ប្រដាល់ ៖ រឿង សារ័ត្ន អ្នកប្រដាល់ក្លិបកងពលតូចទ័ពឆ័ត្រយោង៩១១ សេង ស្រឿន អ្នកប្រដាល់ក្លិបមហិទ្ធរិទ្ធមេសរថ្ងកខេត្តស្វាយរៀង និង យុគ យក្សផ្លែ អ្នកប្រដាល់ក្លិបបូរីរាជសីហ៍មានរិទ្ធ នឹងត្រូវទទួលស្វាគមន៍អ្នកប្រដាល់ថៃ៣រូប ដែលឆ្លងដែនមកជួបប្រកួតជាមួយ នៅប៉ុស្តិ៍ទូរទស្សន៍អាស៊ីអាគ្នេយ៍ លើសង្វៀនBoostrong Fighter On Fire នាព្រឹកថ្ងៃទី៣១ ខែមីនា ឆ្នាំ២០១៩។
រឿង សារ័ត្ន គេនឹងត្រូវជួបជាមួយឆ្លាម ផេត(Chhlam Phat) ដោយប្រកួតគ្នាក្នុងប្រភេទទម្ងន់៦៧ គីឡូក្រាម។ សារ័ត្ន ជាជើងខ្លាំងមួយរូប ដែលការប្រកួតរបស់គេ ទោះឈ្នះក្តី ចាញ់ក្តី មានមានលក្ខណៈតឹងតែងបំផុត ពោលគឺមិនមាននរណាយកឈ្នះលើរូបគេ ដោយផុយស្រួលនោះឡើយ។
ប៉ុន្តែអ្នកប្រដាល់ក្លិបកងពលតូចទ័ពឆ័ត្រយោង៩១១រូបនេះ ប្រកួតមិនសូវជាទៀងទាត់ប៉ុន្មាននោះដែរ។ ពោលគឺគេជួបថៃជាង ២០លើក គេវាយឈ្នះ១១លើកចាញ់១០លើក។ អ្នកណាក៏គេដឹងថា រឿង សារ័ត្ន ជាជើងខ្លាំងដែរ ទោះបីជាវាយចាញ់ ក៏មិនអាចចាញ់ដោយងាយៗបានដែរ។
យ៉ាងណា ពេលនេះ សារ័ត្ន ត្រូវបានជួបប្រកួតជាមួយឆ្លាម ផេត ដែលជាអ្នកប្រដាល់ជើងខ្លាំងរបស់ថៃ មិនដឹងថាឈ្នះ ឬចាញ់នោះទេ?។
រឿង សារ័ត្ន មានការរីកចំរើននៅក្នុងការប្រកួត២ប្រកួតចុងក្រោយនេះ។ ការឡើងប្រកួតចុងក្រោយនេះនៅSEATV គេបានវាយឈ្នះថៃ សឹក ពួន (Soeuk Puon) ក្នុងទឹកទី៤ កាលពីថ្ងៃទី០៣ ខែកុម្ភៈ ឆ្នាំ២០១៩កន្លងទៅនេះ។ អ្នកប្រដាល់រូបនេះ វាយរាងប្រយ័ត្នប្រយែងតែរាងយឺតបន្តិច។
សារ័ត្ន ជាអ្នកប្រដាល់ម្នាក់ ដែលប្រកួត និងផ្តួលគូប្រកួត ដោយសារតិចនិកកណ្តាប់ដៃ កែង និង ជង្គង់។ យ៉ាងណា ប៉ះជាមួយឆ្លាម ផេត លើកនេះ ក៏រាងយ៉ាប់ដែរ។
ឆ្លាម ផេត គេក៏ជាជើងខ្លាំងមួយរូបដែរ។ អ្នកប្រដាល់ថៃរូបនេះ មិនធ្លាប់មកប្រកួតនៅកម្ពុជាទេ គឺទើបមកលើកទី១ប៉ុណ្ណោះ។ គេមានប្រវត្តិប្រកួត៧៥លើក ដោយវាយឈ្នះ៦០លើក ចាញ់១៥លើក មិនដែលស្មើ ខណៈដែលរឿង សារ័ត្ន មានប្រវត្តិប្រកួត៨៦លើក ឈ្នះ៦៤លើក ចាញ់១៨លើក និងស្មើ០៤លើក។ ចាំមើល រឿង សារ័ត្ន និង ឆ្លាម ផេត តើនរណាជាអ្នកឈ្នះនោះ?។
ចំពោះ សេង ស្រឿន អ្នកប្រដាល់កម្ពុជាក្លិបមហិទ្ធរិទ្ធមេសរថ្ងកខេត្តស្វាយរៀង នឹងជួបសាកកណ្តាប់ដៃជាមួយអ្នកប្រដាល់ថៃ ជៀន រ៉ុប(Jean Rob)។ ស្រឿន និង ជៀន រ៉ុប មិនធ្លាប់ជួបគ្នាទេកន្លងមក។ ពួកគេពីរនាក់នេះ ជួបគ្នាក្នុងប្រភេទទម្ងន់ ៦៣,៥០០ គីឡូក្រាម។
សេង ស្រឿន គេជាជើងឯករងខ្សែក្រវាត់គូបូតាទម្ងន់៦៥គ.ក្រ។ អ្នកប្រដាល់រូបនេះ គេល្អទាំងកណ្តាប់ដៃ ជង្គង់ និង កែង។ សេង ស្រឿន ធ្លាប់ជួបប្រកួតជាមួយថៃ២៧លើកហើយកន្លងមក ដោយឈ្នះ១៨លើកនិងចាញ់០៧លើក និងស្មើ០២លើក។
អ្នកប្រដាល់ក្លិបមហិទ្ធរិទ្ធតាដំបងដែករូបនេះ មួយរយៈកន្លងមកនេះ គេមានការរីកចម្រើនខាងក្បាច់គុនច្រើន ជាមួយនឹងមានការប្តូរពីរបៀបវាយផង ធ្វើឲ្យគេទទួលជោគជ័យជាបន្តបន្ទាប់ ក្នុងការប្រកួតជាមួយអ្នកប្រដាល់ថៃកន្លងមកនោះ។ ប៉ុន្តែការប្រកួតចុងក្រោយរបស់គេ គឺវាយស្មើជាមួយអ្នកប្រដាល់ថៃ កេន សាក់(Ken Sak) តែសម្រាប់លើកនេះ សេង ស្រឿន ប្រហែលជាអាចយកឈ្នះជៀន រ៉ុប បាន ព្រោះថាអ្នកប្រដាល់ថៃរូបនេះជាអ្នកប្រដាល់ចំណូលថ្មី។
ជៀន រ៉ុប វិញ គេមិនធ្លាប់មកប្រកួតនៅកម្ពុជានោះទេកន្លងមក ដោយគេទើបមកប្រកួតនៅស្រុកខ្មែរជាលើកដំបូងប៉ុណ្ណោះ។ បើតាមលោកញាណ សុធី អ្នកចាត់ចែងកម្មវិធីប្រដាល់ប្រចាំSEATV ឲ្យដឹងនោះថា អ្នកប្រដាល់ថៃរូបនេះ គេជាជើងខ្លាំងម្នាក់នៅប្រទេសថៃ ហើយអ្នកប្រដាល់ថៃម្នាក់នេះ រឹងមាំ និងវាយខ្លាំង។
អ្នកប្រដាល់ថៃជៀន រ៉ុបនេះ គេមានប្រវត្តិប្រកួត៦៥លើក ដោយវាយឈ្នះ៥៧លើក ចាញ់០៨លើកមិនដែលស្មើ ខណៈដែលសេង ស្រឿន មានកំណត់ត្រាប្រកួត៨៤លើក ឈ្នះ៦៦លើក ចាញ់១៧លើក និង ស្មើ០១លើក។
ចាំមើល ការប្រកួតលើកនេះជាមួយជៀន រ៉ុប សេង ស្រឿនអាចយកឈ្នះអ្នកប្រដាល់ថៃរូបនោះ បានឬអត់?។ ទោះជាយ៉ាងណា សេង ស្រឿន មិនអាចមើលស្រាលជៀន រ៉ុប នេះបានទេ ទោះបីជាគេជាអ្នកប្រដាល់ចំណូលថ្មីក៏ដោយ។
ចំណែក យុគ យក្សផ្លែ អ្នកប្រដាល់ក្លិបបូរីរាជសីហ៍មានរិទ្ធ នឹងត្រូវជួបជាមួយអ្នកប្រដាល់ថៃចំណូលថ្មីឈ្មោះកូលាបដូយ(Kolab Douy) ដោយប្រកួតក្នុងទម្ងន់៥៧គ.ក្រ។
អ្នកប្រដាល់ថៃ ដែលយុគ យក្សផ្លែ ត្រូវជួបប្រកួតនេះ ជាជើងខ្លាំងស្រករក្រោយមួយរូបនៅស្រុកថៃ ។ កូលាប ដូយ គេមានជំនាញប៉ិនប្រសប់ក្នុងការប្រើកណ្តាប់ដៃ។ គេមានប្រវត្តិប្រកួត៥៥លើក ដោយវាយឈ្នះ៥០លើក ចាញ់០៥លើក មិនដែលស្មើ ខណៈដែល យុគ យក្សផ្លែ គេមានប្រវត្តិប្រកួតចំនួន១៦៣លើក ឈ្នះ១៣២លើក ចាញ់២៦លើក និងស្មើ០៥លើក។
យក្សផ្លែ ការប្រកួតចុងក្រោយរបស់គេ គឺវាយឈ្នះអ្នកប្រដាល់ថៃ អុប សៃ ក្នុងទឹកទី៣ កាលពីថ្ងៃទី១០ ខែវិច្ឆិកា ឆ្នាំ២០១៨កន្លងមកនេះ។ ទោះជាយ៉ាងណា ការឈ្នះចាញ់រវាងយុគ យក្សផ្លែ និង កូលាប ដូយ ពុំមាននរណាហ៊ានទាយមុនថាអ្នកណាឈ្នះនោះទេ សម្រាប់ការជួបគ្នាលើកដំបូងនេះ ?៕
Source: Kampuchea Thmey Daily
0 Comments