រដ្ឋមន្ត្រីក្រសួងផែនការ និងអាជ្ញាធររាជធានីភ្នំពេញ សហការគ្នាចុះធ្វើជំរឿនប្រជាពលរដ្ឋ តាមផ្ទះនៅខណ្ឌទួលគោក និងខណ្ឌពោធិ៍សែនជ័យ

Cambodia News March 06, 2019

ភ្នំពេញ ៖ លោកទេសរដ្ឋមន្ត្រី ឆាយ ថន រដ្ឋមន្ត្រីក្រសួងផែនការ,លោក ហួត ហៃ អភិបាលរងរាជធានីភ្នំពេញ អាជ្ញាធរដែនដីពាក់ព័ន្ធ និងមន្ត្រីជំរឿនជាច្រើននាក់ទៀត កាលពីរសៀលថ្ងៃទី០៥ ខែមីនា ឆ្នាំ២០១៩នេះ បានចុះធ្វើជំរឿនប្រជាពលរដ្ឋ ដែលរកស៊ី និងបើកអាជីវកម្ម នៅតាមបណ្ដោយផ្លូវកម្ពុជាក្រោមក្នុងសង្កាត់ទឹកល្អក់ទី១ ខណ្ឌទួលគោក និងបានបន្តចុះទៅធ្វើជំរឿន បន្តទៀតនៅមុខវត្តតាំងក្រសាំង ស្ថិតក្នុងសង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។

លោកទេសរដ្ឋមន្ត្រី ឆាយ ថន បានមានប្រសាសន៍លើកឡើងប្រាប់ទៅប្រជាពលរដ្ឋថា ការចុះធ្វើជំរឿនប្រជាពលរដ្ឋនេះ ធ្វើឡើងមិនមែនដើម្បីចង់ដឹង និងស្វែងយល់ ពីការរស់នៅ ការរកស៊ីរបស់ប្រជាពលរដ្ឋអោយតំឡើងពន្ធទៅលើប្រជាពលរដ្ឋ ដែលធ្វើអាជីវកម្មនោះទេ។

លោកទេសរដ្ឋមន្ត្រីបន្តថា តាមគោលការណ៍របស់រាជរដ្ឋាភិបាល ការធ្វើជំរឿនប្រជាសាស្ត្រនេះ ធ្វើឡើង១០ឆ្នាំម្តង ដើម្បីបានទិន្នន័យពិតប្រាកដ នៃចំនួនប្រជាពលរដ្ឋ ដើម្បីងាយស្រួលក្នុងធ្វើផែនការអភិវឌ្ឍន៍របស់រាជរដ្ឋាភិបាលឲ្យចំគោលដៅ។

ដើម្បីឲ្យការធ្វើជំរឿនទទួលបានលទ្ធផលកាន់តែល្អប្រសើរ សម្ដេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រី នៃព្រះរាជាណាចក្រកម្ពុជាបានអំពាវនាវឲ្យជនរួមជាតិទាំងអស់ចូលរួមគាំទ្រ និងចូលរួមការធ្វើជំរឿនទូទៅ ដោយប្រជាជនកម្ពុជា ត្រូវផ្តល់ព័ត៌មានតាមសំណួរសម្ភាសន៍ឲ្យបានគ្រប់គ្រាន់ ត្រឹមត្រូវ និងស្មោះត្រង់ជូនមន្ត្រីជំរឿន។

សម្តេចមានប្រសាសន៍ថា ការធ្វើជំរឿននេះ មិនមានពាក់ព័ន្ធនឹងរឿងនយោបាយទេ គឺដើម្បីបម្រើឲ្យផលប្រយោជន៍សម្រាប់ទាំងអស់គ្នា ហើយបើអាចជៀសវាងបាន សូមប្រជាពលរដ្ឋកុំធ្វើដំណើរទៅឆ្ងាយ និងសូមបងប្អូនយោគយល់ឲ្យមន្ត្រីជំរឿនចូលទៅតាមលំនៅដ្ឋាននៅពេលយប់ផង៕