សិស្ស​និស្សិត​កម្ពុជា​ បាន​អាហារូបករណ៍​ទៅ​សិក្សា​ជំនាញ​សំខាន់​ចំនួន​៣​ នៅ​ប្រទេស​ចិន​

ភ្នំពេញ​ ៖ ​សិស្ស​និស្សិត​កម្ពុជា​ចំនួន​១១០​នាក់ បាន​អាហារូបករណ៍​ទៅ​សិក្សា​ជំនាញ​សំខាន់​ចំនួន​៣​គឺ ផ្នែក​អគ្គិសនី​, ផ្នែក​ជួសជុល ​និង​ដំឡើង​រថយន្ត និង ផ្នែក​គ្រូ​មតេយ្យ​ភាសា​ចិន នៅ​ប្រទេស​ចិន រយៈពេល​៣​ឆ្នាំ​ ក្រោម​ជំនួយ​ឧបត្ថម្ភ​ពី​សមាគម​សប្បុរសធម៌​ជនជាតិ​ចិន​នៅ​ក្រៅ​ប្រទេស «Overseas Chinese Charity Foundation of China (OCCFC)» ដែល​បាន​ទទួល​អាហារូបករណ៍​ផ្តល់​ដល់​សមាគម​មូលនិធិ​សុខ​មា​ភាព​សាធារណៈ កម្ពុជា ចិន។

នៅក្នុង​ពិធី​សំណេះសំណាល​ជាមួយ​សិស្ស​និស្សិត​ទាំង​១១០​នាក់​នេះ​បានធ្វើ​ឡើង​នៅ​រាជបណ្ឌិត្យសភាកម្ពុជា​នា​ព្រឹក​ថ្ងៃទី​៤​ ខែមីនា​ ឆ្នាំ​២០១៩។

ឧកញ៉ា កែវ មុំ អនុប្រធាន​សមាគម​មូលនិធិ​សុខុមាលភាព​សាធារណៈ​កម្ពុជា​-​ចិន មានប្រសាសន៍ថា​នេះ​គឺជា​ជា​កម្មវិធី​ផ្តល់​អាហារូបករណ៍​លើក​ទី​២​ហើយ​ បន្ទាប់ពី​កម្មវិធី​ផ្ដល់​អាហារូបករណ៍​លើក​ទី​១ ធ្វើឡើង​កាលពី​ឆ្នាំ​២០១៨ កន្លងមក​ សមាគម​មូលនិធិ​សុខ​មា​ភាព​សាធារណៈ កម្ពុជា ចិន ជ្រើសរើស​បាន​និស្សិត​ចំនួន​៤៩​នាក់​ទៅ​សិក្សា​នៅ​គ្រឹះស្ថាន​ទាំងនោះ។ ដោយឡែក​ក្នុង​ឆ្នាំ​២០១៩​នេះ សមាគម​សប្បុរសធម៌​ជនជាតិ​ចិន​នៅក្រៅ​ប្រទេស ផ្តល់ជូន​ចំនួន​២០០​នាក់ ប៉ុន្តែ​សមាគម​មូលនិធិ​សុខុមាលភាព​សាធារណៈ កម្ពុជា ចិន ជ្រើសរើស​បាន​និស្សិត​ត្រឹមតែ​ចំនួន​១១០​នាក់ សម្រាប់​ទៅ​សិក្សា​ជំនាញ​ទាំងបី​ខាងលើ។ និស្សិត​ដែល​ត្រូវ​ជ្រើសរើស​ទៅ​សិក្សា​នៅ​ប្រទេស​ចិន​ទាំង​១១០​នាក់ នឹងត្រូវ​សិក្សា​ភាសា​ចិន​កម្រិត​មូលដ្ឋានចំនួន​២​ខែ នៅ​វិទ្យាស្ថាន​ខុង​ជឺ នៃ​រាជបណ្ឌិត្យសភាកម្ពុជា មុននឹង​ចេញទៅ​សិក្សា​ជំនាញ​បច្ចេកទេស​នៅ​ប្រទេស​ចិន។

និស្សិត​ដែល​ទទួល​បាន​អាហារូបករណ៍ គឺ​ទទួល​បាន​ការឧបត្ថម្ភ​គាំទ្រ​ច្រើន​ពី​ភាគី​ចិន ដូចជា សំបុត្រ​យន្តហោះ​ទៅមក​កម្ពុជា​-​ចិន​ម្តង​ក្នុង​១​ឆ្នាំ ថ្លៃ​សិក្សា កន្លែង​ស្នាក់នៅ ប័ណ្ណ​ធានា​រ៉ាប់រង​សុខភាព ក្នុងអំឡុងពេល​ទទួល​បាន​អាហារូបករណ៍ ជាដើម​។ ឧកញ៉ា កែវ មុំ បាន​បញ្ជាក់ថា នឹង​ខិតខំ​ស្នើសុំ​អាហារូបករណ៍​ពី​ភាគី​ចិន​បន្ថែមទៀត ដើម្បី​ចូលរួមចំណែក​ក្នុងការ​បណ្តុះបណ្តាល​ធន​ធាន​មនុស្ស​នៅ​កម្ពុជា សម្រាប់​ចូលរួម​ក្នុងការ​អភិវឌ្ឍ​ប្រទេស។ ធនធានមនុស្ស​ជា​រឿង​សំខាន់​ជាងគេ អ្នក​ដែល​ទៅ​សិក្សា​នៅ​ប្រទេស​ចិន ត្រូវតែ​ធ្វើជា​សិស្ស​គំរូ​ល្អ និង​ជួយ​រំឭក​ដាស់តឿន​គ្នា ខិតខំ​រៀន​សូត្រ ជា​គំរូ​ដល់​សិស្ស​ដែល​មកពី​បណ្តា​ប្រទេស​អាស៊ាន​ផ្សេងទៀត។

បើតាម​លោក Xu Dian Wei អគ្គលេខាធិការ សមាគម​សប្បុរសធម៌​ជនជាតិ​ចិន​នៅក្រៅ​ប្រទេស បាន​បញ្ជាក់ដែរថា នៅក្នុង​កម្មវិធី​អាហារូបករណ៍​នេះ និស្សិត​នឹងចូលរួម​រយៈពេល ៣​ឆ្នាំ ហើយ​នៅ​ឆ្នាំ​នីមួយៗ និស្សិត​នឹងត្រូវ​ទទួល​ការសិក្សា​៦​ខែ​នៅ​គ្រឹះស្ថានសិក្សា និង​៦​ខែ​ទៀត ត្រូវ​ចុះទៅ​អនុវត្ត​ផ្ទាល់​នៅតាម​រោងចក្រ​សហគ្រាស​នានា​។ លោក បាន​បញ្ជាក់ថា និស្សិត​ដែល​បញ្ចប់​ការសិក្សា នឹងមាន​សមត្ថភាព​បំពេញការងារ​ជា​អ្នកគ្រប់គ្រង តាម​ជំនាញ​ឯកទេស​របស់ខ្លួន​។ និស្សិត​កម្ពុជា ដែល​ទទួល​អាហារូបករណ៍​ទាំងអស់ អាចដាក់​ពាក្យ​ជ្រើសរើស​គ្រឹះស្ថានសិក្សា តាម​ជំនាញ ក្នុងចំណោម​គ្រឹះស្ថានសិក្សា ដូច​ខាង​ក្រោម ១. សាលា​បច្ចេកទេស​វិស្វកម្ម​មេកានិច និង​អគ្គិសនី (Technical College of Mechanical and Electrical Engineering) ២. សាលា​បច្ចេកទេស​អភិរក្ស (Conservancy Technical College)៣. វិទ្យាស្ថាន​បច្ចេកវិជ្ជា Wuhu (Wuhu Institute of Technology) និង សាលា​អប់រំ​ក្មេង​មិនទាន់​គ្រប់​អាយុ​ចូលរៀន HEFEI (HEFEI Preschool Education College)។

នៅក្នុង​ពិធី​សំណេះសំណាល​ជាមួយ​និស្សិត​នេះដែរ លោក​បណ្ឌិតសភា​ចា​រ្យ សុខ ទូច បាន​ចែករំលែក​បទពិសោធន៍​ក្នុងនាម លោក​ធ្លាប់​បានទទួល​អាហារូបករណ៍​ទៅ​សិក្សា​នៅ​ប្រទេស​រុស្សី​កាលពី​៣០​ឆ្នាំមុន។ ក្នុងនោះ​លោក​បាន​ជំរុញ​និង​លើកទឹកចិត្ត​ដល់​សិស្ស និស្សិត​ពេល​ទៅ​រៀន​ត្រូវមាន​ការតាំង​ចិត្ត​ខ្ពស់​ថា មិន​សំខាន់​ខ្លួន​យើង​ជា​កូនអ្នកមាន​ឬ​ជា​កូនអ្នកក្រ​នោះទេ ត្រូវ​ប្តេជ្ញាចិត្ត​ថា ទៅណា​នឹង​យក​អ្វី​ត្រឡប់​មកវិញ។ កាលណា​ទៅ​រៀន​នៅ​ប្រទេស​គេ យើង​ក្លាយជា​អ្នក​ឯករាជ្យ​លើ​ផ្នែក​ហូបចុក​យើង​ត្រូវ​រៀបចំ​ដោយ​ខ្លួនឯង កម្មវិធីសិក្សា​ត្រូវ​កំណត់ដោយ​ខ្លួនឯង​ពេល​ត្រឡប់មក​ដល់ផ្ទះ​និង​ត្រូវ​គិតថា​ពេល​រៀន​ចប់​ត្រូវធ្វើ​អី​? លោក​បាន​ទាញ​ការចាប់អារម្មណ៍​ដល់​សិស្ស​និស្សិត​យើង​ថា តើ​រៀន​ជំនាញ​រួចហើយ​ធ្វើការ​ឱ្យគេ ឬ​បង្កើត​ការងារ​មួយ​សម្រាប់​ខ្លួនឯង។ ឧទាហរណ៍ អ្នក​ទៅ​រៀន​ជំនាញ​គ្រូ​មតេយ្យ​ភាសា​ចិន តើ​រៀន​ចប់​ត្រឡប់មកវិញ ត្រូវ​ទៅធ្វើ​ការឱ្យ​គេ ឬ បង្កើត​សាលា​ម​ត្តេ​យ្យ​ដោយ​ខ្លួនឯង​? នៅ​កម្ពុជា មាន​កូនចៅ​ចិន​ច្រើន​ណាស់ ហើយ​ទាំងនេះ សុទ្ធតែ​ជា​ឱកាស​ដែល​ត្រូវ​ចាប់​យក។ លោក​ថា ជាតិ​សាសន៍​មួយ​រីកចម្រើន​គឺ​ទី​១​លក់​កម្លាំង​ពលកម្ម ទី​២​ប្រាជ្ញា ទី​៣ លក់​ទេពកោសល្យ និង​ទី​៤​បង្កើត​ឱកាស។ តើន​រណា​បង្កើត​ឱកាស​គឺ​ពេល​ដែល​យើង​មាន​ជំនាញ​និង​មានចំណេះ​យើង​បង្កើត​ឱកាស​ដោយ​ខ្លួនឯង៕

Source: Kampuchea Thmey Daily