ស្ត្រីមានតម្លៃខ្ពស់បំផុត មិនអាចកាត់ថ្លៃបានក្នុងការជួយអភិវឌ្ឍន៍ក្នុងសង្គមគ្រួសារក៏ដូចជាប្រទេសជាតិ

ភ្នំពេញ ៖ ស្ត្រី ត្រូវបានចាត់ទុកថាគឺជាឆ្អឹងខ្នងក្នុងការអភិវឌ្ឍន៍សេដ្ឋកិច្ចសង្គមកម្ពុជាឲ្យមានភាពជឿនលឿនដូចបណ្ដាប្រទេសមួយចំនួននៅលើពិភពលោក។ មិនតែប៉ុណ្ណោះស្ត្រីគឺមានតម្លៃដ៏ថ្លៃថ្លាខ្ពង់ខ្ពស់បំផុតមិនអាចកាត់ថ្លៃបានពិសេសស្ត្រីមានសារៈសំខាន់ណាស់ក្នុងការជួយអភិវឌ្ឍន៍ក្នុងសង្គមគ្រួសារក៏ដូចជាប្រទេសជាតិទាំងមូលឲ្យរីកចម្រើនជឿនលឿនផងដែរ។

លោកសាស្ត្រាចារ្យ ឈាង រ៉ា អគ្គនាយកមន្ទីរពេទ្យកាល់ម៉ែតបានមានប្រសាសន៍បែបនេះក្នុងពិធីអបអរសាទរខួបលើកទី១០៨ទិវាអន្តរជាតិនារី០៨មីនាឆ្នាំ២០១៩ក្រោមប្រធានបទ(លើកកម្ពស់សមភាពយេនឌ័រនិងការគាំពារសង្គមដើម្បីអភិវឌ្ឍន៍ធនធានមនុស្ស)ដែលបានរៀបចំធ្វើឡើងកាលពីព្រឹកថ្ងៃទី០៥ ខែមីនា ឆ្នាំ២០១៩នៅអគារសម្តេចតេជោនៃមន្ទីរពេទ្យកាល់ម៉ែត។

បន្ទាប់ពីលោកស្រីសាស្ត្រាចារ្យ អ៊ឹ សិទ្ធិកា ប្រធានអុយនីតេប្រពោធនកម្មទារក បានអាននូវព្រះរាជសាររបស់សម្ដេចព្រះមហាក្សត្រីនរោត្តម មុនីនាថសីហនុព្រះវរាជមាតាជាតិខ្មែរក្នុងសេរីភាពសេចក្ដីថ្លៃថ្នូរ និងសុភមង្គលរួចមក លោកស្រីសាស្ត្រាចារ្យរស់ ស៊ីណា ប្រធានអ៊ុយនីតេប្រសាទសាស្ត្របានឲ្យដឹងដែរថា នៅមន្ទីរពេទ្យកាល់ម៉ែតមានបុគ្គលិកស្ត្រីចំនួន៨៦៧នាក់នៃបុគ្គលិកសរុប១៥៦៨នាក់ស្មើនឹង៥៥%(ភាគរយ)នៃចំនួនបុគ្គលិកទាំងអស់។ ចំនួនស្ត្រីខាងលើ ត្រូវបានចាត់ឲ្យបំពេញការងារនៅផ្នែកនានាមានគ្រប់តួនាទី និងគ្រប់ជំនាញគួរជាទីមោទនភាពក្រៃលែងសម្រាប់មន្ទីរពេទ្យកាល់ម៉ែត។

លោកសាស្ត្រាចារ្យឈាង រ៉ា អគ្គនាយកមន្ទីរពេទ្យកាល់ម៉ែតបានបន្តទៀតថា ប្រធានបទសម្រាប់ទិវាអន្តរជាតិនារី០៨មីនា ឆ្នាំ២០១៩នេះគឺ(លើកកម្ពស់សមភាពយេនឌ័រ និងការគាំពារសង្គមដើម្បីអភិវឌ្ឍន៍ធនធានមនុស្ស) ព្រោះតួនាទីស្ត្រីកម្ពុជាកាន់តែលេចធ្លោក្រោយពីប្រទេសកម្ពុជាទទួលបានមរតកដ៏ថ្លៃថ្លាគឺសន្តិភាព ដែលជាមរតករបស់សម្ដេចតេជោហ៊ុន សែន ក្នុងការបញ្ចប់ភ្លើងសង្គ្រាមដ៏រ៉ាំរ៉ៃទាំងស្រុងនៅឆ្នាំ១៩៩៨ តាមរយៈនយោបាយឈ្នះឈ្នះ ដែលបានធ្វើឲ្យសង្គមគ្រួសារខ្មែរទាំងមូលដែលធ្លាប់ទាស់ទែងគ្នាក្នុងអតីតកាលបានរួបរួមសាមគ្គីគ្នាមានឯកភាពទឹកដីទាំងស្រុង និងរួមរស់ជាមួយគ្នាប្រកបដោយមោទនភាពបំផុត។

លោកសាស្ត្រាចារ្យអគ្គនាយកមន្ទីរពេទ្យ បានបន្តទៀតថា ស្ត្រីគឺជាឆ្អឹងខ្នងនៃប្រទេសជាតិ ស្ត្រីជាមាតានៃពិភពលោក ដូច្នេះការកសាងប្រទេសមួយឲ្យមានការអភិវឌ្ឍរីកចម្រើនជឿនលឿនទៅបានគឺមិនអាចខ្វះស្ត្រីបានទេ ដូច្នេះបងប្អូនស្ត្រីត្រូវតស៊ូឡើងបន្តទៀតដើម្បីជៀសវាងពីពាក្យតំណាលថាស្ត្រីបង្វិលចង្ក្រានមិនជុំនោះ។ ដូច្នេះស្ត្រីក៏មានសិទ្ធិស្មើបុរសដែរ ព្រោះស្ត្រីជាកម្លាំងចលករមួយជួយអភិវឌ្ឍន៍ប្រទេសជាតិដោយសមភាពប្រកបដោយចីរភាព។

លោកសាស្ត្រាចារ្យ អគ្គនាយកមន្ទីរពេទ្យកាល់ម៉ែត បានមានប្រសាសន៍ថា បងប្អូននារី ជាធនធានមនុស្សមិនអាចខ្វះបានដោយបងប្អូននារីបានបំពេញការងារបម្រើអោយសង្គមជាតិយ៉ាងច្រើន និងមិនខ្លាចនឿយហត់។

លោកបន្តថា ពិធីនេះធ្វើឡើងដើម្បីរំលឹកឡើងវិញពីវីរភាពរបស់ស្ត្រី ដែលបានប្រឆាំងនឹងលក្ខខណ្ឌការងារតួនាទីរបស់ស្ត្រីក្នុងកិច្ចការសន្តិភាព ការអភិវឌ្ឍ ការជំរុញឲ្យបញ្ឈប់នូវ ការរើសអើង ព្រមទាំងការពង្រឹងឲ្យមានការគាំទ្រដល់ស្ត្រី ក្នុងការប្រើប្រាស់សិទ្ធិរបស់ខ្លួនឲ្យបានពេញលេញផងដែរ។

លោកបន្តថា ប្រធានបទ «លើកកម្ពស់សមភាពយេនឌ័រ និងការគាំពារសង្គមដើម្បីអភិវឌ្ឍន៍ធនធានមនុស្ស» ក្នុងគោលបំណងបន្តរំលេចពីតម្លៃនៃសន្តិភាព និងការលើកកម្ពស់វប្បធម៌អហិង្សាដែលរាជរដ្ឋាភិបាលបាននឹងកំពុងគាំទ្រជំរុញឲ្យមានការចូលរួមពីគ្រប់ស្ថាប័ន រួមទាំងបុរសទាំងស្ត្រី ដើម្បីវឌ្ឍនភាពសង្គមឆ្ពោះទៅលើកកម្ពស់សិទ្ធិស្ថានភាព ជីវភាព ឋានៈ តួនាទីរបស់ស្ត្រី ក៏ដូចជាសុខុមាលភាពសង្គម ដោយធ្វើការទប់ស្កាត់ និងកាត់បន្ថយអំពើហិង្សា ព្រមទាំងដោះស្រាយជម្លោះនានាដោយសន្តិវិធី។

គួរបញ្ជាក់ថា ក្នុងពិធីនោះដែរ លោកសាស្ត្រាចារ្យអគ្គនាយកមន្ទីរពេទ្យក៏បានអញ្ជើញបុគ្គលិកនារីម្នាក់មកបង្ហាញកាយវិការពីឥរិយាបថក្នុងការបង្ហាញជូនពីភាពទន់ភ្លន់(ឧទាហរណ៍)ដូចជាការទទួលភ្ញៀវឬក៏ទទួលសេវាជំងឺ និងក្រុមគ្រួសារអ្នកជំងឺ ដែលមកទទួលសេវានៅមន្ទីរពេទ្យផងដែរ។

មុននឹងបញ្ចប់កម្មវិធីលោកសាស្ត្រាចារ្យអគ្គនាយកមន្ទីរពេទ្យ ក៏បានជូនបាច់ផ្កា និងវត្ថុអនុស្សាវរីយ៍សម្រាប់បុគ្គលិកផ្នែកនារីទាំងអស់ផងដែរ៕