យន្តហោះចម្បាំងថៃ សម្រេចចុះចតក្រៅព្រលាន បន្ទាប់ពីម៉ាស៊ីនមានបញ្ហា

Cambodia News March 06, 2019

ប្រទេសថៃ ៖ យ៉ាងហោចណាស់ ក៏មានពីឡុត ចំនួន៣នាក់ដែរ បានរងរបួសនៅក្នុងឧបទ្ទវហេតុនៃការសម្រេចចុះចតក្រៅព្រលានរបស់យន្តហោះចម្បាំង១គ្រឿង បន្ទាប់ពីម៉ាស៊ីនយន្តហោះមានបញ្ហា ។

យោងតាមរបាយការណ៍ ដែលយើងទទួលបានគឺកាលពីថ្ងៃទី៥ ខែមីនា ឆ្នាំ២០១៩ វេលាម៉ោងប្រមាណ១២ថ្ងៃត្រង់ នៅចំណុចក្បែរវត្តបាងសាលា ក្នុងស្រុកខ្លងហយដូង ខេត្តសុងខ្លា ប្រទេសថៃ មានយន្តហោះមួយគ្រឿង ជាប្រភេទយន្តហោះចម្បាំង ក្រុមទី២ ( AU-23A ) របស់កងទ័ពអាកាសបានប្រកាសស្នើសុំទៅអង្គភាពដើម្បីសុំចុះចតនៅខាងក្រៅព្រលានជាបន្ទាន់ ដោយមិនអាចពន្យារពេលឲ្យទៅដល់ព្រលានបានឡើយ ដោយសារតែម៉ាស៊ីនមានបញ្ហា។

របាយការណ៍បានបន្តថា យន្តហោះនេះ គឺជាប្រភេទយន្តហោះចម្បាំង ដែលបានហោះហើរល្បាតតាមខ្សែបន្ទាត់ព្រំដែន និងត្រូវផ្លាស់ប្ដូរជាមួយយន្តហោះក្រុមទី៩ នៃកងទ័ពអាកាសលេខ៥៦ ប្រចាំខេត្ត ប៉ាតានី ប៉ុន្តែខណៈពេលកំពុងហោះហើរជិតដល់ព្រលាន ដើម្បីចុះចតទៅហើយ ស្រាប់តែម៉ាស៊ីនមានបញ្ហា ដូច្នេះទើបអាកាសយានិកទាំងអស់ សម្រេចសុំគោលការណ៍ចុះចតនៅក្នុងព្រៃខាងក្រៅព្រលានយ៉ាងបន្ទាន់ជាទីបំផុត។

ភ្លាមៗនោះដែរ កម្លាំងអន្តរាគមន៍ រួមជាមួយនឹងក្រុមគ្រូពេទ្យសង្គ្រោះ ក៏បានចេញដំណើរទៅកាន់ទីតាំងខាងលើដើម្បីដឹកបញ្ជូនអ្នកបើកបរចំនួន២នាក់ និងអ្នកកាន់បច្ចេកទេសម្នាក់ ទៅកាន់មន្ទីរពេទ្យផងដែរ ដោយសារតែពួកគេបានរងរបួស ប៉ុន្តែមិនប៉ះពាល់ដល់អាយុជីវិតនោះទេ៕