ភ្នំពេញ ៖ តាំងពីព្រឹកព្រលឹម រហូតដល់ល្ងាចថ្ងៃទី០៥ ខែមីនា ឆ្នាំ២០១៩ ម្សិលមិញនេះ ក្រុមប្រឹក្សាជំនុំជម្រះសាលាដំបូងរាជធានីភ្នំពេញ បានលើកយកសំណុំរឿងឧក្រិដ្ឋកម្មរបស់អតីត ឧកញ៉ា ថោង សារ៉ាត់ មកបើកសវនាការបន្ត ដោយអវត្តមានជនជាប់ចោទ ថោង សារ៉ាត់។
សវនាការ នាថ្ងៃនេះ តុលាការ ផ្ដោតសំខាន់លើការសាកសួរលើជនសង្ស័យ ឈ្មោះ សៀង វាសនា ដែលត្រូវបានសង្ស័យថា ជាឃាតកដៃដល់ក្នុងការធ្វើឃាត ឧកញ៉ា អ៊ឹង ម៉េងជឺ ដោយការបាញ់ប្រហារនឹងកាំភ្លើងខ្លីជាច្រើនគ្រាប់គ្មានញញើតដៃ។
សៀង វាសនា អាយុ៤៤ឆ្នាំ មានមុខរបរជាយោធា និងជាប្រធានក្រុមកងអង្គរក្សរបស់ ថោង សារ៉ាត់ ត្រូវបានតុលាការចោទប្រកាន់ ពីបទឃាតកម្មគិតទុកជាមុន តាមមាត្រា២០០ នៃក្រមព្រហ្មទណ្ឌ ប្រព្រឹត្តកាលពីថ្ងៃទី២២ ខែវិច្ឆិកា ឆ្នាំ២០១៤ នៅចំណុចកន្លែងលក់ផ្លែឈើស្រស់ផ្សារអូឡាំពិក ក្នុងសង្កាត់ទួលស្វាយព្រៃ ខណ្ឌចំការមន។
ប្រឈមមុខបទចោទប្រកាន់អំពីបទឧក្រិដ្ឋនេះ ជនត្រូវចោទ សៀង វាសនា បានបដិសេធដាច់អហង្ការ ថា ខ្លួនគេមិនបានប្រព្រឹត្តអំពើសម្លាប់មនុស្សដូចការចោទប្រកាន់របស់តុលាការទេ។
សៀង វាសនា បាននិយាយថា នៅមុនថ្ងៃកើតហេតុថ្ងៃទី២១ និងថ្ងៃកើតហេតុ ទី២២ ខែវិច្ឆិកា ឆ្នាំ២០១៤ ខ្លួនគេបានសុំច្បាប់ ឧកញ៉ា ថោង សារ៉ាត ឈប់សម្រាក២ថ្ងៃ ដោយសារមានធុរៈ លុះដល់ព្រឹកថ្ងៃទី ២៣វិច្ឆិកា ទើបខ្លួនឃើញតាមហ្វេសប៊ុក មានករណីបាញ់សម្លាប់មនុស្សកើតឡើង។
ជនជាប់ចោទបានឆ្លើយបំភ្លឺទៀតថា ខ្លួនគេមិនដែលស្គាល់ជនរងគ្រោះទេ ដូច្នេះគេគ្មានហេតុផលណាហ៊ានសម្លាប់មនុស្សនោះឡើយ។
កាលពីថ្ងៃទី២៥ ខែកុម្ភៈ ឆ្នាំ២០១៩ តុលាការ បានសាកសួរជនជាប់ចោទ ឈ្មោះ មាស សម្បត្តិ និងឈ្មោះ ឈុន ចិត្រា ដែលជាម្ចាស់ម៉ូតូម៉ាកសេ១២៥ ពណ៌ខ្មៅ ដែលសង្ស័យថា ជាមធ្យោបាយប្រព្រឹត្តបទល្មើស ប៉ុន្តែ ឈ្មោះ មាស សម្បត្តិ និង ឈ្មោះ ឈុន ចិត្រា បានបដិសេធ ថែមទាំងព្យាយាមមិនឆ្លើយនឹងសំណួររបស់តុលាការទៀតផង។
ថោង សារ៉ាត់ ,សៀង វាសនា ,និងឈ្មោះ លី សៅ ត្រូវបានតុលាការចោទប្រកាន់ពីបទឃាតកម្មគិតទុកមុន តាមមាត្រា២០០ នៃក្រមព្រហ្មទណ្ឌ។ ក្នុងករណីដែលតុលាការរកឃើញថា ជនជាប់ចោទបានប្រព្រឹត្តនូវបទឧក្រិដ្ឋកម្មដូចការចោទប្រកាន់នោះ ជនជាប់ចោទត្រូវប្រឈមមុខជាប់ពន្ធនាគារអស់មួយជីវិត។
ជនជាប់ចោទ ឈ្មោះ លី សៅ អាយុ៤២ឆ្នាំ ជាអង្គរក្ស ថោង សារ៉ាត់ ត្រូវបានគេរាយការណ៍ថា បានស្លាប់នៅក្នុងពន្ធនាគារ កាលពីដើមឆ្នាំ២០១៨ ដោយរោគាពាធ។ ដូច្នេះ តុលាការ នឹងសម្រេចរំលត់បណ្ដឹងអាជ្ញា។
សេចក្ដីរាយការណ៍បន្ទាប់ នៅថ្ងៃទី០៦ ខែមិនា ឆ្នាំ២០១៩នេះ បានបញ្ជាក់ថា នៅថ្ងៃទី០៧មីនា លោកចៅក្រម តុប ឈុនហេង អនុប្រធានតុលាការរាជធានីភ្នំពេញ និងជាប្រធានក្រុមប្រឹក្សាជំនុំជម្រះ នឹងលើកយកសំណុំរឿងក្រុម លោក ថោង សារ៉ាត់ មកបើកសវនាការបន្តទៀត៕
Source: Kampuchea Thmey Daily
0 Comments