បង្ក្រាបទីតាំងលួចផលិតស្ករត្នោតក្លែងក្លាយ ដុះស្លែ ដ៏ធំមួយកន្លែង នៅមុខផ្សារត្រពាំងអំពិល

កំពង់ស្ពឺ ៖ សិប្បកម្មផលិតស្ករត្នោតក្លែងក្លាយដ៏ធំមួយកន្លែង ដែលធ្វើសកម្មភាពជាច្រើនឆ្នាំកន្លងមកហើយនោះ ត្រូវបានកម្លាំងសមត្ថកិច្ចចម្រុះចុះបង្ក្រាបរឹបអូសវត្ថុតាងយ៉ាងច្រើន។

ការចុះបង្ក្រាបនេះ ធ្វើឡើងនៅរសៀល ថ្ងៃពុធ ទី២៧ ខែមីនា ឆ្នាំ២០១៩ ស្ថិតក្នុងភូមិព្រៃគុយ ឃុំត្រពាំងគង ស្រុកសំរោងទង ខេត្តកំពង់ស្ពឺ តាមបទបញ្ជាលោកវ៉ី សំណាង អភិបាលខេត្តកំពង់ស្ពឺ និងជាប្រធានគណៈបញ្ជាការឯកភាពរដ្ឋបាលខេត្តរួមសហការជាមួយនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ និងមន្ត្រីជំនាញកាំកុងត្រូលផងដែរ។

មន្ត្រីនគរបាលខេត្តកំពង់ស្ពឺ បានឱ្យដឹងថា ដោយមានបទបញ្ជាពីលោកអភិបាលខេត្តឲ្យកម្លាំងនគរបាលផែនប្រឆាំងបទល្មើសសេដ្ឋកិច្ចខេត្ត ចុះសហការជាមួយជំនាញពាក់ព័ន្ធរួមមាន នាយកដ្ឋាននគរបាលសេដ្ឋកិច្ច ការិយាល័យកាំកុងត្រូល មន្ទីរឧស្សាហកម្ម និងសិប្បកម្ម ព្រមជាមួយកិច្ចសហការពីតំណាងអយ្យការអមសាលាដំបូងខេត្ត និងសមត្ថកិច្ចជំនាញពាក់ព័ន្ធកម្លាំងចម្រុះចុះត្រួតពិនិត្យឃ្លាំងស្តុក និងផលិតស្ករត្នោតខុសលក្ខណៈបច្ចេកទេសខាងលើ។

កម្លាំងគណៈកម្មការចម្រុះខាងលើ ដឹកនាំសម្របសម្រួលនីតិវិធីដោយលោក ខៃ សម្ជស្ស ព្រះរាជអាជ្ញារង អយ្យការអមសាលាដំបូងខេត្តខេត្តកំពង់ស្ពឺផងដែរ។

នគរបាលបានឱ្យដឹងទៀតថា ទីតាំងផលិតស្ករខុសលក្ខណៈបច្ចេកទេស និងក្លែងក្លាយនេះ គឺយកស្ករសលាយជាមួយសារធាតុផ្សេងៗផលិតទៅជាស្ករត្នោតរួចនាំចេញទៅទីផ្សារក្នុងស្រុក និងក្រៅប្រទេសបន្លំភ្នែកអ្នកប្រើប្រាស់។

ប្រភពបន្តថា ស្ករត្នោតក្លែងក្លាយបែបនេះធ្វើឱ្យប៉ះពាល់ដល់សុខភាពប្រជាពលរដ្ឋយ៉ាងខ្លាំងដោយប្រើសារធាតុគីមីលាយបញ្ចូលដើម្បីផលិតទៅជាស្ករត្នោត។ ទីតាំងសិប្បកម្មខាងលើ ត្រូវបានមន្ទីរជំនាញខេត្ដកំពង់ស្ពឺ ធ្វើការណែនាំ និងដកហូតអាជ្ញាប័ណ្ណជាបណ្ដោះអាសន្ន បើមិនកែប្រែរូបមន្ដនៃការផលិតស្ករត្នោតខុសបច្ចេកទេស និងបន្លំថា ប្រភេទប្រភពដើមនៃទំនិញនោះទេ បទល្មើសមានកំណត់ក្នុងច្បាប់តែម្តង។

ចំពោះម្ចាស់ទីតាំងសិប្បកម្មផលិតស្ករត្នោតក្លែងក្លែង មានម្ចាស់ឈ្មោះ រាជ រ៉ាឌី ភេទស្រី អាយុ ៥៧ឆ្នាំ និងមានប្តីឈ្មោះម៉ាច រស់នៅជាន់ផ្លូវជាតិលេខ៤ ភូមិព្រៃគុយ ឃុំសំបូរ ស្រុកសំរោងទង។

វត្ថុតាងដែលសមត្ថកិច្ចចម្រុះរកឃើញ រួមមាន៖ ស្ករស១១០បាវ ស្មើ ៥៥០០ kg, ស្ករក្រហមកែច្នៃរួច ៥១៣បាវ ស្មើ ២៥៦៥០ kg, ស្ករត្នោតសម្រេច ៦៦បាវ ស្មើ ៦៦០០ kg, ស្ករត្នោតដាក់ក្នុងធុងកាត់ចំនួន ១៥៤ ធុងកាត់ ស្មើ ២០០២០ kg, សំបកធុងកាត់ទទេចំនួន ៤២៤ ធុង, សំបកធុងស្ពេត្រូចំនួន ៣៥០ ធុង, ស្ករត្នោតច្រកក្នុងធុងស្ពេត្រូចំនួន ១៦ ធុង ស្មើ ៧៥២ kg។

សូមរម្លឹកថា យោងតាមសេចក្ដីប្រកាស របស់ក្រសួងឧស្សាហកម្ម និងសិប្បកម្ម លេខ៣០០៨ MIH/២០១៧ ចុះថ្ងៃទី១២ ខែធ្នូ ឆ្នាំ២០១៧ កន្លងមកនេះ ចេញដោយលោក ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម ជម្រាបជូនប្រធានមន្ទីរឧស្សាហកម្ម និងសិប្បកម្ម រាជធានី-ខេត្ត ត្រូវលុបបំបាត់ពីករណី លុបបំបាត់សិប្បកម្មផលិតស្ករត្នោតក្លែងក្លាយ តាមបណ្ដារាជធានី-ខេត្ត ក្នុងព្រះរាជាណាចក្រ ព្រោះការផលិតនេះនាំឲ្យមានការប៉ះពាល់ដល់កេរ្តិ៍ឈ្មោះ និងកិត្តិនាមស្ករត្នោតខ្មែរដែលកំពុងមានកិត្តិនាមល្បីល្បាញលើទីផ្សារអន្តរជាតិ។

ក្នុងលិខិតរបស់រដ្ឋមន្ត្រីក្រសួងឧស្សាហកម្ម និងសិប្បកម្ម បានបញ្ជាក់ថា «កន្លងមកមានការផលិតស្ករត្នោតក្លែងក្លាយដែលបានផលិតចេញពីវត្ថុធាតុដើមស្ករស ឬស្ករផ្សេងទៀត ហើយបានកែច្នៃទៅជាផលិតផលស្ករត្នោតដែលមានរសជាតិ ក្លិន ពណ៌ និងទ្រង់ទ្រាយដូចគ្នានឹងស្ករត្នោត ព្រមទាំងបានយកទៅចរាចរលើទីផ្សារបន្លំធ្វើជាស្ករត្នោតខ្មែរ។ ដោយសកម្មភាពនេះ គឺជាវិច្ឆេទកម្មសេដ្ឋកិច្ចដើម្បីបំផ្លាញកិត្តិនាមស្ករត្នោតខ្មែរ ដែលជាអត្តសញ្ញាណផលិតផលជាតិកំពុងទទួលស្គាល់ជាសាធារណៈទាំងក្នុង និងក្រៅប្រទេសតែម្តង»។

លិខិតរបស់លោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្ម បានបញ្ជាឲ្យមន្ទីរឧស្សាហកម្ម និងសិប្បកម្មទាំង ២៥រាជធានី-ខេត្ត ត្រូវលុបបំបាត់ជាបន្ទាន់រាល់សិប្បកម្មផលិតស្ករត្នោតក្លែងក្លាយ។

យោងតាមការខិតខំលើកកម្ពស់ស្ករត្នោតនេះ រហូតធ្វើឲ្យស្ករត្នោតកម្ពុជាបានឈ្នះពានរង្វាន់មេដាយមាស ជាផលិតផលល្អបំផុតលើកដំបូងប្រចាំតំបន់អាស៊ាន នៅក្នុងសន្និសីទម្ហូបអាហារអាស៊ានលើកទី១៥ ដែលត្រូវបានធ្វើឡើងកាលពីពាក់កណ្តាលខែវិច្ឆិកា នាទីក្រុងហូជីមិញ ប្រទេសវៀតណាម។

ស្ករត្នោតកម្ពុជាដែលឈ្នះមេដាយមាសនេះ ជាផលិតផលរបស់ក្រុមហ៊ុន ខនហ្វីរេល បើតាមសេចក្តីប្រកាសព័ត៌មានរបស់ក្រុមហ៊ុននេះ បានឲ្យដឹងថា នេះជាលើកទី២ហើយ ដែលស្ករត្នោតកម្ពុជាបានឈ្នះមេដាយមាស ជាផលិតផលល្អបំផុតប្រចាំតំបន់អាស៊ាន បន្ទាប់ពីខកខានអស់រយៈពេល១២ឆ្នាំ កន្លងមកហើយ។

កាលពីឆ្នាំ២០០៥ នៅក្នុងពិព័រណ៍ពាណិជ្ជកម្ម Nat Expo នាទីក្រុងប៉ារីស ស្ករត្នោតកម្ពុជាទទួលបានពានរង្វាន់មេដាយមាសជាផលិតផលល្អបំផុតនៅតំបន់អឺរ៉ុប ជាលើកទី១របស់ខ្លួន។

ក្រុមហ៊ុន ខនហ្វីរេល បានធ្វើការងារជាមួយសមាគមស្ករត្នោតកំពង់ស្ពឺ និងគ្រួសារផលិតស្ករត្នោត ដើម្បីកែច្នៃជាផលិតផលសម្រេចច្រើនប្រភេទ ដូចជាស្ករសត្នោត ស្រាត្នោត ទឹកខ្មេះ ទឹកត្នោត…..ជាដើម។

ក្រុមហ៊ុន ខនហ្វីរេល បានចាត់ទុកថា ការទទួលបានពានរង្វាន់ជាលក្ខណៈអន្តរជាតិនេះនឹងជួយបង្កើនតម្លៃផលិតផលស្ករត្នោត របស់កម្ពុជាព្រមទាំងបង្កើនប្រាក់ចំណូលសម្រាប់កសិករ។

លោក អោម យ៉ុមអាន ប្រធានមន្ទីរឧស្សាហកម្ម និងសិប្បកម្ម ខេត្តកំពង់ស្ពឺ ធ្លាប់ប្រាប់ឱ្យដឹងថា ទីតាំងសិប្បកម្មដែលយកវត្ថុធាតុដើមផ្សេងៗឲ្យក្លាយទៅជាស្ករត្នោតនេះ លោកធ្លាប់បញ្ជាឲ្យមន្ត្រីជំនាញចុះធ្វើការណែនាំ និងផ្អាកមិនឲ្យបន្តការផលិតទៀតឡើយ។

លោកប្រធានមន្ទីរ បានបន្តទៀតថា «ការផលិតស្ករត្នោតក្លែងក្លាយនេះ គឺធ្វើឲ្យប៉ះពាល់ដល់កេរ្តិ៍ឈ្មោះស្ករត្នោតពិតរបស់ខ្មែរយើងតែម្តង»។

លោកបន្តទៀតថា «កន្លែងកែច្នៃស្ករត្នោតក្លែងក្លាយនេះ គ្មានច្បាប់អនុញ្ញាតមន្ទីរជំនាញ ឬអាជ្ញាធរពាក់ណាទាំងអស់ ហើយម្ចាស់សិប្បកម្មនៅតែបន្តសកម្មភាពល្មើសច្បាប់ផ្ទុយពីការនាំមន្ទីរឧស្សាហកម្មនឹងមានវិធានការផ្លូវច្បាប់ជាមិនខាន»។

លោក សំ សារឿន ប្រធានសមាគមលើកកម្ពស់ស្ករត្នោតកំពង់ស្ពឺ ធ្លាប់បានប្រាប់ថា «ក្នុងនាមលោកជាសមាគមអ្នកផលិតស្ករត្នោតធម្មជាតិ សូមថ្កោលទោស និងប្រឆាំងដាច់ខាតចំពោះសកម្មភាពផលិតស្ករត្នោតក្លែងក្លាយនេះ ព្រោះវាអាចធ្វើឲ្យប៉ះពាល់សុខភាពអ្នកបរិភោគ និងកិត្តិនាមស្ករត្នោតកម្ពុជា»។

លោកបានបន្តថា ការកែច្នៃដោយវត្ថុធាតុដើមផ្សេងៗមកផលិតចេញជាស្ករត្នោតក្លែងក្លាយបែបនេះ វាខុសនឹងច្បាប់ ព្រោះស្ករទាំងនេះមិនបានផលិតចេញពីទឹកត្នោតសុទ្ធ ដែលកសិករប្រមូលបានដើមត្នោតពិតប្រាកដនោះទេ។ ដូច្នេះ ត្រូវតែដាក់ឈ្មោះផ្សេងក្រៅពីស្ករត្នោតទៅឧទាហរណ៍ «ស្ករលាមកឆ្កែ» ទើបសមជាង។

បច្ចុប្បន្នកម្លាំងចម្រុះ បានចាប់យកសំណាកចំនួន ៩គំរូ ប្រគល់ជូនជំនាញកាំកុងត្រូល ដើម្បីយកទៅធ្វើតេស្ត ហើយជំនាញបានណែនាំដល់ម្ចាស់អាជីវកម្មឲ្យផ្អាកសកម្មភាពផលិតជាបណ្តោះអាសន្ន រង់ចាំលទ្ធផលតេស្ត និងការសម្រេចពីថ្នាក់លើ៕