ភ្នំពេញ ៖ យុវជនម្នាក់ បានជួបគ្រោះថ្នាក់ដល់ជីវិត ខណៈពេលដែលរូបគេ បើកម៉ូតូទៅបុកខឿនផ្លូវបណ្ដាលឲ្យបែកក្បាលធ្លាយខួរ។
គ្រោះថ្នាក់នេះ បានកើតឡើងនៅវេលាម៉ោង២៣និង៤៥នាទីយប់ថ្ងៃទី២៧ ខែមីនា នៅតាមបណ្តោយផ្លូវជាតិលេខ១ ក្នុងភូមិបឹងស្នោ សង្កាត់និរោធ ខណ្ឌច្បារអំពៅ រាជធានីភ្នំពេញ។
ជនរងគ្រោះឈ្មោះទេព សូរ្យច័ន្ទ ភេទប្រុស អាយុ៣០ឆ្នាំ មុខរបរនៅផ្ទះស្នាក់នៅភូមិវាលស្បូវ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ។
តាមប្រភពពីលោកវរសេនីយ៍ទោ ឯក សារ៉ន អធិការរងនគរបាលខណ្ឌច្បារអំពៅទទួលបន្ទុកសណ្តាប់ធ្នាប់ចរាចរណ៍បានឲ្យដឹងថា នៅមុនពេលកើតហេតុ ជនរងគ្រោះជិះតែម៉ូតូម៉ាកស៊ូមឺអិច ពណ៌សលាយខ្មៅពាក់ស្លាកលេខភ្នំពេញ1GO 92 15 ធ្វើដំណើរតាមបណ្ដោយផ្លូវជាតិលេខ១ក្នុងល្បឿនលឿន ហើយមិនពាក់មួកការពារសុវត្ថិភាពនោះទេ។ លុះទៅដល់មុខទីតាំង តាំក្រះឆាយ ស្ថិតក្នុងភូមិបឹងស្នោ សង្កាត់និរោធ បានទៅបុកនឹងខឿនផ្លូវបណ្ដាលឲ្យបោកក្បាលបុកនឹងចិញ្ចើមផ្លូវបែកក្បាលស្លាប់ភ្លាមៗ។
លោកអធិការរងបានបញ្ជាក់ថា គ្រោះថ្នាក់នេះ គឺដោយសារជនរងគ្រោះ បើកបរម៉ូតូលឿនពេក ទើបបង្កឲ្យគ្រោះថ្នាក់ដល់បាត់បង់ជីវិត។ ក្រោយកើតហេតុ គ្រួសារជនរងគ្រោះ បានមកទទួលយកសពទៅកាន់លំនៅដ្ឋាន ព្រោះទីតាំងកើតហេតុក្បែរគ្នានឹងដែរ៕
Source: Kampuchea Thmey Daily
0 Comments