ពលរដ្ឋភូមិកោះពាក្យជាង៥០នាក់ ពុលសាច់ជ្រូកព្រៃ

Cambodia News March 11, 2019

រតនគិរី ៖ មានករណីពលរដ្ឋពុលសាច់ជ្រូកព្រៃ បណ្ដាលឲ្យអ្នកនៅក្នុងភូមិក្មេង ចាស់ ប្រុស ស្រី ប្រមាណជា៥៥នាក់ កើតជំងឺរាករូស។

ករណីខាងលើនេះ បានកើតឡើង កាលពីថ្ងៃទី១០ ខែមីនា ឆ្នាំ២០១៩កន្លងទៅ នៅភូមិកោះពាក្យ ឃុំកោះពាក្យ ស្រុកវើនសៃ ខេត្តរតនគិរី។

ភ្លាមៗ នោះ បន្ទាប់ពីទទួលបានព័ត៌មានផ្ទុះជំងឺរាករូសនៅភូមិសាស្ត្រខាងលើ ក្រុមគ្រូពេទ្យនៃមន្ទីរសុខាភិបាលខេត្ត បានចុះសហការជាមួយក្រុមគ្រូពេទ្យមណ្ឌលសុខភាពឃុំ ចុះទៅដល់ទីតាំងខាងលើដើម្បីពិនិត្យនិងធ្វើការព្យាបាលជូនពួកគាត់នៅនឹងកន្លែងកើតហេតុតែម្តង។

បើតាមរបាយការណ៍ពីមន្ទីរសុខាភិបាលខេត្តបានបញ្ជាក់ថា មូលហេតុ នៃការពុលសាច់ជ្រូកព្រៃ គឺបណ្តាលមកពីពួកគាត់ ចម្អិនមិនបានល្អ រួមផ្សំនឹងការខ្វះអនាម័យផង ទើបបណ្តាលឲ្យអ្នកដែលទទួលទានរាករូសតែម្តង។

របាយការណ៍ខាងលើបន្តថា ក្នុងចំណោម៥៥នាក់នោះមានកូនក្មេង រាកស្រួចស្រាល់២៣នាក់ រាកមួល១នាក់។ មនុស្សចាស់រាកស្រួចស្រាល់១៨នាក់ រាកមួល៣នាក់។

របាយការណ៍បញ្ជាក់ទៀតថា ករណីប្រជាពលរដ្ឋរាករូសនេះ មិនមានសញ្ញាគ្រោះថ្នាក់ណាមួយកើតឡើងគួរឲ្យព្រួយបារម្ភនោះឡើយ ពោលគឺ ក្រុមគ្រូពេទ្យប្រចាំការនៅទីនោះ ពិនិត្យតាមដានយ៉ាងយកចិត្តទុកដាក់បំផុត៕