សហព័ន្ធកីឡាបាល់ទាត់កម្ពុជា (ស.ប.ក) ទទួលបានសិទ្ធិធ្វើជាផ្ទះក្នុងវគ្គជម្រុះពូល H ប្រចាំពានរង្វាន់ជើងឯកយុវជនប្រចាំទ្វីបអាស៊ីអាយុក្រោម២៣ឆ្នាំ (AFC U-23 Championship 2020) សម្រាប់ឆ្នាំ២០២០ ខណៈសំបុត្រសម្រាប់ចូលទស្សនាប្រកួតក្នុងព្រឹត្តិការណ៍នេះបានដាក់លក់ជាផ្លូវការហើយគិតចាប់ពីថ្ងៃពុធ សប្ដាហ៍នេះតទៅ។
សម្រាប់សំបុត្រចូលទស្សនាការប្រកួតវគ្គជម្រុះជាលើកទី២នេះ គឺបែងចែកចេញ ជា២ប្រភេទគឺមានតម្លៃ ១០,០០០រៀល នៅតំបន់មានកៅអីជ័រ និង ៥,០០០រៀល តំបន់គ្មានកៅអីជ័រ និងអាចទស្សនាបាន២ប្រកួត ក្នុងថ្ងៃតែមួយ។ សូមរំលឹកថាក្រុមកម្ពុជា ស្ថិតនៅក្នុងពូល H កម្ពុជា នឹងត្រូវជួបជាមួយក្រុមខ្លាំងៗដូចជា យុវជន U-23 អូស្ត្រាលី, កូរ៉េខាងត្បូង និង ឆាយនីសតៃប៉ិ (តៃវ៉ាន់) ដោយការប្រកួតនឹងចាប់ផ្តើមពីថ្ងៃទី ២២ ខែ មិនា ឆ្នាំ ២០១៩ ខាងមុខ លើទីលានពហុកីឡដ្ឋានជាតិក្នុងរាជធានីភ្នំពេញ។ កាលពីឆ្នាំ ២០១៧ កន្លងទៅ កម្ពុជា ធ្លាប់បានទទួលធ្វើម្ចាស់ផ្ទះវគ្គជម្រុះពានរង្វាន់ AFC U-23 នេះម្តងហើយ ដោយកាលនោះជួបជាមួយ ចិន, ជប៉ុន និង ហ្វីលីពីន តែមិនមានឱកាសឆ្លងផុតវគ្គនេះឡើយ។
សម្រាប់ប្រកួតបើកឆាកនៅថ្ងៃទី២២ ខែមីនាឆ្នាំ២០១៩ ក្រុមកូរ៉េខាងត្បូង ជួបតៃវ៉ាន់ នៅវេលាម៉ោង៥ល្ងាចហើយក្រុមម្ចាស់កម្ពុជា ត្រូវប៉ះក្រុមអូស្ត្រាលី នៅម៉ោង៨យប់។ ចំណែកនៅថ្ងៃទី២៤ ខែមីនាឆ្នាំ២០១៩ ដោយក្រុមតៃវ៉ាន់ ជួបអូស្ត្រាលីនៅម៉ោង៥ល្ងាចនិងក្រុមកម្ពុជា ប៉ះកូរ៉េខាងត្បូង នៅម៉ោង៨យប់។ ចុងក្រោយនៅថ្ងៃទី២៦ ខែមីនា ឆ្នាំ២០១៩ ក្រុមកូរ៉េខាងត្បូង ជួបក្រុមអូស្ត្រាលី នៅម៉ោង៥ល្ងាចនិងក្រុមកម្ពុជា បន្តប៉ះតៃវ៉ាន់ នៅម៉ោង៨យប់។
ក្រុមជម្រើសជាតិកម្ពុជាក្រោមអាយុ២៣ឆ្នាំបានប្រមូលផ្តុំគ្នាចាប់ពីថ្ងៃច័ន្ទ សប្ដាហ៍នេះមកម្ល៉េះក្រោមការដឹកនាំដោយលោក Félix Agustín González Dalmás ចាប់ដៃជាមួយអ្នកចាត់ការទូទៅ Keisuke Honda ខណៈបញ្ជីឈ្មោះកីឡាករ២៣នាក់ចុងក្រោយមានដូចជា ហ៊ុល គឹមហ៊ុយ,កែវ សុខសិលា,សាវែន សំណាង, ស៊ិន សុផានណាត់,អ៊ិន សុដាវីដ,ស៊ិន កក្កដា,កែវ ច័ន្ទសុភ័ក្រ, អ៊ុក សុវណ្ណ, ឃៀង ម៉េងហ័រ, សឿត បារាំង, យើ មូស្លីម,ឆេង ម៉េង,យើ សាហ្វី, អន ចាន់ប៉ូលីន, ប្រាក់ ធីវ៉ា, ទៀត គឹមហេង,ទេស សម្បត្តិ,សេត រ៉ស៊ីប,លី វ៉ាហេទ, ឈង់ ប៊ុនណាត, ណារ៉ុង កក្កដា, សៀង ចន្ធា និងកាន់ ពិសាល៕
Source: Kampuchea Thmey Daily
0 Comments