ និង​ម្នាក់ទៀត​ បាន​ស្លាប់​ពេល​បញ្ជូនទៅ​សង្គ្រោះ​នៅ​មន្ទីរពេទ្យ​ខេត្ត​កំពង់ឆ្នាំង​ និង​បន្តទៅ​មន្ទីរពេទ្យ​ទីក្រុង​ភ្នំពេញ ដោយសារ​គ្រោះថ្នាក់​ចរាចរណ៍ ​រថយន្ត​មិន​ស្គាល់​ម៉ាក​មួយគ្រឿង ​បុក​ម៉ូតូ​ជនរងគ្រោះ​ខាងលើ​ ដែល ជិះ​គ្នា២​នាក់​ ក្នុង​ដំណើរ​ច្រាស​ទិស​គ្នា។

គ្រោះថ្នាក់​នេះ​ បាន​កើតឡើង​នៅវេលា​ម៉ោង 9 និង 30 នាទី​យប់ ​ថ្ងៃទី​3 ខែមីនា ឆ្នាំ 2019 នៅ​លើ​បណ្ដោយ​ផ្លូវ​លេខ1 ចំណុច​រង្វង់​មូល​ទូក ស្ថិតនៅ​ក្នុងភូមិ​ទី​7 សង្កាត់​ខ្សា​ម ក្រុង​កំពង់ឆ្នាំង ខេត្ត​កំពង់ឆ្នាំង។

សមត្ថកិច្ច​នគរបាល​មូលដ្ឋាន​បានឲ្យ​ដឹងថា​ ជនរងគ្រោះ​ដែល​បាន​ស្លាប់​នៅនឹងកន្លែង​មាន ឈ្មោះ​ប្រាក់ ណា​រា អាយុ 20 ឆ្នាំ​ រស់នៅ​ភូមិ​ទី7 សង្កាត់​ខ្សា​ម ក្រុង​កំពង់ឆ្នាំង ចំណែក​ឯ​ជនរងគ្រោះ​ដែល​បាន​ស្លាប់​ ខណៈ​ដឹក​យកទៅ​សង្គ្រោះ​នៅ​មន្ទីរពេទ្យ​ក្រុងភ្នំពេញ​មាន ឈ្មោះ លន់ សុភា អាយុ19ឆ្នាំ​រស់នៅ​ភូមិ​ទី3 សង្កាត់​ខ្សា​ម។

មុនពេល​កើតហេតុ​ ជនរងគ្រោះ​ទាំង​២​នាក់​ បាន​ជិះ​ម៉ូតូ​មួយគ្រឿង​ម៉ាក​ហុងដា​សេ​125 ស៊េរី 0 15 ពណ៌ខ្មៅ ពាក់​ស្លាក​លេខ កំពង់ឆ្នាំង​1B 0360 បើកបរ​ដោយ ឈ្មោះ ប្រាក់ ណា​រា និង ឈ្មោះ លុន សុភា ជា​អ្នកជិះ​មក​ក្រោយ​។ លុះ​មកដល់​ចំណុចកើតហេតុ​ ក៏មាន​រថយន្ត​មិន​ស្គាល់​ម៉ាក​មួយ​គ្រឿង​បើក​ក្នុង​ដំណើរ​ច្រាស​ទិស​គ្នា បាន​បុក​ជនរងគ្រោះ​យ៉ាង​ពេញទំហឹង​តែម្ដង មូលហេតុ​មកពី​រថយន្ត​បើក​លឿន​មិន​ប្រុងប្រយ័ត្ន​ ក្រោយពេល​កើតហេតុ​ រថយន្ត​បង្ក​បាន​គេចខ្លួនបាត់។

ជនរងគ្រោះ ​ឈ្មោះ ​ប្រាក់ ​ណា​រា បាន​ស្លាប់​នៅនឹងកន្លែង ចំណែក​ ឈ្មោះ​ លន់ សុភា បាន​ដឹក​ទៅ​សង្គ្រោះ​នៅ​មន្ទីរពេទ្យ​ខេត្ត​ ប៉ុន្តែ​ដោយសារ​ស្ថានភាព​ធ្ងន់ធ្ងរ​ពេក ​ក៏​បន្ត​ដឹក​ទៅ​សង្គ្រោះ​នៅ​មន្ទីរពេទ្យ​ក្រុងភ្នំពេញ​ ជា​អកុសល​ ឈ្មោះ​ លុន សុភា ក៏បាន​ស្លាប់​នៅតាម​ផ្លូវ ហើយ​បាន​ដឹក​ត្រឡប់​យកមក​លំនៅដ្ឋាន​ប្រគល់ជូន​ក្រុមគ្រួសារ​ធ្វើបុណ្យ​តាម​ប្រពៃណី​នៅក្នុង​មូលដ្ឋាន។

ដោយឡែក ក្នុងករណី​​គ្រោះថ្នាក់​នេះ សមត្ថកិច្ច​នគរបាល​ក្រុង​កំពង់ឆ្នាំង បាន​យក​ម៉ូតូ​រងគ្រោះ​មក​រក្សាទុក​នៅក្នុង​អធិការដ្ឋាន​នគរបាល​ក្រុង​កំពង់ឆ្នាំង ដើម្បី​ស្រាវជ្រាវ​រក​រថយន្ត​បង្ក​ដោះស្រាយ​តាម​នីតិវិធី​ច្បាប់៕

​

Source: Kampuchea Thmey Daily