ប្រជាពលរដ្ឋដែលមានប្រាក់ចំណូលមធ្យម និងប្រាក់ចំណូលទាប ក៏អាចមានលទ្ធភាពទិញលំនៅដ្ឋាន មានគុណភាព សុវត្ថិភាព ដែរ

បន្ទាយមានជ័យ ៖ ប្រជាពលរដ្ឋដែលមានប្រាក់ចំណូលមធ្យម និងប្រាក់ចំណូលទាប ក៏អាចមានលទ្ធភាពទិញលំនៅដ្ឋាន ដែលមានគុណភាព សុវត្ថិភាព និងជាសុខភាពសម្រាប់រស់នៅប្រចាំថ្ងៃ។ នេះគឺជាការលើកឡើងរបស់ ឯកឧត្ដម សេង ថានី អនុលេខាធិការក្រសួងរៀបចំដែនដី នគររូបនីយកម្ម និងសំណង់ បានថ្លែងក្នុងអង្គសិក្ខាសាលាផ្សព្វផ្សាយ ស្ដីពីសៀវភៅណែនាំបទដ្ឋានបច្ចេកទេសលំនៅដ្ឋាន សម្រាប់គ្រួសារ ដែលមានប្រាក់ចំណូលមធ្យម និងប្រាក់ចំណូលទាប ដែលបានធ្វើឡើងនៅសណ្ឋាគារព្រះចន្ទ ខេត្តបន្ទាយមានជ័យ នាថ្ងៃទី១១ ខែមិនា ឆ្នាំ២០១៩។

លោក លី សារី អភិបាលរងខេត្តបន្ទាយមានជ័យ មានប្រសាសន៍ថា ការអភិវឌ្ឍវិស័យលំនៅដ្ឋាន បានរៀបចំនូវសៀវភៅបទដ្ឋានបច្ចេកទេស លំនៅដ្ឋានតម្លៃសមរម្យ មានសារៈសំខាន់ណាស់ សម្រាប់គ្រួសារមានប្រាក់ចំណូលមធ្យម ឬ ប្រាក់ចំណូលទាប ដើម្បីជាមូលដ្ឋានគ្រឹះសំខាន់ៗ សម្រាប់ធុរកិច្ចជន ដែលប្រកបអាជីវកម្ម អភិវឌ្ឍន៍លើវិស័យ សំណង់លំនៅដ្ឋាន ព្រមទាំងតម្រង់ទិសដល់អ្នកសិក្សា គម្រោងប្លង់ និងក្លាយជាឯកសារគោល សម្រាប់ប្រើប្រាស់នៅទូទាំងប្រទេស ក្នុងការសាងសង់ លំនៅដ្ឋានមានលក្ខណៈ តម្លៃសមរម្យ ដែលជាទីជម្រក ប្រកបដោយសុវត្ថិភាព ជាសុខភាព សុភមង្គល បរិស្ថាន ល្អជាពុំខានឡើយ។

ឯកឧត្ដម សេង ថានី អនុលេខាធិការក្រសួងរៀបចំដែនដី នគរូបនីយកម្ម និងសំណង់មានប្រសាសន៍ផងដែរថា បច្ចុប្បន្ននេះ ប្រទេសកម្ពុជាបាន និងកំពុងអភិវឌ្ឍន៍ខ្លួនឲ្យក្លាយជាសង្គមមួយមានលក្ខណៈទំនើប ស៊ីវិស័យ តាមរយៈការជំរុញ ការអភិវឌ្ឍន៍ ហេដ្ឋារចនាសម្ព័ន្ធសង្គម សេដ្ឋកិច្ចសំខាន់ៗ និងចាំបាច់ក្នុងការ លើកស្ទួយ កម្រិតជីវភាព របស់ប្រជាពលរដ្ឋជាពិសេស ការអភិវឌ្ឍលំនៅដ្ឋានគ្រប់ប្រភេទ ដើម្បីបំពេញតម្រូវការរបស់ប្រជាពលរដ្ឋគ្រប់ស្រទាប់វណ្ណៈ។

ឯកឧត្ដម សេង ថានី មានប្រសាសន៍បន្តថា ដោយមើលឃើញពីកំណើនប្រជាពលរដ្ឋកើនឡើងនោះ រាជរដ្ឋាភិបាលបានដាក់ចេញនូវ គោលនយោបាយជាតិ ស្តីពីលំនៅដ្ឋាន និងគោលនយោបាយលើកទឹកចិត្ត និងការបង្កើតកម្មវិធីជាតិ សម្រាប់ការអភិវឌ្ឍន៍លំនៅដ្ឋានសមរម្យ ក្នុងគោលបំណងជំរុញ ការអភិវឌ្ឍទីក្រុង ទីប្រជុំជន និងផ្តល់លំនៅដ្ឋាន តម្លៃសមរម្យ និងសមស្របដល់ការរស់នៅ ប្រកបមុខរបរចិញ្ចឹមជីវិត ប្រកបដោយសុវត្ថិភាព ផាសុកភាព និងសេចក្ដីថ្លៃថ្នូរ។

គួរបញ្ជាក់ថា លំនៅដ្ឋានសមរម្យ គឺជាប្រភេទលំនៅដ្ឋាន សម្រាប់គ្រួសារដែលមានប្រាក់ចំណូលមធ្យម ឬប្រាក់ចំណូលទាប សាង់សង់ឡើងដោយក្រុមហ៊ុនឯកជន ដោយទទួលបានការលើកទឹកចិត្ត និងគាំទ្រពីរាជរដ្ឋាភិបាលលើផ្នែកសំខាន់ៗ បី គឺ ៖ ទី១.ផ្នែកវិនិយោគសាធារណៈ ,ទី២.ផ្នែកសារពើព័ន្ធ អាករ និងកម្រៃផ្សេងៗ, និងទី៣.ផ្នែកនិយតកម្ម៕