សមត្ថកិច្ច កាងល្បែងស៊ីសង ខណៈក្រុមអ្នកកាសែតរាយការណ៍ឲ្យចុះបង្ក្រាប បែរជាប្រាប់អ្នកជល់មាន់ឲ្យរត់ចែកជើងគ្នាពេញផ្លូវតែម្ដង

កំពង់ឆ្នាំង ៖ ក្រុមជល់មាន់ បានរត់ចែកផ្លូវគ្នាដូចគោហ្វូង បន្ទាប់ពីដឹងថា មានអ្នកកាសែតទៅដល់និងថតកន្លែងជល់មាន់ដាក់លុយ ដែលមានទីតាំងស្ថិតនៅក្នុង ភូមិកំពង់រាំង ឃុំស្វាយជ្រំ ស្រុករលាប្អៀរ។ ការភ្ញាក់ផ្អើលក្នុងរឿងខាងលើនេះ បានកើតឡើងនៅវេលាម៉ោង១២និង៣០នាទីរសៀល ថ្ងៃទី០៣មីនា។

សូមបញ្ជាក់ថា នៅមុនពេលមានការភ្ញាក់ផ្អើល មានអ្នកកាសែតមួយក្រុម បានធ្វើដំណើរទៅកាន់វត្តមួយនៅកន្លែងជល់មាន់ក្នុងព្រៃមួយកន្លែង ដែលគេបានជល់មាន់ប្រចាំសប្ដាហ៍ ពេលពិនិត្យឃើញពិតជាមានក្រុមអ្នកជល់មាន់នៅចំណុចនោះដូចគេរាយការណ៍ពិតមែន ក្រុមអ្នកកាសែត បានរាយការណ៍ទៅមន្ត្រីកងរាជអាវុធហត្ថម្នាក់ ដោយមន្ត្រីកងរាជអាវុធហត្ថនោះ ប្រាប់ថា ជាប់នៅឆ្ងាយ គឺនៅស្រុកជលគីរី។ បន្ទាប់មកក៏បានរាយការណ៍ទៅមន្ត្រីនគរបាលព្រហ្មទណ្ឌ នៃស្នងការដ្ឋាននគរបាលខេត្ត ដើម្បីសុំឲ្យចុះមកបង្ក្រាប។ ប៉ុន្តែត្រូវមន្ត្រីនគរបាលរូបនោះប្រាប់ថា ជាប់រវល់ ចាំពេលក្រោយចុះ។ ស្រាប់តែមិនបានប៉ុន្មាននាទីផង ក៏ឃើញក្រុមអ្នកញៀនល្បែងជល់មាន់ទាំងនោះ បានភ្ញាក់ផ្អើលនាំគ្នាបើកម៉ូតូ បើករថយន្តរត់ចេញប្រសេចប្រសាចមកតាមផ្លូវ ទើបក្រុមអ្នកកាសែតបានសម្រេចបើករថយន្តបញ្ច្រាសជាមួយក្រុមអ្នកជល់មាន់ទាំងនោះ ដើម្បីថតយករូបភាព បានខ្លះៗដូចដែលបានឃើញក្នុងរឿងនេះ។

ដោយឡែកពេលទៅដល់កន្លែងជល់មាន់ ពិនិត្យឃើញក្រោមដើមឈើមួយដើមដែលជាសង្វៀនជល់មាន់ មានសឹកដីឡើងរលោង ចំណែកនៅតាមតូបលក់ដូរ ឃើញមានក្រុមអ្នកជល់មាន់ខ្លះ នៅបន្លំខ្លួនផឹកស៊ី និងឃើញមន្ត្រីកងរាជអាវុធហត្ថម្នាក់ អង្គុយផឹកជាមួយដែរ ដោយមន្ត្រីកងរាជអាវុធហត្ថរូបនោះប្រាប់អ្នកក្រុមកាសែតយើងថា មកទិញដំឡូង ចំណែកនៅក្រោមតុឃើញមានការុងដាក់មាន់ជល់មួយក្បាល ហើយនៅមាត់ទឹក ក៏ឃើញមាន់ជល់មួយក្បាលទៀត ដែលគេចងទុកចោលជាមួយកាណូតផងដែរ។

ទាក់ទងខាងលើនេះ អាចបញ្ជាក់បានថា ក្រុមអ្នកជល់មាន់ខាងលើ អាចពាក់ព័ន្ធទៅនឹងសមត្ថកិច្ចទាំង២ខាងលើយ៉ាងពិតប្រាកដ ទើបក្រុមអ្នកលេងល្បែងស៊ីសងទាំងនោះ អាចលេងទៅបានដោយរលូន មិនត្រឹមតែប៉ុណ្ណេះ ពេលក្រុមអ្នកកាសែតសុំការអន្តរាគមន៍ចុះបង្ក្រាប សមត្ថកិច្ចនិយាយថា ជាប់រវល់ តែបន្តិចក្រោយមក ឃើញក្រុមអ្នកជល់មាន់ទាំងនោះរត់យ៉ាងប្រសាចទៅវិញ។
ករណីនេះ ប្រជាពលរដ្ឋស្នើសុំ លោក សាក់ សារ៉ាង មេបញ្ជាការកងរាជអាវុធហត្ថខេត្ត និង លោក ខូវ លី ស្នងការនគរបាលខេត្ត ដែលទើបកាន់ដំណែងថ្មី មេត្តាជួយពិនិត្យមើលកូនចៅរបស់ខ្លួនផង ព្រោះល្បែងស៊ីសងកំពុងតែកើតមានពេញបន្ទុកហើយ ក្នុងពេលជិតដល់រដូវបុណ្យចូលឆ្នាំខ្មែរនេះ ហើយល្បែងជល់មាន់តាមទូរទស្សន៍ តាមហាងកាហ្វេនានា ក៏មានច្រើនកន្លែងផងដែរ៕