កូរ៉េខាងត្បូង​ឃ្លាំមើល​កូរ៉េខាងជើង​យ៉ាង​យកចិត្តទុកដាក់​អំពី “​ការបាញ់​មី​ស៊ី​ល​”

យោធា​កូរ៉េខាងត្បូង​បាន​និយាយ​នៅ​ថ្ងៃ​ចន្ទ​ថា​ខ្លួន​បាន​ឃ្លាំមើល​យ៉ាង​ជិតស្និទ្ធ​លើ​ស្ថានីយ​របស់​កូរ៉េខាងជើង​បន្ទាប់ពី​រូបភាព​ផ្កាយរណប​ជាច្រើន​បាន​បង្ក​ឲ្យ​មានការ​ព្រួយបារម្ភ​ជា​អន្តរជាតិ​ថា ក្រុង​ព្យុងយ៉ាង​ប្រហែលជា​កំពុង​រៀបចំ​មី​ស៊ី​ល​រយៈ​ចម្ងាយ​ឆ្ងាយ​ឬ​ការបាញ់​បង្ហោះ​អវកាស។

ការវិភាគ​នានា​បានបង្ហាញ​ពី​សកម្មភាព​កើនឡើង​នៅ​ទីតាំង​សំខាន់​ចំនួន​ពីរ​គឺ​ស្ថានីយ​ស្រាវជ្រាវ​មី​ស៊ី​ល Samundong និង​ស្ថានីយ​ធ្វើតេស្ត​រ៉ុក្កែត Sohae​។ ការបាញ់​បង្ហោះ​ណាមួយ​អាចធ្វើ​ឲ្យ​មាន​ការចរចា​អំពី​ការរំសាយ​អាវុធ​នុយក្លេអ៊ែរ​ធ្លាក់ចូល​ទៅក្នុង​ភាព​តានតឹង។

លោក Kim Joon-rak អ្នកនាំពាក្យ​នាយអគ្គសេនាធិការ​ចម្រុះ​បាន​និយាយថា ដោយមាន​ការសម្របសម្រួល​យ៉ាង​ជិតស្និទ្ធ​ជាមួយ​សហរដ្ឋអាមេរិក ប្រទេស​កូរ៉េខាងត្បូង​កំពុង​តាមដាន​យ៉ាង​យកចិត្តទុកដាក់​និង​សម្លឹងមើល​សកម្មភាព​ទាំងអស់​សម្រាប់​សភាពការណ៍​នានា​រួមទាំង​ការបាញ់​មី​ស៊ី​ល​ឆ្លងកាត់​ព្រំដែន​ផងដែរ។

រូបភាព​ផ្កាយរណប​របស់ Samundong ដែល​ថត​កាលពី​ថ្ងៃទី​២២​ខែកុម្ភៈ​បានបង្ហាញ​ពី​រថយន្ត​ធុន​តូច​និង​រថយន្ត​ធុន​ធំ​នៅ​ទីតាំង​នោះ​ក៏ដូចជា​រថភ្លើង​និង​ដង​ស្ទូច​នៅ​ស្ថានីយ​មួយ​ផងដែរ។

ដោយមាន​ទីតាំងនៅ​ជាយក្រុង​ព្យុងយ៉ាង​, ស្ថានីយ Samundong ត្រូវបាន​សាងសង់ឡើង​ក្នុង​ឆ្នាំ​២០១២​ដើម្បី​គាំទ្រ​ដល់​ការអភិវឌ្ឍ​មី​ស៊ី​ល​រយៈ​ចម្ងាយ​ឆ្ងាយ​និង​យាន​បាញ់​ទៅ​ទី​អវកាស។

ក្រៅពី​ការអភិវឌ្ឍ​មី​ស៊ី​ល​ឆ្លង​ទ្វីប Hawsong-15 ដែល​ក្រុមអ្នកវិភាគ​យល់ស្រប​ថា​មាន​សមត្ថភាព​ឈានទៅដល់​ដីគោក​របស់​សហរដ្ឋអាមេរិក​ទាំងមូល​នោះ​, ស្ថានីយ Samundong បាន​កសាង​រ៉ុក្កែត​រយៈ​ចម្ងាយ​ឆ្ងាយ​ដែល​ត្រូវបាន​ដឹកជញ្ជូន​និង​បាញ់​បង្ហោះ​ដោយ​ជោគជ័យ​ចេញពី​ស្ថានីយ៍​បាញ់​បង្ហោះ​ផ្កាយរណប Sohae ក្នុង​ឆ្នាំ​២០១២​និង​២០១៦។

មេដឹកនាំ​កូរ៉េខាងជើង​លោក​គីម​ជុង​អ៊ុន​បាន​យល់ព្រម​កាលពី​ឆ្នាំមុន​ក្នុង​ការបិទ​ស្ថានីយ Sohae អំឡុង​ជំនួប​កំពូល​មួយ​ជាមួយ​ប្រធានាធិបតី​កូរ៉េខាងត្បូង​លោក​មូ​ន​ចេ​អ៊ី​ន​នៅ​ក្រុង​ព្យុងយ៉ាង​។​

កាលពី​ខែសីហា រូបភាព​ផ្កាយរណប​បានបង្ហាញ​ពី​កម្មករ​កំពុង​រុះរើ​ជើង​ទម្រ​ធ្វើតេស្ត​ម៉ាស៊ីន​មួយ​នៅ​ស្ថានីយ​នោះ។

ប៉ុន្តែ​មជ្ឈមណ្ឌល​សិក្សា​យុទ្ធសាស្ត្រ​និង​អន្តរជាតិ​ដែលមាន​មូលដ្ឋាន​នៅ​ទីក្រុង​វ៉ាស៊ីនតោន​បានលើកឡើង​កាលពី​សប្ដាហ៍​មុន​ថា ការសាងសង់​ឡើងវិញ​កំពុងដំណើរការ​យ៉ាង​ឆាប់រហ័ស​នៅ​ស្ថានីយ​នោះ៕ AFP

[caption id="attachment_1035061" align="alignnone" width="700"] ​[/caption]

​

Source: Kampuchea Thmey Daily