ក្រុមអ្នកស៊ើបអង្កេតដែលកំពុងស៊ើបអង្កេតការធ្លាក់យន្តហោះ Boeing 737 របស់ក្រុមហ៊ុនអាកាសចរណ៍អេត្យូពីដែលបានធ្លាក់ចូលទៅក្នុងទីវាលមួយ បានស្វែងរកតាមកម្ទេចកម្ទីដើម្បីរកមើលតម្រុយអំពីមូលហេតុនៃគ្រោះមហន្តរាយនេះខណៈប្រតិបត្តិករនៅជុំវិញពិភពលោកបានចាប់ផ្តើមផ្អាកការហោះហើររបស់ពួកគេ។
យន្ដហោះម៉ាកថ្មី MAX 8 បានធ្លាក់កាលពីថ្ងៃអាទិត្យត្រឹមតែ៦នាទីប៉ុណ្ណោះក្នុងការហោះហើររបស់ខ្លួនឆ្ពោះទៅកាន់ទីក្រុង Nairobi ដោយបានសម្លាប់មនុស្សទាំងអស់១៥៧នាក់នៅក្នុងនោះ។
ក្រុមហ៊ុនអាកាសចរណ៍នេះបាននិយាយកាលពីថ្ងៃចន្ទថា ខ្លួនកំពុងដកយន្ដហោះ 737 Max របស់ខ្លួនមិនឲ្យបម្រើសេវា, ប៉ុន្មានម៉ោងបន្ទាប់ពីនិយ័តករសុវត្ថិភាពដែនអាកាសរបស់ប្រទេសចិនបានបញ្ជាឲ្យក្រុមហ៊ុនអាកាសចរក្នុងស្រុកធ្វើដូចគ្នានេះ។
អាកាសយានិក៨នាក់និងអ្នកដំណើរ១៤៩នាក់មកពី៣៥ប្រទេសបានស្លាប់នៅពេលជើងហោះហើរ ET 302 ធ្លាក់ចូលទៅក្នុងវាលមួយដែលមានចម្ងាយ៦០គីឡូម៉ែត្រភាគអាគ្នេយ៍នៃរដ្ឋធានី Addis Ababa របស់ប្រទេសអេត្យូពី។
ក្នុងចំណោមអ្នកស្លាប់គឺមានភ្ញៀវទេសចរ អ្នកធ្វើជំនួញនិងបុគ្គលិកអង្គការសហប្រជាជាតិរួមទាំងអ្នកដែលធ្វើការនៅអង្គការកម្មវិធីស្បៀងអាហារពិភពលោក ភ្នាក់ងារជនភៀសខ្លួនអង្គការសហប្រជាជាតិនិងអង្គការអន្តោប្រវេសន៍អន្តរជាតិផងដែរ។
ក្រុមហ៊ុនអាកាសចរណ៍អេត្យូពីដែលជាក្រុមហ៊ុនដឹកជញ្ជូនធំបំផុតរបស់អាហ្វ្រិកបាននិយាយថា ការស្វែងរកនៅកន្លែងធ្លាក់ត្រូវបានផ្អាកនៅពេលយប់ប៉ុន្តែនឹងបន្តឡើងវិញនៅពេលថ្ងៃ។
ក្រុមហ៊ុននេះនិយាយថា “គណៈកម្មាធិការមួយដែលរួមមានក្រុមហ៊ុនអាកាសចរណ៍អេត្យូពី អាជ្ញាធរអាកាសចរណ៍ស៊ីវិលអេត្យូពីនិងអាជ្ញាធរដឹកជញ្ជូនអេត្យូពីត្រូវបានបង្កើតឡើងដើម្បីធ្វើការស៊ើបអង្កេត។ នៅពេលដែលអ្នកស្លាប់ត្រូវបានគេកំណត់អត្តសញ្ញាណ សាកសពរបស់ពួកគេនឹងត្រូវបញ្ជូនទៅកាន់ក្រុមគ្រួសារនិងមនុស្សជាទីស្រលាញ់របស់ពួកគេ”។
ក្រុមប្រឹក្សាភិបាលសុវត្ថិភាពចរាចរណ៍ជាតិអាមេរិកបាននិយាយថា ខ្លួននឹងបញ្ជូនក្រុមអ្នកស៊ើបអង្កេតទៅជួយហើយប្រទេសកាណាដាដែលបាត់បង់ពលរដ្ឋរបស់ខ្លួនចំនួន១៨នាក់បាននិយាយថា ក្រុមមន្ត្រីកុងស៊ុលត្រូវបានដាក់ពង្រាយភ្លាមៗទៅកាន់ទីក្រុង Addis Ababa ដើម្បីរកការពិត។
សភាប្រទេសអេត្យូពីបានប្រកាសថ្ងៃកាន់ទុក្ខជាតិនៅថ្ងៃចន្ទ។
ក្រុមហ៊ុនអាកាសចរណ៍បាននិយាយថា យន្តហោះ Boeing 737-800MAX ថ្មីនេះត្រូវបានប្រគល់ជូនក្រុមហ៊ុនអាកាសចរណ៍អេត្យូពីរបស់រដ្ឋនៅថ្ងៃទី១៥ខែវិច្ឆិកា។
យន្តហោះនេះគឺជាប្រភេទដូចគ្នាទៅនឹងយន្តហោះរបស់ក្រុមហ៊ុន Lion Air ឥណ្ឌូនេស៊ីដែលបានធ្លាក់នៅខែតុលា, ១៣នាទីបន្ទាប់ពីហោះចេញពីទីក្រុងហ្សាការតាដោយបានសម្លាប់មនុស្សទាំងអស់១៨៩នាក់នៅលើយន្តហោះ៕ AFP
Source: Kampuchea Thmey Daily
0 Comments