ការប្រកួតជម្រុះដណ្តើមខ្សែក្រវាត់ជើងឯកCarabao ទម្ងន់៥៧គីឡូក្រាម នៅសង្វៀនទូរទស្សន៍SEATV នៅរសៀលថ្ងៃសៅរ៍ ទី០៩ ខែមីនា ឆ្នាំ២០១៩ខាងមុខនេះ ជាការប្រកួតជុំចុងក្រោយ រវាងអ្នកប្រដាល់កម្ពុជាលាភ រដ្ឋា ក្លិបដីឡូតិ៍មានរិទ្ធ ខេត្តបន្ទាយមានជ័យ និងអ្នកប្រដាល់ថៃYorth Vandy ហើយអ្នកប្រដាល់កម្ពុជា តាញ់ មករា សមាគមកីឡាប្រដាល់ក្រសួងការពារជាតិ ជួបអ្នកប្រដាល់ថៃ Deuk Ken។
លាភ រដ្ឋា និង Yorth Vandy ពួកគេទាំងពីរនាក់នេះ មិនធ្លាប់ជួបគ្នាទេកន្លងមក។ តែយ៉ាងណា លាភ រដ្ឋា គេមានតែម និងប្រៀបជាងYorth Vandy ត្រង់ថា អ្នកប្រដាល់ថៃរូបនេះវាយអន់ មិនទាន់ដែលស្គាល់ឈ្នះមួយប្រកួតនៅឡើយទេ ក្នុងការប្រកួតជម្រុះ៣ជុំកន្លងមកនេះ។ ហើយមួយទៀត រឿងកម្ពស់Yorth Vandy គេគ្រាន់តែខ្ពស់ជាងបន្តិច គឺ១,៦៥ម៉ែត្រ ខណៈដែល រដ្ឋា គេ១,៦៤ម៉ែត្រនោះ។ ចំពោះសមត្ថភាពវិញ គឺ លាភ រដ្ឋា លើដាច់តែម្តង។
Yorth Vandy គេមានកំណត់ត្រាប្រកួតចំនួន៧៣លើក ឈ្នះ៥៨លើក ចាញ់១៥លើក និងមិនដែលស្មើ ។ ចំណែក លាភ រដ្ឋា គេមានកំណត់ត្រាប្រកួត៥៦លើក ឈ្នះ៤២លើក ចាញ់១២លើក និងស្មើ០២លើក។
លាភ រដ្ឋា គេប្រកួតជុំទី១(១៩មករា២០១៩) គេវាយឈ្នះDek Doeurក្នុងទឹកទី១ និងជុំទី២ គេវាយឈ្នះ Banda Sak ក្នុងទឹកទី៤ និងជុំទី៣ គេវាយឈ្នះ Deuk Ken ក្នុងទឹកទី១ ដែលធ្វើឲ្យគេបាន៩ពិន្ទុ សម្រាប់ការប្រកួតជម្រុះបីជុំកន្លងទៅនេះ។ ចំណែកការប្រកួតជុំទី១ របស់ Yorth Vandy នេះ អ្នកប្រដាល់ថៃរូបនេះ បានវាយចាញ់ ម៉ន សាម៉េត ដោយពិន្ទុ ហើយជុំទី២ គេត្រូវ វ៉ាន់ វឿន វាយឲ្យសន្លប់ក្នុងទឹកទី១ និងជុំទី៣ គេចាញ់ តាញ់ មករា ក្នុងទឹកទី៣ទៀត។
ទោះជាយ៉ាងណាក្តី សម្រាប់ការជួបគ្នានេះ ពុំអាចសន្និដ្ឋានមុនថា អ្នកណាឈ្នះ អ្នកណាចាញ់នោះឡើយ ហើយពីរនាក់នេះ ក៏មិនអាចអ្នកណាមើលស្រាលអ្នកណាបានដែរ។
ចំពោះការជួបគ្នារវាង តាញ់ មករា និង Deuk Ken វិញ ក៏ប្រហែលជាមិនពិបាកទស្សន៍ទាយប៉ុន្មានដែរ ព្រោះ Deuk Ken នេះ ក៏មិនជាខ្លាំងនោះដែរ ដែលកាលពីជុំទី១ Deuk Ken (២៦មករា២០១៩) គឺ ចាញ់វ៉ាន់ វឿន ក្នុងទឹកទី៣ ហើយជុំទី២ គេចាញ់សេន កុសល ដោយពិន្ទុ និងជុំទី៣ គេចាញ់ លាភ រដ្ឋាក្នុងទឹកទី១ ដែលបានតែ៣ ពិន្ទុប៉ុណ្ណោះ។ ដូច្នេះ តាញ់ មករា គេប្រហែលជាអាចយកឈ្នះ Deuk Ken នេះបានដោយផុយ សម្រាប់ជំនួបជុំទី៤ដែលជាជុំចុងក្រោយនេះ។
តាញ់ មករា កាលពីប្រកួតជុំទី១(១៩មករា២០១៩) គេវាយឈ្នះ Banda Sak ដោយពិន្ទុ , ជុំទី២ គេបានផ្តួលPhrakay Phat អោយសន្លប់ក្នុងទឹកទី១ និងជុំទី៣ គេឈ្នះ Yorth Vandy ក្នុងទឹកទី៣ ទទួលបាន៩ពិន្ទុហើយ ក្នុង៣ជុំកន្លងមកនេះ ហើយចំពោះ Deuk Ken វិញ គេបាន៣ពិន្ទុ ព្រោះ៣ជុំ គេវាយចាញ់ទាំង៣ជុំនោះ។
អ្នកប្រដាល់វ័យក្មេង តាញ់ មករា គេមានប្រវត្តិប្រកួត៥៨លើក ឈ្នះ៥២លើក ចាញ់០៥លើក និង ស្មើ០១លើក។ ឯ Deuk Ken គេមានប្រវត្តិប្រកួតចំនួនតែ៦២លើក ក្នុងនោះឈ្នះ៤៨លើក និង ចាញ់១៧លើក មិនដែលស្មើ។ យ៉ាងណាសម្រាប់ការប្រកួតជុំចុងក្រោយនេះ គេរំពឹងថាតាញ មករា នឹងរកបាន៣ពិន្ទុបន្ថែមមិនខាន ក្នុងការជួប Deuk Ken នេះ។
សូមបញ្ជាក់ថា ការប្រកួតជើងឯកខារ៉ាបាវរដូវកាលទី៨ទម្ងន់៥៧គីឡូក្រាមលើកនេះ មានអ្នកប្រដាល់ខ្លាំងៗចំនួន៨រូប ចូលរួមប្រកួត គឺខ្មែរ៤នាក់ ថៃ៤នាក់។ អ្នកប្រដាល់ខ្មែរទាំង៤នាក់នោះ រួមមានសេន កុសល ក្លិបមោងឬស្សីមរតកគុនខ្មែរ(ជំនួសម៉នសាម៉េត) , វ៉ាន់ វឿន ក្លិបឃ្លាំងមឿងកីឡា , លាភ រដ្ឋា ក្លិបដីឡូត៍មានរិទ្ធខេត្តបន្ទាយមានជ័យ និងតាញ់ មករា សមាគមកីឡាប្រដាល់ក្រសួងការពារជាតិ។ ឯ អ្នកប្រដាល់ថៃ ៤ នាក់វិញ មាន Deuk Ken , Yorth Vandy , Dek Doeur និង Banda Sak។
ចំពោះការប្រកួតវិញ គឺធ្វើតាមរូបមន្តវិលជុំជម្រុះដោយគិតពិន្ទុ ដែលមានបីដំណាក់កាល។ ដំណាក់ទី១ អ្នកប្រដាល់ទាំង៨នាក់នោះ ចែកជាពូលខ្មែរនិងពូលបរទេស ដែលមាន៤នាក់មួយពូល។ អ្នកប្រដាល់ខ្មែរទាំង៤នាក់ ត្រូវប្រកួតវិលជុំជាមួយពូលអ្នកប្រដាល់ថៃ ដោយជម្រុះចោលទុកតែ២នាក់ សម្រាប់ឡើងទៅប្រកួតផ្ដាច់ព្រ័ត្រ ដណ្ដើមខ្សែក្រវាត់និងប្រាក់រង្វាន់តែប៉ុណ្ណោះ។
គួរបញ្ជាក់ថា សម្រាប់រូបមន្តប្រកួតនេះ គឺខ្មែរមិនប៉ះខ្មែរគ្នាឯងទេ ឯអ្នកប្រដាល់បរទេស ក៏មិនប៉ះគ្នាដែរក្នុងវគ្គជម្រុះនោះ។ មិនមានវគ្គវគ្គពាក់កណ្ដាលផ្ដាច់ព្រ័ត្រ អ្នកចាញ់ក្នុងជុំជម្រុះចប់ការប្រកួតតែម្ដង ហើយក៏ពុំមានចំណាត់ថ្នាក់លេខ៣ លេខ៤នោះដែរ៕
Source: Kampuchea Thmey Daily
0 Comments