បាត់ដំបង ៖ លោក ចាន់ យុត្ថា រដ្ឋលេខាធិការ ក្រសួង ធនធានទឹក និងឧតុនិយម បាន អញ្ជើញដឹកនាំក្រុមកាងារ ចុះពិនិត្យ ការដ្ឋានសាងសង់ទំនប់អាងទឹកដូនទ្រី ស្ថិតក្នុងស្រុករុក្ខគិរី ខេត្តបាត់ដំបង ដែលអាច ស្តុកទឹកបាន ១៦៣ លានម៉ែត្រត្រីគុណ ដែលគ្រោងនិង បញ្ចប់នៅឆ្នាំ២០២២ខាងមុខនេះ។
ក្រសួងធនធានទឹកបានឲ្យដឹងថា កាលពី រសៀលថ្ងៃសុក្រ ១០រោច ខែមាឃ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី ០១ ខែមីនា ឆ្នាំ ២០១៩ លោក ចាន់ យុត្ថា រដ្ឋលេខាធិការ លោក ជួន ប៊ិតថុល អនុរដ្ឋលេខាធិការ លោកឡុង ផលគុណ ប្រធានមន្ទីរធនធានទឹក និងឧតុនិយមខេត្តបាត់ដំបង និងសហការី បានអញ្ជើញចុះពិនិត្យការដ្ឋានសាងសង់ទំនប់អាងទឹកដូនទ្រី ស្ថិតក្នុងស្រុករុក្ខគិរី ខេត្តបាត់ដំបង ដែលកំពុងសាងសង់យ៉ាងមមាញឹក។
លោក ចាន់ យុត្ថា បានមានប្រសាសន៍ឲ្យដឹងថា សំណង់ ទំនប់អាងទឹកដូនទ្រី កសាងឡើង ក្រោមកិច្ចសហប្រតិបត្តិការជាមួយសាធារណរដ្ឋកូរ៉េ អាងទឹកដូនទ្រី ត្រូវបានចាប់ផ្ដើមសាងសង់ឡើងនៅពាក់កណ្តាល ឆ្នាំ២០១៨ ហើយគ្រោងនឹងបញ្ចប់នៅដើមឆ្នាំ ២០២២។ លោក រដ្ឋលេខាធិការ បន្ថែមថា ក្រោយពេលសាងសង់រួច អាងទឹកនេះមានសមត្ថភាពស្តុកទឹកបាន ១៦៣ លានម៉ែត្រត្រីគុណ ហើយនឹងត្រូវយកទៅប្រើប្រាស់ សម្រាប់ការស្រោចស្រព និងជីវភាពប្រចាំថ្ងៃ របស់ប្រជាពលរដ្ឋនៅក្នុងស្រុករុក្ខគិរី និងស្រុកមោងឫស្សី ។ នេះគឺជាផ្នែកមួយ នៃការអនុវត្តយុទ្ធសាស្ត្រពាងទឹក។
តាមរយៈយុទ្ធសាស្ត្រនេះ នឹងធ្វើឲ្យស្រុករុក្ខគិរី ក៏ដូចជាស្រុកមោងឫស្សី ដែលតែងតែជួបប្រទះនឹងការខ្វះខាតទឹក ប្រែជាមានទឹកប្រើប្រាស់បរិបូណ៌ខួបប្រាំង-វស្សា៕
Source: Kampuchea Thmey Daily
0 Comments