សៀមរាប ៖ រថយន្តរបស់ចាងហ្វាងកាសែតថ្ងៃថ្មី ត្រូវរថយន្តទំនើបម៉ាកលុចស៊ីស៤៧០ មិនស្គាល់អត្តសញ្ញាណ បុកធ្លាក់ស្នាមភ្លោះទៅមុខលែងរួច និងរងរបួសស្រាល ខណៈលោកកំពុងចុះយកព័ត៌មាន។
ហេតុការណ៍គ្រោះថ្នាក់ចរាចរណ៍នេះ កើតឡើងនៅវេលាម៉ោង២៣និង៣០នាទី ថ្ងៃទី០៤ ខែមីនា ឆ្នាំ២០១៩ តាមបណ្ដោយផ្លូវជាតិលេខ៦ ក្នុងភូមិសាស្ត្រឃុំព្រៃជ្រូក ស្រុកពួក ខេត្តសៀមរាប។
លោក ទីវ សំអុល ចាងហ្វាង កាសែតថ្ងៃថ្មី បានឲ្យដឹងនៅព្រឹកថ្ងៃទី០៥មីនានេះថា លោកបើករថយន្តតាមផ្លូវម្នាក់ឯងសុខៗ ស្រាប់តែមានរថយន្តម៉ាកលុចស៊ីស៤៧០មិនស្គាល់អត្តសញ្ញាណមកបុកចំពីក្រោយពេញទំហឹង និងកៀរទម្លាក់ស្នាមភ្លោះ បណ្តាលលោករងរបួសស្រាល។ ចំណែករថយន្តបង្ក បានបើកគេចខ្លួនបាត់។
លោកបន្តថា ភ្លាមៗនោះ លោកបានទំនាក់ទំនងសុំការអន្តរាគមន៍ពីសំណាក់សមត្ថកិច្ចមូលដ្ឋានដែរ តែចាប់រថយន្តបង្កមិនបាន។
លោកបន្ថែមថា ករណីនេះលោកនឹងដាក់ពាក្យបណ្ដឹងនៅមូលដ្ឋានខាងលើ ដើម្បីទុកការពារខ្លួនរបស់លោក ក្រែងមានមនុស្សចង់ធ្វើបាបលោកដោយប្រការណាមួយនោះ។ ក្នុងនោះ លោក ក៏សូមស្នើឲ្យសមត្ថកិច្ច ជួយស្រាវជ្រាវរកជនបង្កមកផ្ដន្ទាទោសតាមផ្លូវច្បាប់ផងដែរ។
អធិការនគរបាលស្រុកពួក គឺ លោកវរសេនីយ៍ឯក ទេព ពុំសែន បានឲ្យដឹងនៅព្រឹកថ្ងៃទី០៥នេះថា ករណីនេះ ខាងលោក បានចុះជួយអន្តរាគមន៍ និងសហការជាមួយអធិការនគរបាលស្រុកក្រឡាញ់ ដែរ តែចាប់មិនបាន ដោយសារហេតុការណ៍នោះកើតលឿនពេក ហើយរថយន្តបង្កបើកគេចបាត់។
គួរកត់សម្គាល់ផងដែរថា នេះគឺជាករណីទី១ នាដើមឆ្នាំ២០១៩ ដែលមានការគំរាមកំហែងដល់អ្នកសារព័ត៌មាននៅក្នុងខេត្តសៀមរាប តែមិនបានសម្រេច។
ប្រភពព័ត៌មានបានបង្ហើមមកថា នៅក្នុងខេត្តសៀមរាបសព្វថ្ងៃនេះ មានរថយន្តដឹកឈើប្រណិត និងឈើលេខ២ សម្រុកដឹកចូលក្នុងខេត្ត និងឆ្លងកាត់ជាច្រើនគ្រឿង ហើយក្នុងនោះភាគច្រើនជារថយន្តទំនើប អត់ពាក់ព័ន្ធស្លាកលេខ ខ.ម។ ចំពោះសមត្ថកិច្ចជំនាញវិញ ហាក់នៅកំពុងគេងលក់ស្រួល៕
Source: Kampuchea Thmey Daily
0 Comments