ចុះហត្ថលេខាលើកិច្ចព្រមព្រៀងភាពជាដៃគូជាមួយតារាផេ ដើម្បីផ្ដល់ដំណោះស្រាយទូទាត់បង់ប្រាក់ប្រើប្រាស់បច្ចេកវិទ្យាទំនើប

ភ្នំពេញ ៖ លោក ពៅ ម៉ាលី រដ្ឋលេខាធិការ ក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់របស់ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានចុះហត្ថលេខាលើកិច្ចព្រមព្រៀងភាពជាដៃគូរវាងក្រសួងសាធារណការ និងដឹកជញ្ជូន និងក្រុមហ៊ុនតារាផេ ដើម្បីផ្តល់ដំណោះស្រាយទូទាត់បង់ប្រាក់ប្រើប្រាស់បច្ចេកវិទ្យាទំនើបបំផុត គឺ “បច្ចេកវិទ្យាទូទាត់តាមរយៈការស្កេន QR Code” កាលពីថ្ងៃអង្គារ ១៤រោច ខែមាឃ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៥ ខែមីនា ឆ្នាំ២០១៩ នៅសណ្ឋាគារ Dara Airport។

ពិធីនេះផងដែរ មានការចូលរួមពីសំណាក់មន្ត្រីក្រសួងសាធារណការ និងដឹកជញ្ជូន គណៈគ្រប់គ្រងជាន់ខ្ពស់របស់ធនាគារកាណាឌីយ៉ា ក.អ ធនាគារប្រៃសណីយ៍កម្ពុជា ស្ថាប័នមីក្រូហិរញ្ញវត្ថុហ្វូណន និងសមាជិកក្រុមប្រឹក្សាភិបាល និងគណៈគ្រប់គ្រង នៃក្រុមហ៊ុនកាណាឌីយ៉ា-ហ្វូលលើតុន ម៉ូបែល ម៉ាននី ម.ក(“តារាផេ”)។

តាមរយៈកិច្ចព្រមព្រៀងភាពជាដៃគូនេះ អតិថិជនអាចធ្វើការទូទាត់ថ្លៃសេវាបានយ៉ាងរហ័សទៅកាន់ក្រសួងសាធារណការ និងដឹកជញ្ជូន ទាក់ទងនឹងការចុះបញ្ជីយានយន្ត ត្រួតពិនិត្យលក្ខណៈបច្ចេកទេសយានយន្ត ចេញប័ណ្ណបើកបរយានយន្ត និងអាជីវកម្មដឹកជញ្ជូនផ្លូវគោកបានភ្លាមៗ ប្រកបដោយសុវត្ថិភាព និងភាពងាយស្រួល។ សេវាកម្មទូទាត់បង់ប្រាក់នេះមានភាពរហ័ស ងាយស្រួល និងចំណេញថវិកាទៀតផង។

ដើម្បីអបអរសាទរភាពជាដៃគូ និងដើម្បីពង្រឹងលើកិច្ចសហការគ្នាទៅលើសេវាថ្មីនេះ ក្រុមហ៊ុនតារាផេនឹងផ្តល់ជូនកម្មវិធីថ្មីប្រូម៉ូសិនពិសេស គឺការឥតគិតថ្លៃសេវារយៈពេល៣ខែ លើសេវានានាទៅកាន់ក្រសួងសាធារណការ និងដឹកជញ្ជូន។

ថ្លែងនៅក្នុងឱកាសនោះដែរ លោក ពៅ ម៉ាលី រដ្ឋលេខាធិការ បានមានប្រសាសន៍ថា “ ក្រុមហ៊ុនតារាផេបានបង្ហាញពីឆន្ទៈដ៏មោះមុតរបស់ខ្លួនក្នុងការជួយជំរុញប្រសិទ្ធភាព នៃសេវាសាធារណៈសម្រាប់ប្រព័ន្ធដឹកជញ្ជូនរបស់ប្រទេសកម្ពុជា។ យើងរីករាយណាស់ដែលបានចាប់ដៃគូជាមួយក្រុមហ៊ុនតារាផេ ដើម្បីលើកកម្ពស់ជីវភាពប្រជាជនកម្ពុជា តាមរយៈកិច្ចខិតខំប្រឹងប្រែង ដើម្បីធ្វើឲ្យ សេវាសាធារណៈសម្រាប់ប្រព័ន្ធដឹកជញ្ជូនមានតម្លៃសមរម្យ និងកាន់តែខិតទៅជិតប្រជាពលរដ្ឋគ្រប់រូបក្នុងប្រទេសកម្ពុជា។ ”

លោក ភុក រដ្ឋា នាយកគ្រប់គ្រងទូទៅ នៃក្រុមហ៊ុនតារាផេ បានមានប្រសាសន៍ផងដែរថា “ថ្ងៃនេះយើងបានសហការជាមួយក្រសួងសាធារណការ និងដឹកជញ្ជូន ដើម្បីផ្តល់នូវដំណោះស្រាយទូទាត់បង់ប្រាក់ដោយបច្ចេកវិទ្យា QR Code ជូនដល់អតិថិជន ដូច្នេះហើយ ពួកគាត់អាចចំណេញពេលវេលា និងថវិកាក្នុងការធ្វើដំណើរទៅបង់ប្រាក់ទូទាត់ថ្លៃសេវានានាទៅកាន់ក្រសួងសាធារណការ និងដឹកជញ្ជូន៕